1Dayawok hi APU DIOS hi am-in di kabaelak te hiya ya nunna-ud an maphod. 2Hiyay nanongnan dayawok ya adik kal-iwan di ule nan ha-on. 3Kal-iwanan am-in di liwat ku ya kaanonan am-in di dogok. 4Ya ihwangak hi katayak. Adi malumman di pamhod na ya homok nan ha-on. 5Idat nan am-in di kiphodak, ta nanongnan nakal-otak, umat nah tuldu.

6Hi APU DIOS ya itakdog nat baddangana nadan paligligaton di udum an tatagu. 7Impainilanan Moses di pinhod nan maat ya impatibonay ongal an kabaelana nadah holag Israel. 8Huhhummok ya mauleh APU DIOS, adi kabinnoh-ol ya adi malumman di pamhod na. 9Adi humamahamak hi gapunah pamoh-olanan ditaku ya adi bo munnananong di boh-ol nan ditaku. 10Takon di lebbeng nan makastigu taku gapuh liwat taku ya adi ditaku kastiguwon. 11Man-uke ya adi malkud nan munnananong an pamhod na nadah mundayaw ya mangun-unud ke hiya umat hi kinadawwin di luta ya kabunyan. 12Ya kinaanay liwat taku ot paddungnay impaka-iddawwi nan ditaku, umat hi nundawwiyan di timilan ya kalin-oban di algo. 13Hay ulen APU DIOS nadah mangun-unud ke hiya ya umat hi ulen di ama hi imbabalena. 14Inilanan hay tagu ya lutay nakapyaana.

15Hay nitaguwan di tagu ya umat hi tumaguwan di holok an nakatang ya abu 16ya umat hi habung an deket dimmibdib ya nitayyap ta mama-id. 17-18Mu hay pamhod APU DIOS ya munnananong nadah mangun-unud ke hiya, nadah adi mangibahho nakitobbalanan dida ya nadah mangun-unud hi tuguna. Ya hay kaphod na ya munnananong damdama nadah holag da.

19Hi APU DIOS ya ad langit di nangihamadanah pun-ap-apuwanan am-in takon di daana. 20Dakayun ongal di kabaelanan aanghel an mangat hi ibaal na ya mangun-unud hi tuguna, dayawon yuh APU DIOS. 21Om dakayun aanghel an muttayunan mangun-unud hi pinhod na, dayawon yu hiya. 22Ya am-in kayun lintuna, takon di daana, hiyay dayawon yu.

Ha-oy ke damdama ya dayawok hi APU DIOS.