1Kon inilam hin kakon-anay puntungawan nadan gulding hi mabilid? Ya kon inang-ang muy aton di makawan mun-impa? 2-3Ya kon inilam hin kaatnay bulan da on ahida limmukbub ta muntungo da? 4Indani ya naongal di iimpa da ya nal-ot da mot nangamung dah pangayan da.

5Dahdiy nangiabulut an mumbalin an mailom nadan udum an kabayu? 6Ha-oy ya abuy nangituddu ke didan tumagu nah maahin an lona nah adi maboblayan. 7Midawwi da nadah boble ya adida mabalin an maayum ta mangun-unud da. 8Ya nadah bibilid di kiha-adan da ya panamakan dah kanon da.

9Kon mabalin an ayumon di mailom an bakat mabalin an pungngunuwom weno e miha-ad nah ingkapyam an kiha-adana? 10Kon damanan gakdam di ohat pun-aladuwom? 11Kon damanan idinol muh inlot nan mangingunuh ngunum? 12Ya kon mabalin an idinol mun e mangianamut hi pagem?

13Hanan ostrich ya nakappaspas an mangipayagpag hi payak na. Mu adina kabaelan an appowan di stork an tumayap. 14Hay ostrich ya naala on tinayananay itlug na nah malonat nangamung nan um-ummatung hidi ta maob-oban. 15Adina ikagun kal-ina ya waday mangigatin ke dadiyen itlug nat maphik da weno dadagon di mailom an aggayam. 16Ya takon di nap-a da ya kay na bokon impa dida ya adina ikagu hin mate dadiyen impana. 17Athidiy nangapyak kediyen hamutin maid di nomnom na te uggek indatan hi laing na. 18Mu deket bumtik ya hiyay kalkal-otan ta la-uwanay tagun nuntakkeh kabayu.

19Job, kon he-ay nangidat hi olot nadan kakabayu? Ya kon he-ay nangidat ke didah andukken buuk hi tongod da? 20Kon he-ay nangidat hi kabaelan dan pumaytuk umat hi dudun? Ya kon he-ay nangidat nah gumangoh olong dat panattatakut dah tatagu? 21Deket eda makilaban ya pun-ikum-ot day huki da nah luta. Ya nakakkal-ot dan bumtik. 22Uggeda inilan tumakut ya adida takutan di ispada. 23Munggangoy almas nadan tindalun nuntakken dida ya humili ten naptangan. 24-25Deket gimmangoy tangguyub an hidiyey pangipainilaan dan waday gubat ya bumtik da. Adida dumin-ong. Ya mungkung-i da hin dingngol day gangon di tangguyub. Magibok da bon waday gubat takon di nidawdawi da ya gumayonggong da hin dingngol day mandal nadan opisyal di tindalu te ihik dan makigubat.

26Kon he-a boy nanuttudu nah gawwang an tumayap ta mumpae dah south nah ahi kotolan? 27-28Kon he-ay mummandal nadah tuldu ta tumayap dah natag-en e mangapyah buya da nah tap-on di babatu nadah nakattag-en bibilid? 29Ta mun-uh-uhdung dat matiboy aggayam an dopapon dan kanon da. 30Ne naamung nadan impa dat pungkan da dadiyen naten aggayam.”