1Jɛlɛ kajɛnŋɛ wi maa go ki kan;

ɛɛn fɔ jɛlɛ ŋa wi yɛn lembige, wi maa go ki ya wi yɛɛra kɛyɛn yi ni.

2Lere ŋa wi maa tanri kozinnɛ li na, wo maa fyɛ Yawe Yɛnŋɛlɛ li yɛgɛ;

ɛɛn fɔ ŋa wi maa tanri koŋgolo ŋgele kè koolo ke na, wo maa li tifaga.

3Kambajɛnŋɛ wi yɔn sɛnrɛ ti yɛn paa gbɛgɛ yɛn, mboo gbɔn mboo yɛɛ gbɔgɔwɔ pi laga wi na;

ɛɛn fɔ kajɛnmbɛlɛ pe yɔn sɛnrɛ ti ma pe shɔ.

4Na falinɛrɛ woro wa, bondoolo pe ma koro waga;

ɛɛn fɔ falinɛrɛ ti fanŋga na, yarilire lɛgɛrɛ ma ta.

5Sɛrɛfɔ sinŋɛ na yagbolo finlɛ;

ɛɛn fɔ sɛrɛfɔ tipee wo maa yagbogolo finlɛlɛ.

6Ŋa wi maa tɛgɛ leele na, wi maa kajɛnmɛ pi lagajaa, wi se suu ta;

ɛɛn fɔ tijinliwɛ fɔ wi jɛnmɛ taga si ŋgban.

7Ma yɛɛ laga lali lembige ki ni,

katugu mɛɛ yaa jɛnmɛ ta mbe yiri wa wi yɔn sɛnrɛ ti ni.

8Lere ŋa wì jilige wi kajɛnmɛ pi maa wi kologo ki yɛgɛ finligi wi kan;

ɛɛn fɔ kambajɛnŋɛ wi kambajɛnmɛ pi maa wi punŋgu.

9Kambajɛnmbɛlɛ pe ma yo go woro ki na mbe kajɔɔgɔ gbegele;

ɛɛn fɔ wa lesinmbele pe sɔgɔwɔ kajɛŋgɛ ko ki ma pye wa.

10Lere wi nawa pì tanga yɛgɛ ŋga na, wo wi maga jɛn wa wi nawa;

na nayinmɛ ka si pye wa, lere wa yɛgɛ se ya mbege tanwa pi jɛn.

11Lepee wi go ki yaa ka ya;

ɛɛn fɔ lesinŋɛ wi go ki yaa la jiti mbaa kee yɛgɛ.

12Konɔ la ma pye ma sin lere wa yɛgɛ na,

ma si yala li puŋgo kala lo yɛn kunwɔ konɔ.

13Lere mbe ya mbaa tɛgɛ mbe sigi ta wi nawa pi yɛn ma tanga wi na;

nayinmɛ pi kɔsaga ki mbe ya pye nandangawa.

14Lere ŋa wi sɔ wi yɛn ma tijanga, wi yaa kaa kapyere ti tɔnli wi ta;

lejɛnŋɛ wi yaa kaa tɔnli wi ta mbe tin wi na.

15Kambajɛnŋɛ wi ma taga sɛnrɛ nda fuun pe ma yo wi kan ti na;

ɛɛn fɔ lere ŋa wì jilige, wi maa wi tangalɔmɔ pi kɔrɔsi.

16Kajɛnŋɛ wi maa fyɛ kapege pyewe pi na, mboo yɛɛ laga lali ki ni;

ɛɛn fɔ lembige kila ki yɛɛ yingiwɛ jɛn, katugu ki ma taga ki yɛɛ na.

17Lere ŋa wi maa nawa ŋgbanni jaga jaga, wi maa kajagara piin;

lere ŋa wi maa tipege jaa mbe pye, leele pe maa panra.

18Kambajɛnmbɛlɛ pe kɔrɔgɔ ko ki yɛn kambajɛnmɛ we;

ɛɛn fɔ jɛnmɛ po pi yɛn mbele pè jilige pe gbɔgɔwɔ we.

19Lepeele pe yaa ka kanŋguuro kan lejɛmbɛlɛ pe nɔgɔ;

kapere pyefɛnnɛ pe yaa ka kanŋguuro kan wa lesinmbele pe go yeyɔnrɔ ti na mbe pe yɛnri.

20Fyɔnwɔ fɔ wi cɛnyɛɛnlɛ yɛrɛ pe maa panra;

ɛɛn fɔ penjagbɔrɔ fɔ wi wɛnnɛ pe ma pye ma lɛgɛ.

21Lere ŋa wi maa cɛnyɛnlɛ wi tifaga, wi yɛn kapege pyefɔ;

ɛɛn fɔ lere ŋa wi maa lere ŋa wi yɛn tege na wi yinriwɛ taa, fɛrɛwɛ yɛn ki fɔ wi woo!

22Mbele pe maa kapege ki jate mbege pye, naga yɛn ma, paa la pe yɛɛ punŋgu wi le?

Mbele pe maa kajɛŋgɛ ki jate mbege pye, pe maa tanri kagbaraga pyege naa kaselege na.

23Sɛnwee wi ma te tunŋgo ŋga fuun ni, tɔnli ma ta ki ni;

ɛɛn fɔ sɛnwara yogo ki maa paan fyɔnwɔ ni.

24Penjagbɔrɔ tawa po pi yɛn kajɛnmbɛlɛ pe wunluwɔ njala le;

tijinliwɛ fu fɔ wi wogo ko ki yɛn tijinliwɛ fu kapyere re.

25Sɛrɛfɔ ŋa wi maa kaselege yuun, wi ma lere shɔ;

ɛɛn fɔ sɛrɛfɔ ŋa wi yɛn yagboyoo, wi maa nambara piin.

26Lere ŋa wi maa fyɛ Yawe Yɛnŋɛlɛ li yɛgɛ, jigi tagasaga gbɔgɔ yɛn wi yeri;

katugu li maa wi pinambiile pe go singi.

27Mbaa fyɛ Yawe Yɛnŋɛlɛ li yɛgɛ, ki ma yinwege kan lere yeri;

ki ma sɛnwee wi shɔ kunwɔ pi yanwa pi kɛɛ.

28Na tara ti woolo paga lɛgɛ, ki ma gbɔgɔwɔ kan wunlunaŋa wi yeri;

ɛɛn fɔ na tara ti woolo paga pye mbe kologo, ki ma pye wunlunaŋa pyɔ wi towo.

29Lere ŋa wila la nawa ŋgbanni jaga jaga, tijinliwɛ gbɔɔ yɛn wi yeri;

ɛɛn fɔ lere ŋa wi maa nawa ŋgbanni jaga jaga, wo maa wi lembigewe pi nari.

30Kotoyinŋge ki ma ŋgbanwa kan witige ki yeri;

ɛɛn fɔ yenjaga ko yɛn paa sagbanpanraga yɛn, ŋga ki maa witige ki nii.

31Lere ŋa wi maa fyɔnwɔ fɔ wi jɔlɔ, wi maa ŋa wùu da wi tifaga;

ɛɛn fɔ lere ŋa ka fyɔnwɔ fɔ wi yinriwɛ ta, wo ma ŋa wùu da wi gbɔgɔ.

32Lepee wi tipege ko ki maa jan;

ɛɛn fɔ lesinŋɛ wi jigi wi ma koro ma cɛn wi na, ali sa gbɔn wi kunwɔ pi na.

33Kajɛnmɛ pi ma pye wa tijinliwɛ fɛnnɛ pe kotogo na;

ɛɛn fɔ pi se ya jɛn wa lembire ti sɔgɔwɔ.

34Mbaa kasinŋge piin wa tara ti ni, ki ma tara ti mɛgɛ ki yirige;

ɛɛn fɔ kapege pyege ko maa fɛrɛ waa tara woolo pe na.

35Tunmbyee ŋa wì jilige wi kala li ma wunlunaŋa wi ndanla;

ɛɛn fɔ tunmbyee ŋa wi ma fɛrɛ wa wi na, wi ma nawa ŋgban wo ni.