1-3Indani ya kanan Eliphas an iTeman ke Job di “Maid di ohan nanomnoman ya nalaing an tagun umat ke he-ay pungkalkallina. Abu! Itikod mun kumali nah nalgonalgom an kanalyom te maid metlaing di hilbina. 4Kon adim dayawon ya adim takutan hi Apu Dios? 5Makattiboy kinagaga-ihom nah pungkalkallim. Ipainilam bo udot an lasonam di at-attom. 6Adi mahapul an ek kanan di nabahulan ka. He-a pe ot ipainilam nah pungkalkallim.

7Kon pangalim on he-ay namangulun tagun nitungo? Ya kon wada ka tuwali handih lintun Apu Dios di bibilid? 8Kon wada kan nakidkidngol hi planun Apu Dios? Kon inohhaam di laing? 9Ya kon nganne ni-boy inilam an uggemi inila? 10Hay nun-adalan mih laing mi ya handidan aam-aman nungkaubanan an natnat-ongan da mu hi amam.

11Kon makudang di maulen kalin Apu Dios ke he-a? Nganne pay di hapulom? 12Tipet adim pakannomnomon ta eka bumoh-ol? 13Inwalong muh Apu Dios ta deyan bimmoh-ol kat gaga-ihoy kalyom ke hiya? 14Kon mabalin an waday ohan tagun maphod hi hinangngab Apu Dios? 15Hi Apu Dios ya adi madinol takon hanadah anghel te adida makallinih hinangngab na. 16Ot namam-a moh tagun nakaliwwat an ihiknan aton di gaga-iho.

17Aga, Job, donglom ke tun kalyok an inilak. 18Makulug datuwen intuttudun nadan nalaing ya nanomnoman ke ha-on. Datuwe ya dingngol da damdamah aammod dan 19dida nan nidatan nan boble handih maid pay ni-an di udum an tatagun numbobleh di.

20Hanadan gaga-ihon tatagun paligaton day ibba dan tagu ya munholholtap da inggana mapoppog di biyag da. 21Namahig an takut day makapa ya takon nah malinggop an tiempo ya tumattakut dan kay waday manggop ke dida. 22Adida bo ume nah munhihhilong te tumakut dan kal-ina ya waday mamaten dida. 23Humanawwangan dan e manibotiboh kanon da, mu maid di mahamak da. Ya tumattakut da te inila dan tuwen madadag da. 24Namahig di takut da kediyen ahi maat ke dida umat hi takut da nah patul an umalin mangubat ke dida. 25Athidiy maat nadah tatagun taltalanggaan da ya pakangohayyon dah Apu Dios an Kabaelanan am-in. 26Ihik dan makihanggan hiyan umat da nah tindalun makigubat an nahamad di happiyona.

27Hanadan gaga-ihon tatagu ya matataba da ya kakadangyan da. 28Mu ahida mumboble nadah nataynan ya natoan an boble. 29Ahi mama-id di limmu da ya kinadangyan da. Ya adi mo mihinap di kinadangyana nadah boble.

30Ya adinadaman eda ibtikan di tapottapol an kiha-adan da. Ahida umat nah kaiw an nadadag te ginhob di apuy te hong-aban Apu Dios didat madadag da. 31Adida mo pundinolan nadan kinadangyan dan maid di hilbinah udum hi algo te maid di gun-udon da. 32Ahi gagalan mapoppog di biyag dat maid di hilbin di limmu da. 33Umat da nah bungan di grapes an adi mal-um yaden naplag ya umat boh habung di oliba an nadlu. 34Hanadan gaga-ihon tatagu ya mama-id di holag da ya maghob di bale dan napnuh pinlo ya inako. 35Dida nan mumplanuplanu ya mangmangat hi gaga-iho ya humahhaul da.”