Mbaa ma yɛɛ kɔrɔsi jɛlɛ kalikalifɔ wi ni
1Na pinambyɔ, na kajɛnmɛ sɛnrɛ ti logo,
ma nuŋgbolo jan mala tijinliwɛ sɛnrɛ ti logo;
2jaŋgo ma jatere pyelɔmɔ jɛmbɛ ta,
kajɛnmɛ sɛnrɛ mbaa yinrigi wa ma yɔn.
3Katugu jɛlɛ kalikalifɔ wi yɔn sɛnrɛ tì tanla ndɛɛ sɛnrɛgɛ yi;
ti ma wɔlɔgɔ paa sinmɛ fawoo yɛn.
4Ɛɛn fɔ wa kala li kɔsaga, ti ma sori paa kurugbɛgɛ yɛn,
wi yɔn sɛnrɛ ti maa sugulo paa tokobi yɔn shyɛn fɔ yɛn.
5Wi tangalɔmɔ pi maa kee wa kunwɔ pi yeri,
wi yɔngɔlɔ ke ma sin na kee wi ni wa kuulo tara.
6Konɔ na li maa yinwege kaan, wila lo lɛ,
wi ma puŋgo wi konɔ li na, wila sigi jɛn.
7Koni na pinambiile, yaa nuru na yeri,
yaga ka je na yɔn sɛnrɛ ti na.
8Ma konɔ li laga lali ki jɛlɛ cɛnlɛ wi ni,
maga ka fulo wa wi go yeyɔngɔ ki tanla.
9Jaŋgo maga kɔɔn gbɔgɔwɔ pi kan leele pele yɛgɛ yeri,
mbe ti naŋa yinriwɛ mbataa wa mbɔɔn yinwege ki jɔgɔ ma yeri;
10jaŋgo cɛngɛlɛ kele yɛgɛ woolo ka ka pan mbe tege ŋga mà te ki yarijɛndɛ ti koli mberi ta;
ma tunŋgo ki tɔnli wi kari pele yɛgɛ yinrɛ ni.
11Jaŋgo wa ma yinwege ki kɔsaga maga kaa jɛɛn,
na ma fanŋga kiga ka kɔ, a ma wire ti te ma na we.
12Jaŋgo maga ka yo fɔ: «Ki pye mɛlɛ, a mi si je nagawa sɛnrɛ ti na?
Ki pye mɛlɛ, a yɛrɛwɛ sɛnrɛ ti silan mbɛn?
13Ki pye mɛlɛ mii si yɛnlɛ mbanla nagafɛnnɛ pe sɛnrɛ ti logo?
Mii si yɛnlɛ mbe nuŋgbolo jan, mbanla karafɛnnɛ pe nagawa sɛnrɛ ti logo?
14Kì koro jɛnri anmɛ mi jɔgɔ ma kɔ ma wɔ wa pew,
wa na woolo pe gbogolomɔ woolo pe sɔgɔwɔ.»
Ma pye sinŋɛ ma jɔ wi ni konaa wɔɔn ndanla
15Ma yɛɛra tɔnmɔ wege ta ko tɔnmɔ po woo,
tɔnmɔ mba pila pulo na yinrigi wa ma kɔlɔ wi ni, maa po woo.
16Yiŋgi na mɛɛ ma pulugo tɔnmɔ pi yaga, pila wuun funwa na jaga?
Yiŋgi na mɛɛ ma lɔgɔ tɔnmɔ pi yaga pila fuun, mbaa kee wa katoro ti ni?
17Ki tɔnmɔ pi daga mbe pye mboro nuŋgba woo,
pii daga mbe pye leele pele yɛgɛ woo.
18Yɛnŋɛlɛ sa duwaw ma pulugo ki na,
jɛlɛ ŋa mà pɔri ma lefɔnrɔ sanga wi ni, ta yɔgɔri wi ni!
19Wi yɛn ma yɔn paa lufanɔ yɛn, paa dagbɛ nɔ tiyɔɔn yɛn.
Wi tiyɔnwɔ pɔɔn yɛnlɛ tin fɔ sanga pyew,
wi ndanlawa pi nayinmɛ kan ma yeri fɔ sanga pyew.
20Na pinambyɔ, yiŋgi na mɛɛ sa yɛgɛ yirige jɛlɛ kalikalifɔ wa na?
Yiŋgi na mɛɛ sa jɛlɛ wa yɛgɛ yinŋgele yigi?
21Katugu Yawe Yɛnŋɛlɛ li yɛgɛ yɛn sɛnwee wi koŋgolo ke na,
li maa wi koŋgolo ke ni fuun ke yaan.
22Lepee wi yɛɛra kajɔgɔrɔ ti maa yigi paa pɛnɛ yɛn,
wi yɛɛra kapere ti ma pye maŋgala maa pɔ.
23Wi yaa ku wi mbakorowo pi kala na,
mbe kɔ mbe wɔ wa, naa wi yɛn lembige ma toro ki kala na.