1Mumpasalamat takun APU DIOS te hiya ya maphod. Hay pamhod na ya munnanong an adi malumman. 2Danaey kalyon yuh tatagu, dakayun inihwang APU DIOS hi buhul na 3ot ibangngad dakayuh boble yun inilpu dakayuh kabobboble tuh lutah nangappit hi timilan ya kalin-oban di algo, hi south ya hi north.

4Hay udum ya eda humanawwangan nah adi maboblayan te adida pakahamak hi dalanon dan ume nah eda pumboblayan. 5Naagangan da ya nauwo da ya maid moy namnama dah biyag da. 6Indani ya mumpahpahmok dan APU DIOS gapuh namahig an punholholtapan da ot baddangana didah ligat da. 7Ya impangulu nay maphod an dalanon da ot ume da nah boblen eda pumboblayan. 8Ta hidiye nan lebbengnan mumpasalamat dan APU DIOS gapuh ongal an pamhod na ya gapun am-in hanadah umipamodwong an inatnan kiphodan da. 9Te idat nay inumon nadan nauwo ya idat nay maphod an makan hanadah maagangan.

10Hay udum ya u-umyung dan kay da wadah tapol te munholholtap dan nabangkilingan dah kalabut. 11Man-uke ya ngohayon dan adida un-unudon di tugun nan Dios an Katagtag-ayan. 12Ot pumbalinona didan nakakkapuy gapuh nakalligat an ngunun indat nan dida. Deket natu-i da on maid di bumaddang ke dida. 13Indani ya mumpahpahmok dan APU DIOS gapuh namahig an punholholtapan da ot baddangana didah ligat da. 14Impatikod nay punholholtapan dan paddungnay binhat nay bangkiling da ya kinaana dida nah tapol an nikalabutan da. 15Ta hidiye nan lebbengnan mumpasalamat dan APU DIOS gapuh ongal an pamhod na ya gapun am-in hanadah umipamodwong an inatnan kiphodan da. 16Hiya ya pa-iyonay giniling an dakkig nadan kalabutan takon nadan gumok an pattit na.

17Hanadan udum an tatagun makudang di nomnom da ya nunholholtap da gapuh ngohe da ya gapuh gaga-ihon inat da. 18Loktat ya adida mo pinhod an mangan ta dandaniy kate da. 19Indani ya mumpahpahmok dan APU DIOS gapuh namahig an punholholtapan da ot baddangana didah ligat da. 20Ot paphodona dida gapuh ongal an kabaelan di kalina ot uggeda nate. 21Ta hidiye nan lebbengnan mumpasalamat dan APU DIOS gapuh ongal an pamhod na ya gapun am-in hanadah umipamodwong an inatnan kiphodan da. 22Ya lebbeng nan mun-appit dah pumpasalamat dan hiya. Ya ikanta day amlong dan mangalkalih mipanggep nadah umipamodwong an inat na.

23Hay udum ya mungngunu dah bapor an mangemange dah udum an boble te hidiyey pangal-an dah kitaguwan da. 24Ya tinibo da nadan maphod an inat APU DIOS nah baybay gapuh ongal an kabaelana. 25Naminghan bo ya immandal nan umaliy nal-ot an dibdib ot namahig an katatakut di dalluyun. 26Deke on natu-ug nan bapor on immed dalom ot mama-id di tulid nadan mungngunuh bapor te timmakut da. 27Mungkidadapeng dan kay da nabutong yaden maid di maat da. 28Indani ya mumpahpahmok dan APU DIOS gapuh namahig an punholholtapan da ot baddangana didah ligat da. 29Impadin-ong nay puwok ya dalluyun 30ot pun-agwatona dida. Ya immamlong da te dimmin-ong mo ya malinggop dan dimmakal nah pingngit nan baybay. 31Ta hidiye nan lebbengnan mumpasalamat dan APU DIOS gapuh ongal an pamhod na ya gapun am-in hanadah umipamodwong an inatnan kiphodan da. 32Ya ipadayaw da kumah APU DIOS hi hinangngab di naamung an tatagu ya aap-apu.

33Tinduk APU DIOS di wawangwang ya oob-ob. 34Ya impumbalinan adi tummol di mitanom hanadah maluwab di mitanom handi gapuh kinagaga-ihon nadan numbobleh di. 35Ya nadah mamagan adi maboblayan ya winada nay danum hidi ya takon nadan natduk an ob-ob ya winadanay danum hidi. 36Ot ena pumboblayon hidi nadan maagangan an tatagu ot mangapya dah ongal an boble da. 37Nunliyak da ya nuntanom dah grapes ya dakkodakkol di inapit da. 38Ya binendisyonan APU DIOS dida ot mahlag dah dakkodakkol ya impadakol na boy halun da.

39Indani ya immo-ohay bilang nadan tatagun APU DIOS ya numbalin dan nakawwotwot te namahig di numpaholholtap di buhul dan dida. 40Mu mina-id APU DIOS di kabaelan dadiyen buhul da ot matalak da nah ambiambilog an adi maboblayan. 41Muden nada ken mahmok an tatagu ya baddangan APU DIOS dida ya ipadakol nay holag da umat hi kadakol di kalnero. 42Ya nadan mangun-unud ke APU DIOS ya umamlong dah panib-an dan tuwe. Mu nadan gaga-ihon tatagu ya pamga day op-opya.

43Dakayun nanomnoman an tatagu, iha-ad yuh nomnom yu datuwe. Nomnomon yu nan adi malumman an pamhod APU DIOS.