1Duvɛn wi ma lere kan wi maa wi yɛɛ gbogo,

sinmɛ wɛlɛwɛ pi maa paan yogo lɛgɛrɛ ni;

lere o lere wi maa pi woo na tinni wo yɛn kambajɛnŋɛ.

2Wunlunaŋa wi naŋgbanwa pi yɛn fyɛrɛ ni paa jara yirifɔnŋɔ ma kaa na gbele we;

lere ŋa ka wi nawa pi ŋgban, wi maa yɛɛ go ki pɛrɛ.

3Mbɔɔn yɛɛ laga lali maara ti ni, ki ma gbɔgɔwɔ kan lere yeri;

ɛɛn fɔ kambajɛnŋɛ wi maa maara kɔɔn.

4Were ti kala na, tiyanŋa wila yɛnlɛ mbaa fali wa wi kɛrɛ,

na yarilire kɔnsanga wiga ka pan mbe gbɔn, wi maa ki jaa mbe yarilire kɔn,

ɛɛn fɔ wila yaraga ka kpɛ ta.

5Kagala ŋgele sɛnwee wi ma kɔn ma tɛgɛ wa wi nawa ke yɛn ma lara paa latijugo tɔnmɔ yɛn,

ɛɛn fɔ lere ŋa wì jilige, wo wi ma ke yirige funwa na.

6Lelɛgɛrɛ pe maa ki yuun ma yo pe yɛn leele mbele pe mbe ya taga pe na;

ɛɛn fɔ lere ŋa pe mbe ya taga wi na wo tawa si tanla.

7Lesinŋɛ wi tangalɔmɔ pi yɛn ma filige,

wi puŋgo na, fɛrɛwɛ yɛn wi piile pe woo!

8Na wunlunaŋa wi ka cɛn kiti kɔngɔ ki na sanga ŋa ni,

ŋga fuun ki yɛn tipege, wi maga yan teere.

9Ambɔ wi mbe ya mbege yo mbe yo fɔ: «Mìlan nawa pi pye pì filige,

na kapere pyew tì laga na na mala pye kpoyi?»

10Mbaa pɛrɛgɛ naa lɔnɔ piin puwakuruye cɛnlɛ shyɛn nakoma tiwiyaara cɛnlɛ shyɛn ni,

ki kagala shyɛn ke yɛn ma tijanga Yawe Yɛnŋɛlɛ li yɛgɛ na.

11Ali yɛrɛ pyɔ jɛɛ wi kapyegele ke maga naga,

na kaa pye wi tangalɔmɔ pi yaa ka pye jɛrɛgisaga fu konaa mbe sin.

12Yawe Yɛnŋɛlɛ lo lì nuŋgbogolo ke da mbaa nuru ke ni,

konaa ma yɛngɛlɛ ke da mbaa yaan ke ni.

13Maga ka ti wɔnlɔwɔ pɔɔn ndanla mbe sa toro, jaŋgo maga ka pye fyɔnwɔ fɔ;

ɛɛn fɔ maa yinrigi faa, pa ma yaa la yaakara taa mbaa tinni.

14Lɔfɔ wi maa gbele na yuun fɔ: «Ki woro ma yɔn! Ki woro ma yɔn!»

Na wiga ka lɔ mbaa kee, wi mɛɛ yo fɔ wì yɛrijɛgɛ ta.

15Tɛ wi ma ta, somu sɔnŋgbanga woo wi lɛgɛrɛ ma ta,

ɛɛn fɔ lere ŋa jɛnmɛ sɛnrɛ maa yinrigi wa wi yɔn, wo yɛn yaraga ŋga ki yɛn sɔnŋgbanga wogo naa ma wɛ to na.

16Na lere wa ka yere letelewe wa fɔgɔ go kala ni, ki fɔ wi derege ki shɔ wi yeri maga tɛgɛ fɔgɔ ki yɔnlɔ;

na wi ka yere nambanŋa wa fɔgɔ go kala ni, yaraga ka shɔ wi yeri maga tɛgɛ fɔgɔ ki yɔnlɔ.

17Suro nda tì ta nambara ni, ti ma tanla wa sɛnwee wi yɔn;

ɛɛn fɔ puŋgo na, ti ma pye paa yɛlɛgɛ yɛn maa yɔn ki yin kanw.

18Kagala ŋgele sɛnwee wì kɔn ma tɛgɛ mbe pye, ke ma pye ma yɔn fili yɛrɛwɛ po fanŋga na;

na ma kaa kee malaga, ma daga mbe jatere pye ma kagala ke na.

19Lere ŋa wi maa lesangara sɛnrɛ yuun, wi ma ŋgundo kagala ke yirige funwa na;

tɔɔn yɛɛ kɔrɔsi lere ŋa wi yɔn ki yɛn forifori wi ni.

20Lere ŋa wi maa to naa wi nɔ pe tifaga,

wi yaa wi yɛɛ yinwege ki yan kila koo paa fitanla yɛn, ŋa wi yaa figi diwi wɔlɔ ni.

21Penjagbɔrɔ nda tì ta fyɛlɛgɛ na wa ki lɛsaga,

puŋgo na duwaw na pye ti ni.

22Maga ka yo fɔ: «Kapege ŋga kì pye na na, mi yaa ki fɔgɔ tɔn.»

Ma jigi wi taga Yawe Yɛnŋɛlɛ li na, pa li yaa ma shɔ.

23Puwakuru ŋa pe ma gbɔn ma piri, wi kala li yɛn ma tijanga Yawe Yɛnŋɛlɛ li yɛgɛ na;

mbe culo wi nambara ki woro ma yɔn.

24Sɛnwee wi yinwege kala pyew li yɛn Yawe Yɛnŋɛlɛ lo kɛɛ;

sɛnwee yinwege ki yɛn na kee laga ŋga na, wi mbe ya mbege jɛn mɛlɛ?

25Lere ŋa wi ma yɔn fɔlɔ kɔn fyɛlɛgɛ na mbe yo wi yaa yaraga ka kan Yawe Yɛnŋɛlɛ li yeri,

ki yɔn fɔlɔ li lɛŋgɔlɔ mbe si jɛn mbaa jatere piin, ki fɔ wi maa yɛɛ le pɛnɛ.

26Wunlunaŋa ŋa wi yɛn kajɛnŋɛ, wi ma lepeele pe pɛ ma pe wɔ wa;

wi ma pe le jɔlɔgɔ, wila pe yinriwɛ ta.

27Sɛnwee wi jatere wo wi yɛn fitanla yanwa mba Yawe Yɛnŋɛlɛ li kan wi yeri,

jaŋgo mbaa wi nawa kagala ŋgele ke yɛn ma jugo ke cancan mbe ke jɛn.

28Kagbaraga konaa mbe pye tagawa ni, ko ki maa wunlunaŋa wi go singi;

kagbaraga pyege ko ki maa wunluwɔ pi kan yeresaga ni.

29Lefɔnmbɔlɔ pe fanŋga ko ki yɛn paa pe fereyaraga yɛn;

lelɛɛlɛ pe yinzifire to ti yɛn pe gbɔgɔwɔ we.

30Gbɔnrɔ sagbanra to ti yɛn kapege pyefɔ wi kapege ki wɛrɛ re;

gbɔnrɔ nda ti ma ye sɛnwee wi ni, ti maa nawa jatere wi kanŋga maa pye kpoyi.