1Hinumang Job an kananay 2“Adiyak maalubyag ke danaen kinalikali yu. Pahakiton yu ot ya abuy nomnom ku. Oha bo ya dingngol ku tuwali danae handi. 3Kinali, daan mot umop-opya kayu. Nganney problema yu? 4Gulat na damdamat dakayuy munholholtap hi umat tuh ligat ku ya damanan athinay pungkalkallik ke dakayu. Pun-ibaag dakayu ya munwigwigiwigak hi hinangngab yu ten umatak ke dakayu. 5Mu adiyak pe umat ke dakayu. Te gulatna ke pet ha-oy ya hay kaalubyagan yuy kalyok. 6Mu dehtun nanongnan munholholtapak te takon di nganney kalyok hi pundipendal kuh adol ku ya maid di ibaddang na. Ya pamgak ke metlaing di op-opya ya adi maalubyag di punholholtapak.”

7Apu Dios, nganneh tuwen inat mun ha-on? Tipet dinadag muy pamilyak? 8Tibom di inat mun ha-on an numbalin di adol kuh gunit ot mablatan. Hituwe kanuy kitib-anan nakaliwwatak.

9Gapuh boh-ol Apu Dios ke ha-on ya kayak binanik-i te kahingngitanak an abu. 10Taltalanggaanak ya kahingngitanak hi tatagu ta deke on inalibungbunganak on inampingak. 11Hi Apu Dios metlaing di nangiabulut an athituy aton di gaga-ihon tatagu ke ha-on.

12Handi ya malinggop di biyag ku, mu ad uwani ya kayak hinanoplat ke he-a ot ahiyak ipataddog ta panpanaonak. 13Maid di homok Apu Dios ke ha-on. Paddungnay binaal nay pumapanan nunlikkub ke ha-on ot pumpanaak ot muntottod hi lutay dalak. 14Hi Apu Dios ya umat nah tindalun namahig di hingit nan nadandani on liniputanak. 15Dehtuwak an um-umbun hi dap-ul an langgotey bulwatik. 16Ya kimmogakogaak ot deyan immi-ingit di matak. 17Yaden maid di inilak hi numbahulak ya maid di ad-adih indasal ku.

18He-an lutay tistiguk. Adim hophopan nan dalak. Hidiyey mangipainila ke datuwen naat ke ha-on. 19Waday mangitakdog ke ha-on hi langit ya hiyay tistiguk. 20Takon di inwalongak hi gagayyum ku ya wadah Apu Dios an pundasalak. 21Wada kumay mangitakdog ke ha-on ke Apu Dios umat hi pangitakdog di duwan hinggayyum 22te dandanin mapoppog di algok ta mumpaeyak nah kalatan ume nah adinadaman eyak mo mibangngad.