1Na pinambyɔ, na maga yere ma lewee yɛnlɛ wa fɔgɔ kala ni, mbe yo ma yaa ki tɔn,

na maga kɛɛ le lere wa yɛgɛ kɛɛ, mbe yɔn kan wi yeri, mbe yere wi fɔgɔ kala li ni;

2na ma yɔn sɛnrɛ tiga ma yigi wa ki kala li ni,

na ma sɛnyoro tiga ma pɔ;

3na pinambyɔ, ma yaa ki pye yɛgɛ ŋga na mbɔɔn yɛɛ wɔ wa ki kala li ni, koyi ŋga yɛɛn:

Kì kaa pye mɔ̀ɔ yɛɛ le ma lewee yɛnlɛ wi kɛɛ makɔ,

kari wi kɔrɔgɔ, ma sɔɔn yɛɛ tirige wi nɔgɔ, maa yɛnri ŋgbanga.

4Maga kaga yaga wɔnlɔwɔ mbɔɔn yigi,

maga kaga yaga wɔnlɔwɔ pɔɔn yɛngɛlɛ ke tɔn, na ki kala li fa yɛgɛ wɔ.

5Ma yɛɛ shɔ wi yeri paa yɛgɛ ŋga na lufaa ma kaa wi yɛɛ shɔ koniyɛɛn yeri we,

paa yɛgɛ ŋga na sannjɛlɛ ma fegele mali yɛɛ shɔ li yigifɔ yeri we.

6Mboro tiyanŋa, kari ma sa mimbele pe wele;

ma pe tunmbyege ki wele, ma kajɛnmɛ ta.

7To woro pe go na,

tunŋgo welefɔ woro pe go na, yɛgɛfɔ woro pe yeri.

8Ɛɛn fɔ, pe ma pe yaakara ti wulo mari tɛgɛ kanga na;

pe ma pe yaakara ti gbogolo yarilire kɔnsanga ni.

9Mboro tiyanŋa, ma yaa koro mbe sinlɛ fɔ sa gbɔn wagati wiwiin?

Ma yaa ka yɛn mbe yiri wa wɔnlɔwɔ pi na wagati wiwiin?

10Mbe wɔnlɔ jɛnri, mbe wɔnlɔ mbe tigi jɛnri,

mbɔɔn kɛyɛn yi migi yi yɛɛ ni, mbe sinlɛ jɛnri.

11Maga koro ko na, fyɔnwɔ pi yaa ka pan mbɔɔn fo paa yoo ma kaa lere fo we,

jɔlɔgɔ ki yaa pan mbɔɔn fo paa maliŋgbɔɔn beŋganri pyefɔ ma kaa lere fo we†.

12Lejaga ŋgbali, wo ŋa wi woro ma sin,

wi maa yanri na toro yagbogowo sɛnrɛ ti ni wa wi yɔn.

13Wi maa wi yɛngɛlɛ ke gbɔɔnŋgbɔɔn na sɛnrɛ ta yuun,

na para tɔɔrɔ ni,

na kacɛn wa piin wi yombɛgɛlɛ ke ni na sɛnrɛ ta yuun.

14Nambara wi yɛn wa wi kotogo na,

kapege pyewe po wi maa jate sanga pyew,

na leele pe pinri.

15Ki kala na, jɔlɔgɔ ki yaa ka to wi na le yɔngɔlɔ nuŋgba ke ni;

wi yaa ka tɔngɔ mbe wɔ wa yɔnlɔ nuŋgba, wɛrɛ se ka pye ki na.

16Kagala kɔgɔlɔni yɛn wa, ŋgele ke yɛn ma Yawe Yɛnŋɛlɛ li mbɛn;

ke yɛrɛ mbe kɔlɔshyɛn bɔ, ŋgele ke yɛn ma tijanga li yɛgɛ na:

17Lere ŋa wi maa yɛgɛ tungu leele na, yɔn ŋga ki maa finlɛlɛ,

ŋa wi ma lere ŋa wi yɛn jɛrɛgisaga fu wi gbo,

18lere ŋa wi kotogo ki maa kapege gbɛgɛlɛ mbe pye,

lere ŋa wi yɔnlɔ lì wege kapege pyege ki puŋgo na,

19sɛrɛfɔ yagboyoo ŋa wi maa yagbogolo finlɛlɛ,

konaa ŋa wi maa leele pinri pe yɛɛ ni.

20Na pinambyɔ, tɔɔn to wi yɛrɛwɛ sɛnrɛ ti nuru,

maga ka si je ma nɔ wi nagawa sɛnrɛ ti na.

21Ki sɛnrɛ ti gbegele mari tɛgɛ wa ma kotogo na sanga pyew,

mari pye fereyaara wa ma yɔlɔgɔ.

22Na ma kaa tanri, ti yaa lɔɔn yɛgɛ sinni,

na maga sinlɛ, ti yaa lɔɔn go singi,

na maga yɛn mbe yiri, ti yaa la para ma ni.

23Katugu ki yɛrɛwɛ sɛnrɛ ti yɛn paa fitanla yɛn,

ki nagawa sɛnrɛ ti yɛn paa yanwa yɛn,

yɛrɛwɛ mba pi maa taa wa ki korowo pi ni, pi yɛn yinwege konɔ.

24To ti yaa ma shɔ jɛlɛ kalikalifɔ wi yeri,

mbɔɔn shɔ nambannjɔ yɔn tangafɔ wi yeri.

25Maga ka yɛgɛ yirige wi na wa ma kotogo na wi tiyɔnwɔ po kala na,

maga ka ti wi la mbɔɔn ta wi welelɔmɔ po kala na.

26Katugu nanjaa wi ma lere wi kɛɛ yaara ti li mberi kɔ pew, mboo yaga siŋgbele nuŋgba ni kɛɛ;

ɛɛn fɔ japɔrɔwɔ ŋa wi yɛn nandaa, wo ma lere wi yinwege ŋga ki yɛn kagbɔgɔ yɔn ma wɛ yaraga ki ni fuun na ki le jɔlɔgɔ.

27Naga yɛn ma, lere mbe ya mbe kasɔn le wa wi jufa wi ni,

na wi yaripɔrɔ tii sogo le?

28Naga yɛn ma, lere mbe ya tanga naŋganra na, na ti suu tɔɔrɔ ti sogo le?

29Lere ŋa wi ma fili wi lewee yɛnlɛ wi jɔ wi ni, pa ki yɛn ma fun;

lere o lere ka jiri wi lewee yɛnlɛ wi jɔ wi na, wi se koro mbajɔlɔwɔ.

30Yoo ŋa fuŋgo wi yigi, a wì saa yu ma ka fuŋgo ki kala na,

pe se ya mboo tifaga.

31Konaa ki ni fuun, na paga wi yigi, yaraga ŋga wì yu, wi yaa ki yɔngɔ kɔlɔshyɛn sara,

wi yaa wi go yaara ti ni fuun ti kan.

32Lere ŋa ka wa yɛgɛ jɔ ta, wi yɛn tijinliwɛ fu fɔ;

lere ŋa wi maa ko piin, wo yɛn na wi yɛɛ jogo.

33Ki lerefɔ gbɔnrɔ naa fɛrɛ ti yɛn wi woro,

ki fɛrɛ ti se kɔ wi na fyew.

34Katugu yenjara ti ma japɔlɔ wi naŋgbanwa pi yirige fɔ ma toro;

wi kaa jaa mboo kayaŋga ki wɔ pilige ŋga ni, wi se lere yinriwɛ ta.

35Ali maa kan yiŋgi yarikanga ni, wi sege jate;

ali ma yarikanra ti lɛgɛ yɛgɛ o yɛgɛ, wi se yɛnlɛ ti na.