1Korowo pi yɛn ma lere ŋa ndanla, jɛnmɛ pi yɛn maa ndanla fun;

ɛɛn fɔ yɛrɛwɛ sɛnrɛ ti yɛn ma lere ŋa mbɛn, wo yɛn lembige.

2Kajɛŋgɛ pyefɔ wi kala li yɛn ma Yawe Yɛnŋɛlɛ li ndanla;

ɛɛn fɔ ŋa wi maa kapege jatere piin, li yaa ko fɔ wo jɛrɛgi.

3Lere se ya yeresaga ta wi tipewe po fanŋga na;

ɛɛn fɔ lesinŋɛ wi ndire ti se ya kɔlɔgi wa ti yɔnlɔ.

4Jɛlɛ jɛnŋɛ wi yɛn paa wi pɔlɔ wi wunluwɔ njala yɛn;

ɛɛn fɔ ŋa wi maa fɛrɛ waa wi pɔlɔ wi na, wo yɛn paa sagbanpanraga yɛn, ŋga ki maa kajelege ki mugu.

5Lesinŋɛ wi jatere wi ma pye kaselege ko na;

ɛɛn fɔ lepeele poro jatere wo ma pye nambara cɛ.

6Lepee wi yɔn sɛnrɛ ti yɛn paa beŋganri pyefɔ ma kaa lara na singi mbe legbogo pye;

ɛɛn fɔ lesinŋɛ wi yɔn sɛnrɛ ti ma lere shɔ.

7Na lepee wiga tɔngɔ mbe wɔ wa, yaraga kpɛ na koro wi puŋgo na;

ɛɛn fɔ lesinmbele pe yinrɛ ti ma koro wa suyi.

8Pe ma lere wi sɔn wi tijinliwɛ po kala na;

ɛɛn fɔ ŋa wi nawa pì pe wi na leele pe maa wi tifaga.

9Paa ma tifaga mbege ta tunmbyee nuŋgba wi yɛn ma kɛɛ na,

ko mbɔnrɔ maa ma yɛɛ gbogo mbe sigi ta yaakara woro ma yeri ko na.

10Lesinŋɛ wi maa wi yɛɛra yaayoro ti kala yɔngɔ nari kaan yaakara ni;

ɛɛn fɔ lepeele wele, lewɛlɛwɛ kapyere pe maa piin.

11Lere ŋa wi maa wi kɛrɛ ti tunŋgo ki piin, wi ma yaakara lɛgɛrɛ ta;

ɛɛn fɔ ŋa wi maa tɔnli fu kapyere piin, wo yɛn tijinliwɛ fu fɔ.

12Yarijɛndɛ nda ti ma ta nambara wi fanŋga na, to lepeele pe maa yɛgɛ yinrigi ti na;

ɛɛn fɔ lesinmbele pe ma ndire kan fɔ ma pye tɔnli ni.

13Lepee wi yɔn sɛnpere ti ma pye paa pɛnɛ yɛn mboo yigi;

ɛɛn fɔ, lesinŋɛ wi ma shɔ ma wɔ wa kaŋgbanga ki ni.

14Yɔn sɛnyogo jɛŋgɛ ki ma tɔnli kan lere yeri,

ki pyelɔmɔ nuŋgba pi na, lere wi kɛɛ tunŋgo ki sara wo wi ma ta.

15Tijinliwɛ fu fɔ wo yɛgɛ na, wi konɔ li yɛn ma sin;

ɛɛn fɔ lere ŋa wi ma yɛnlɛ yɛrɛwɛ sɛnrɛ na, wo wi yɛn kajɛnŋɛ we.

16Tijinliwɛ fu fɔ wi maa naŋgbanwa pi naga le yɔngɔlɔ nuŋgba ke ni;

ɛɛn fɔ lere ŋa wì jilige wi ma tɛgɛlɛ li kun wi yɛɛ ni.

17Lere ŋa wi maa kaselege yuun, wi ma ŋga ki yɛn ma sin ki yɛgɛ yo;

ɛɛn fɔ sɛrɛfɔ yagboyoo wo maa leele fanla.

18Lere ŋa wi maa para faa, wi sɛnrɛ ti maa sugulo paa tokobi yɛn;

ɛɛn fɔ kajɛnmbɛlɛ pe yɔn sɛnrɛ ti maa kotogo sogowo kaan.

19Yɔn ŋga ki maa kaselege yuun, ki sɛnrɛ ti ma koro wa suyi;

ɛɛn fɔ yɔn ŋga ki maa yagbogowo yuun, ki sɛnrɛ ti mɔnɔ li yɛn mbe yɛnlɛ li gbɔn mbeli yɛngɛ.

20Mbele pe maa kapege pyewe jatere piin, lefanlaga ko ki ma pye wa pe kotogo na;

ɛɛn fɔ mbele pe maa yɛrɛwɛ kaan yɛyinŋge wogo na, pe ma nayinmɛ ta.

21Tipege kpɛ na lesinŋɛ wi ta;

ɛɛn fɔ jɔlɔgɔ ki yɛn lepeele pe wogo.

22Yɔn ŋga ki maa finlɛlɛ ki yɛn ma tijanga Yawe Yɛnŋɛlɛ li yɛgɛ na;

ɛɛn fɔ mbele pe maa tanri kaselege ki na, pe kala li yɛn mali ndanla.

23Lere ŋa wì jilige wi maa jɛnmɛ pi lara;

ɛɛn fɔ kambajɛnŋɛ wi maa wi kambajɛnmɛ pi nari na toro.

24Lere ŋa wi kɛyɛn yì ŋgban tunŋgo ki na, wo wi ma cɛn tegere ti na;

ɛɛn fɔ tiyanŋa wo ma kaa ye pɔrɔtɔya tunŋgo.

25Sɛnwee wi jatere pirindorogo ki maa fanŋga ki kɔ;

ɛɛn fɔ sɛnjɛndɛ ti ma nayinmɛ kan sɛnwee wi yeri.

26Lesinŋɛ wi maa wi lewee yɛnlɛ wi nii konɔ jɛnɛ;

lepee wi tangalɔmɔ pi maa puŋgo.

27Koniyɛɛn tiyanŋa wi se ya kara gbo mbe ta fɔ;

ɛɛn fɔ mbaa tunŋgo piin jɛŋgɛ, tɔnli gbɔɔ yɛn ki ni.

28Yinwege ki ma ta wa kasinŋge konɔ li ni,

kunwɔ woro wa ki konɔ li ni.