1Na ma ka sa cɛn lisaga legbɔɔ wa ni,

lere ŋa wi yɛn ma cɛn ma yɛgɛ sɔgɔwɔ, ta wi kɔrɔsi.

2Na kaa pye ma yɛn mafɛ fɔ,

mɔɔ mafɛ suro lige ki yerege.

3Ma yɛgɛ ka ka yiri wi yaakara tanra ti na,

pe yɛn nari kaan ma yeri nɔɔ lɛlɛ.

4Maga kaa ma yɛɛ tege mbaa penjagbɔrɔ lagajaa,

maga kaa ki wogo ki jate yɛrɛ.

5Ma yɛngɛlɛ kaa tuun penjagbɔrɔ ti na, ti mɛɛ kɔ le teere saw;

ki ma cɛn ndɛɛ ti kanwira kan ti yɛɛ na,

mbe yiri sire na paa yɔn yɛn, mbe kari lege wa naayeri.

6Maga ka yɛnlɛ mbe sa lere ŋa wila ma wele tipege ni wi suro li;

ma yɛgɛ ka ka yiri wi yaakara tanra ti na;

7katugu ŋga ki yɛn wa wi nawa konaa ŋga wi ma yo, ki woro nuŋgba;

wi ma yo fɔ: «Ta nii, ta woo,» mbe sigi ta ki woro na yiin wa wi nawa.

8Ko puŋgo na, siŋgbele na mà li, ma yaa li tuguru;

sɛntanra nda mà yo wi ni, ti yaa yiri waga.

9Maga ka sɛnrɛ yo lembige ki kan,

katugu ki yaa ma tijinliwɛ sɛnrɛ ti tifaga.

10Sinndɛɛrɛ nda pè yerege maga lɛ wa fafafa, ma lara ti kɔngɔlɔ ke gbɔn, maga kari wɔ wa ti yɔngɔlɔ ke ni,

mbe kɛrɛ kɔn mbe ye wa pijiriwele pe lara ti ni;

11katugu pe go shɔfɔ, fanŋga yɛn wi ni;

wi yaa ka yere pe go kala li ni mbe win ma ni.

12Kara ŋa paa kaan ma yeri, ma yɛɛ kan wi yeri ma kotogo ki ni fuun ni,

ma nuŋgbolo jan ma jɛnmɛ sɛnrɛ ti logo!

13Maga ka pyɔ wi yaga mbakorowo,

na ma kaa gbɔn sanwiga ni mboo koro, wi se ku.

14Na ma kaa gbɔn sanwiga ni mboo koro,

ma yaa wi shɔ kunwɔ pi kɛɛ.

15Na pinambyɔ, na kajɛnmɛ ka pye wa ma kotogo na,

pa mi fun mi yaa yɔgɔrimɔ ta wa na kotogo na.

16Na ma kaa kaselege sɛnrɛ yuun,

mi yaa la yɔgɔri wa na nawa.

17Maga kaa yɛgɛ yinrigi kapere pyefɛnnɛ pe na,

ɛɛn fɔ, maa fyɛ Yawe Yɛnŋɛlɛ li yɛgɛ wagati wi ni fuun ni.

18Ki ka pye ma, pa ma goto wi yaa yɔn,

ma jigi tagasaga ki se kɔ.

19Na pinambyɔ mboro wo na, logo na yeri, ma pye kajɛnŋɛ,

mɔɔ jatere wi tɛgɛ kozinnɛ li na.

20Maga ka pye sinwɔɔlɔ pe ni,

nakoma mbele pe wogo yɛn mbaa kara lɛgɛrɛ kaa pe ni;

21katugu sinwɔɔlɔ poro naa sugbɔrɔ lifɛnnɛ pe ni, ki kɔsaga pe ma kaa pye fyɔnwɔ fɛnnɛ;

pe tiyanra ti kala na, pe yaa kaa yaripɔrɔ kɔnrɔkɔnrɔ nii.

22Ta nuru ma to wi yeri, wo ŋa wɔ̀ɔn se we;

maga ka ma nɔ wi tifaga, ali na wi ka ka lɛ.

23Kaselege ki lagaja maga ta, maga ka ti ki shɔ ma yeri;

ma kajɛnmɛ naa nagawa konaa tijinliwɛ pi lagaja, maa ta fun!

24Yɔgɔrimɔ yɛn lesinŋɛ wi to wi woo,

lere ŋa ka pyɔ kajɛnŋɛ se, nayinmɛ yɛn wi woo!

25Ki yaga ma to naa ma nɔ wi ni paa yɔgɔri,

ki yaga ma nɔ ŋa wɔ̀ɔn se wi nayinmɛ ta!

26Na pinambyɔ, ma jigi wi taga na na,

maga yaga na tangalɔmɔ pɔɔn ndanla!

27Katugu nanjaa wi yɛn paa wetijugo yɛn,

jɛlɛ kalikali fɔ wi yɛn paa kɔlɔ yɛn, ŋa wi wele li yɛn ma jori.

28Wi ma lara na singi paa beŋganri pyefɔ yɛn;

wi ma nambala lɛgɛrɛ le kalikalawa pi ni.

29Ambɔ wi ma yo fɔ: «How?» Ambɔ wi ma yo fɔ: «Ew?»

Ambɔ wi maa wiin suyi? Ambɔ wi nawa yɛn ma tanga wi na?

Ambɔ pe maa gbɔɔn go fu naa wɛlɛgi sanga pyew?

Ambɔ yɛngɛlɛ ke yɛn ma yanlaga wi na?

30Mbele pe maa cɛɛn na mɔni wa duvɛn wɔgɔ ki na, poro wɛlɛ;

mbele pe maa duvɛn cɛngɛlɛ ke pinlɛlɛ ke yɛɛ ni naa woo poro wɛlɛ.

31Maga kaa duvɛn wi yɛnwɛ tiyɔnwɔ po wele mbaa yɛgɛ yinrigi wi na,

maga kaa wi ŋgbɔrɔgɔ konaa wi yɛn sooro yɛgɛ ŋga na wa wɔjɛnnɛ li ni ki wele mbaa yɛgɛ yinrigi wi na.

Wi tigiwɛn po yɛn ma tanla wa sɛnwee wi yagbolo lo ni,

32ɛɛn fɔ ki kɔsaga, wi ma kaa ma nɔ paa wɔɔgɔ yɛn;

wi ma kaa ma nɔ paa firisho yɛn.

33Kona ma yɛgɛ ki yaa la kanŋgi maa yaara ta yɛgɛ yaan,

ma jatere wi yaa ma kan maa go fu sɛnrɛ yuun.

34Ma yaa pye paa lere wa yɛn, ŋa wi yɛn ma sinlɛ wa kɔgɔje wi nandogomɔ,

paa lere wa yɛn, ŋa wi yɛn ma sinlɛ wa tiyala na li ma pye tɔnmɔkɔrɔ gbeŋge ki go na li naayeri, a laa fingi wi ni.

35Ma yaa yo fɔ: «Pànla gbɔn, ɛɛn fɔ kii na ya;

pànla faragi, ɛɛn fɔ mi sigi sanga jɛn;

na mi ka ka yɛn, mi yaa sa pa lagaja mbe wɔ naa.»