Yɛrɛwɛ sɛnrɛ nda wunlunaŋa Lemuwɛli wi nɔ wìla kan wi yeri
1Wunlunaŋa Lemuwɛli wi sɛnrɛ ti nda, wi nɔ wìla wi naga ma yɛrɛwɛ sɛnrɛ nda yo wi kan tori yɛɛn.
2Na pinambyɔ, mbe yiŋgi yo ma kan san?
Na latirige pyɔ, mbe yiŋgi yo ma kan?
Mboro ŋa mì yɔn fɔlɔ kɔn mɛɛ ma se, mbe yiŋgi yo ma kan?
3Maga kɔɔn fanŋga ki kɔ jɛɛlɛ wogo na,
jɛɛlɛ mbele pe maa wunlumbolo pe punŋgu, maga kɔɔn yɛɛ le pe kɛɛ!
4Lemuwɛli, duvɛn wii daga wunlumbolo pe ni,
fanŋga fɛnnɛ pee daga mbaa sinmɛ wɛlɛwɛ lagajaa mbaa woo.
Wunluwɔ si daga mbaa ko piin.
5Nakoma na wi ka wɔ mbe tin, wi yaa fɛgɛ kondɛgɛŋgɛlɛ ke na,
mbe mbele fuun pe yɛn tege na pe tanga ki shɔ pe yeri.
6Ye sinmɛ wɛlɛwɛ pi kan lere ŋa wi yɛn na kee kusaga wo yeri,
ye duvɛn wi kan lere ŋa wi nawa pì tanga wi na wo yeri.
7Wi ta wuu wɔ wi fɛgɛ wi fyɔnwɔ pi na,
wi ta wi nawa wɔ wi tege ki na pew!
8Mbele sɛnyogo ki yɛn ma ŋgban pe yeri, ma daga mbe para mbe yere pe ni,
pè je mbele na, ma daga mbe para mbe yere pe ni.
9Ma daga mbaa para, mbaa kiti sinŋɛ kɔɔn,
mbe yere fyɔnwɔ fɛnnɛ naa yuŋgbɔgɔrɔ fɛnnɛ pe ni.
Jɛlɛ ŋa wi yɛn jɛnŋɛ
10Ambɔ wi mbe ya mbe jɛlɛ jɛnŋɛ ta?
Wi sɔnŋgɔ kì wɛ lagba sɔnŋgbanga woo na.
11Wi pɔlɔ wi ma taga wi na fɔ jɛŋgɛ,
yarijɛŋgɛ ko ka soo pɔlɔ wi la wa go ki ni.
12Wi maa kajɛŋgɛ piin wi pɔlɔ wi kan,
wila tipege kpɛ pye wi na wi yinwege piliye yi ni fuun yi ni.
13Wi ma simbasire naa lɛn jese lagaja,
mberi tunŋgo pye wi yɛɛra kɛyɛn yi ni nayinmɛ ni.
14Wi ma pye paa safari wafɛnnɛ pe tɔnmɔkɔɔrɔ tugbɔɔrɔ ti yɛn,
wi maa yinrigi wi yaakara ti ni lege na paan ti ni.
15Wi ma yiri faa na laga ki fa laga gbɛn,
mbe yaakara gbegele wi go woolo pe kan,
mbe tunndo ti yɛɛlɛ wi tunmbyeele jɛɛlɛ pe na.
16Wi ma jatere pye kɛrɛ ta wogo na, mbe siri lɔ,
wi ka tɔnli ŋa ta wa wi tunŋgo ki ni, wi maa lɛ ma ɛrɛzɛn tiire sanri.
17Wi maa kurujara wi pɔ mbe fanŋga le wi yɛɛ ni,
mboo kɛyɛn yi ŋgban tunŋgo ki na.
18Wi maga yan fɔ wi yɛn na tɔnli lɛgɛrɛ taa wa wi safari waga ki ni,
wi fitanla wila figi yembinɛ, (wi maa tunŋgo piin wi na).
19Wi ma kaande wi yigi mbaa pinli,
mbaa vaan wi sunrugu wi yombɛgɛlɛ ke ni.
20Wi maa kɛɛ ki sanga na fyɔnwɔ fɛnnɛ pe kaan;
wi maa kɛɛ ki sanga na mbele pe yɛn tege na pe sari.
21Were sanga ni, wila la fyɛ mbe yo were yaa wi go woolo pe yigi,
katugu yaripɔrɔ liire yɛn pe ni fuun pe yeri.
22Wi ma danŋgoolo ti wi yɛɛ kan;
lɛn jese yaripɔrɔ naa kondoro yaripɔrɔ tiyɔnrɔ yɛn wi yeri fun.
23Na wi pɔlɔ wi ka sa cɛn wa ca lelɛɛlɛ pe ni, wa ca ki mbogo yeyɔngɔ ki na,
leele pe maa wi jate.
24Wi maa yaripɔrɔ tiin nari pɛrɛ,
na kurusijaraye gbegele na pe kaan safari wafɛnnɛ pe yeri paa pe pɛrɛ.
25Fanŋga konaa gbɔgɔwɔ pi ni, to ti yɛn wi fereyaara re;
wi maa sɔnri wi goto kala li na, na tɛgɛ.
26Wi maa para kajɛnmɛ ni,
yɛrɛwɛ sɛnrɛ jɛndɛ to ti maa yinrigi wa wi yɔn.
27Wi maa wi go kagala ke kɔrɔsi,
wila la tiyanra piin mbaa wi yɔn suro ti taa.
28Wi piile pe ma yiri naa mɛtanga yinri,
wi pɔlɔ wi maa wi sɔnni na yuun fɔ:
29«Jɛɛlɛ lɛgɛrɛ yɛn wa, mbele pe tangalɔmɔ pi yɛn ma yɔn,
ɛɛn fɔ mboro wogo ko wɛ pe ni fuun pe wogo ki na.»
30Wire ti ka pye sara ni ki maa lere fanla, tiyɔnwɔ pi ma kaa kɔ,
ɛɛn fɔ jɛlɛ ŋa wi maa fyɛ Yawe Yɛnŋɛlɛ li yɛgɛ, wo pe yaa ka sɔn.
31Wi tunŋgo ki tɔnli wi daga yoo kan wi yeri;
ca woolo pe daga mbaa wi gbogo wi tunŋgo ki kala na.