1Mu ad uwani ya donglom damdamay kalyok ke he-a, Job. 2Nidadaanak an mangalih wadah nomnom ku. 3Ha-oy ya makulug am-in di kalyok. 4Hanan Espiritun Apu Dios an Kabaelanan am-in di nunlutun ha-on ya hiyay nangidat hi biyag ku. 5Aga, idadaan muy ihumang mu, Job, hin kabaelam an humumang ta munhummangan ta.

6Am-in taku ya lutay nakapyaan taku ya nun-iingngo takuh hinangngab Apu Dios. 7Kinali, adika tumakut ke ha-on. Bokon ha-oy nan tagun natag-ey saad nan edaka pakobkobon weno edaka patakuton.

8Hituwey dingngol kun kinalim, Job: 9Kanam di ‘Maid di bahul ku. Maid di inat kuh ad-adi. 10Mu pamgan Apu Dios di pabahul ke ha-on an kayak buhul ke hiya. 11Mialig an binangkilinganay hukik ya halipat-anay kadligak.’

12Mu kalyok ke he-an nihalla ka. Nakattag-eh Apu Dios mu hay tagu. 13Tipet em kanan di adi humangon Apu Dios di diklamun di tagu? 14Takon di kumalikalih Apu Dios hi tatagu ya adida maawatan di kalkalyona. 15Hanah hilong an nahuyop di tatagu ya kumalikalih Apu Dios ke didah in-inop da. 16Hidiyey punwarning na nadah tatagu ta tumakut da. 17Man-uket iathidina ya ta itikod di tagun munliwat ya mumpahhiya, 18ta adi mipae nah boblen di nate. 19Hay pundisiplinan Apu Dios hi tagu ya idattanah namahig an dogo. 20Deket mundogoy tagu ya mama-id di ganas nan mangan. Takon nadan pakappinhod nan kanon ya mumbalin an mumpauta ke hiya. 21Ta loktat ya nakakkuug an numbalin hi gunit ot mablatan. 22Hay athidin tagu ya dandanin ume nah boblen di nate.

23Wada nin an umali on anghel ta itakdog na ya ipanomnom nan Apu Dios an hidiyen tagu ya maphod. 24Ta kal-ina ot ya kanan Apu Dios di ‘Ibukam nan tagu. Adinadaman e ume nah boblen di nate. Dehtuy bayad nat maliblih bahul na.’ 25Ta mumbangngad uppey olot na ya umung-unga. 26Ne deket mundasal hidiyen tagu ya humangon Apu Dios di dasal na. Ya mun-an-anlah Apu Dios an mangabulut ke hiyat mibangngad nan maphod an punhayyupan da. 27Ahina kalyon hi tataguy ‘Naliwatak te adi maphod di inat ku, mu pinakawanak ke Apu Dios. 28Inihwangak ke hiya hi kate ot uggeyak nate ot deyan mun-am-amlongak an nanongnan mataguwak.’

29Indaindat Apu Dios di wayan di tagun 30mihwang hi katen hidiye ot di kastiguna gapuh liwat nat mun-an-anla pay ni-an hi biyag na. 31Pakaddonglom hituwe Job, mahapul an mundongol kan ha-on. 32Mu deket waday pinhod mun kalyon, aga, kalyom ta donglok. Nidadaanak an mangabulut, hin niptok nan kalyom. 33Mu deket adi, op-opya kat mundongol kan ha-on ta ituttuduk di aton an manomnoman hi ustu.”