1Ha-oy ya insapatak hi adol kun adik omnawan di babai.

2Hay idat Apu Dios an Kabaelanan am-in hi gun-udon di tagu ya mipuun hi aton da. 3Kinali ipaenay ligat ya nganneh diyen dumadag nadah tatagun mangmangngat hi gaga-iho.

4Hiya ya hahalipat-anan am-in di atok. 5Ot inilanan adiyak humaul ya adiyak tumalam. 6Hiyay nangamung an mangiuh-un maid di bahul ku. 7Deket uggek inun-unud di pinhod na weno inomnawak di tinibok weno inat kuy gaga-iho 8ya takon kattog di madadag di inliyak ku ya kanon di udum an taguy nganneh diyen intanom kun makan.

9Ya kal-ina ket inomnawak di inayan di hinag-on ku ot numanomnomak hi nganney innuk an mangihuyop ke hiya 10ya takon kattog di makiahawah udum an lalaki nan inayak ya takon kattog di ihuyop nay udum an lalaki. 11Himpappangen liwat di e omnawan an ihuyop di bokon inayan ya lebbengnan makastiguy mangat kediye. 12Hin kananat inat kuy athidi ya takon kattog di madadag am-in di wadan ha-on te hidiyen liwat ya paddungnay apuy hi impiernon gobhonan am-in.

13Ya deket waday nihallah inat ku nadah muttatyuk weno uggek hinangud di diklamu da ya 14nganney innuk an makihinnangngab ke Apu Dios? Ya nganney ihumang kun hiya hin munhanhan? 15Hi Apu Dios di nunlutun ha-on ya hiya boy nunlutu nadah muttatyuk.

16Kon uggeyak bimmaddang nadah nawotwot ya kon uggek himmok nadan nabalu? 17Ya kon naka-imutak ot uggek indatan nadan napuh-ig? 18Ha-oy ke ya nipalpu tuwali handih kaungak ya makabbaddangak ke dida. 19Deket wada nadah nawotwot di adi pakagatang hi bulwati da ya idatak 20didah bulwatin nakapyah dutdut di aggayam ku ta adida maktol. Kinali pakatbalonak hi tatagu. 21Deket waday tinalam kuh napuh-ig gapu te ongal di kabaelak 22ya takon kattog di magi-uy taklek ya malahlay pukol ku. 23Kudukdul hidiye mu nan eyak kastiguwon ke Apu Dios mu uggek inat di athidi te tumakutak ke hiya an nakattag-e.

24-25Uggek indinol di pun-an-anlaak hi balituk weno ek impahhiyay kinadangyan ku. 26-27Ya uggek dinayaw di bulan ya algo takon di inang-ang kuy kakinaphod da. Ya uggek ninomnom an idalunun dayawon dida. 28Gulat nat inat kuy athidi ya lebbengnan makastiguwak te inwalong kuh Apu Dios hi langit.

29Uggek bo tinataw-an di buhul ku hin waday immalin ligat ke dida. 30Ya maid di ek nundasalan ke Apu Dios ta mate da. Kon gulat nat inat kuy athidi ya om, an naliwatak. 31Hanadan muttatyuk ya damanan iuh-u dan panganok am-in di dumuttuk hi nunhituwak. 32Ya maid di ohan adik pahigupon, takon di hintaguwan an nalpuh udum an boble. 33Ha-oy ke pe ya adiyak umat hi udum an it-ittalu day liwat da. 34Ya takon di nganney kalyon di tagu mipanggep hi inat ku ya uggeyak timmakut ot uggek impamgay op-opya ya uggeyak nuntalu.

35Gulat na ot anhan ta wada ni-moy ohan huwes an mangngol ke ha-on ya inilaonan makulug datuwen inat ku! Dipendalak di adol ku ya hana ot ta humangonak ke Apu Dios ta kalyonay bahul ku weno itudok na. 36Adiyak tumakut takon di kanan yuy nabahulanak te madinolak an maid di mahamak nadah ipabahul yun ha-on. Aga, nganney ipabahul yun ha-on, kon wada? 37Madinolak an ume ke Apu Dios ta kalyok am-in ke hiya nadan inat ku.

38Deket tinalam ku weno pinlok nan tantanommak an luta, 39ya deket man-un ha-on te makangnganak yaden adi mangan nadan pungngunuwok an nangiliyak nah kanok ta munholholtap da, 40ya takon kattog di hay holok ya pagit di patmolom an bokon hay page.”

Hinaey poppog di kinalin Job.