1Hinumang bon Job an kananay 2“Mundiklamuwak udot ke Apu Dios te punholhotaponak ke hiyan adiyak homkon. 3-4Gulat nat inilak di kad-ana ya umeyak ta eyak mundiklamu gapu tuh ma-ma-at ke ha-on, 5ta inilaok hin nganney kalyona. 6Kon nin apputonak ke hiya te hiya ke tut-uwa ya nakattag-en abu? Mu adi! Inilak ot donglonay kalyok. 7Te ha-oy ya limpiyuwak ya mabalin an makihummanganak ke hiya. Punna-udok an kalyon an maid di bahul ku.

8-9Uggek inilay kad-an Apu Dios. Takon di daanay ek panamakan ke hiya ya maid hidi. Ya man-u te inilak an wadah Apu Dios, mu adiyak pakatibon hiya. 10Mu hiya ke ya inilanan am-in di at-attok. Kinali deket patnaanak ya tibonan umatak nah namahman balituk.

11Te impaka-un-unud kuy pinhod nan atok ya maid di ek imbahho. 12Inun-unud kun am-in di tuttuduna ya impumbalin kun nakaballol, mu hay makan. 13Muden hiya ke ya atonay pinhod na te hiya ya abuy Dios. Dahdi udot di mabalin an makihanggan hiya weno manannot hi ninomnom nan aton? 14Kinali atonay nganneh diyen implanunan aton ke ha-on. Hiyay ukod hi pumbalinan di biyag ku. 15Kinali makattakutak ke hiya. Ya takon di abunay nomnomok di mipanggep ke hiya ya gumayonggongak hi takut ku. 16-17Impumbalinak ke hiyan makattakut te hiya ya Kabaelanan am-in. Hiya ya abuy takutak bokon nadan ad-adin ma-ma-at ke ha-on an mialig hi tapol.