1Na pinambiile, yaa ye to wi nagawa sɛnrɛ ti nuru,

ye nuŋgbogolo jan yaa nuru, ye ta ye pye tijinliwɛ fɛnnɛ;

2katugu mi yɛn na jɛnmɛ jɛmbɛ kaan ye yeri,

ki kala na, yaga ka je na nagawa sɛnrɛ ti na.

3Mi fun, mìla pye pinambyɔ na to wi yeri,

na kala làa na nɔ wi ndanla paa pinuŋgbanna yɛn.

4Na to wìla pye nala nari na yuun fɔ:

«Na sɛnrɛ ti yigi mari tɛgɛ wa ma kotogo na;

ta tanri na ŋgasegele ke na, pa ma yaa yinwege ta.

5Kajɛnmɛ pi lagaja, ma tijinliwɛ pi lagaja,

maga ka fɛgɛ na yɔn sɛnyoro ti na, maga si ka laga ti na.

6Maga ka laga kajɛnmɛ pi na, pa pi yaa la wele ma na;

pi yaga pɔɔn ndanla, pa pi yaa lɔɔn go singi.

7Kajɛnmɛ pi lɛsaga koyi ŋga fɔ ma bala ma kajɛnmɛ pi lagaja;

ma yaritaga ki ni fuun ki ni, tijinliwɛ pi lagaja.

8Ta kajɛnmɛ pi jate kagbɔgɔ yɔn, pa pi yaa ma mɛgɛ ki yirige;

na maga pi yigi kɛyɛn shyɛn, pa pi yaa gbɔgɔwɔ kan ma yeri.

9Pi yaa pye paa fereyaraga tiyɔngɔ yɛn wa ma go ki na,

mbe pye paa wunluwɔ njala gbɔgɔwɔ wolo yɛn wa ma go ki na.»

10Na pinambyɔ, nuŋgbolo jan mala sɛnrɛ ti logo,

pa ma yaa yinwetɔnlɔgɔ ta.

11Mɔ̀ɔ naga kajɛnmɛ konɔ li ni,

mɔ̀ɔ yɛgɛ sin wa kasinŋge konɔ li ni.

12Na ma kaa tanri, yaraga ka sɔɔn yɛgɛ kɔn;

na ma kaa fee, ma se kurugo mbe to.

13Nagawa sɛnrɛ nda tì kan ma yeri, ti yigi jɛŋgɛ, maga ka ti ti shɔ ma yeri;

mari yigi tiyɔngɔ, katugu ma yaa yinwege ta to fanŋga na.

14Maga kaa tanri wa lepeele pe konɔ li ni,

maga ka kapere pyefɛnnɛ pe tulugo ki lɛ.

15Ki konɔ li yan mali yaga wa, maga ka toro wa li ni;

kɛ ma lali li ni, maa kee ma konɔ.

16Katugu ki leele paa ya wɔnlɔ na pe fa kapege pye,

wɔnlɔwɔ na pe yigi na pe fa tipege pye lere wa na;

17katugu tipewe pyewe po pi yɛn pe yaakara re,

lewɛlɛwɛ kapyere pyege ki maa yinrigi pe ni paa duvɛn wɔgɔ yɛn.

18Lesinmbele pe tangalɔmɔ pi yɛn paa lalaaga yanwa yɛn;

ki yanwa pi maa yinrigi na kee yɛgɛ fɔ mbe sa gbɔn yɔnlɔfugo na.

19Lepeele pe tangalɔmɔ pi yɛn paa diwi yɛn,

yaraga ŋga ki yaa pe kan pe kurugo pe to paa ki jɛn.

20Na pinambyɔ, tanla sɛnrɛ ti nuru jɛŋgɛ,

nuŋgbolo jan mala sɛnyoro ti logo.

21Maga ka ti ti fɛgɛ ma ni fyew,

ti tɛgɛ wa ma nawa pi ni;

22katugu mbele fuun pe ma yɛnlɛ ti na, ti ma yinwege kan pe yeri,

mbe ŋgbanwa kan pe yeri wa pe wire ti ni.

23Jatere ŋa wa ma kotogo na, taa kɔrɔsi ma wɛ yaraga ki ni fuun ki na,

katugu pa ma yinwege kagala ke maa yinrigi wa ma kotogo ki ni.

24Ma yɔn ki yingiwɛ jɛn yagbogowo sɛnrɛ ti ni,

ma lefanlaga sɛnrɛ ti lali ma yɔn ki ni.

25Ta wele wa ma yɛɛ yɛgɛ, maa kee,

ma yɛngɛlɛ ke kan maa wele wa ma yɛɛ yɛgɛ.

26Konɔ na ma yaa lɛ, li gbegele mali yɔn yala,

pa kona ma koŋgolo ke ni fuun ke yaa pye mbe sin†.

27Maga ka kɛ mbe kari kalige na nakoma kamɛŋgɛ na,

ma yɛɛ laga lali kapege ki ni.