1-4Kanan bon Job di “Isapatak hi ngadan Apu Dios an takon di adi limpiyuy pangat nan ha-on ot punholholtaponak ya adiyak munlangkak ya adik kalyon di gaga-iho ke hiya inggana mapoppog di biyag ku. 5-6Adinadaman ek kanan di niptok kayu. Ihikkad ku udot an maid di numbahulak inggana mapoppog di biyag ku. Te kabigabigat an mihahhaad hi nomnom kun maid di numbahulak.

7Hana ot ta nadan buhul ku ya makastigu dan umat nadah gaga-ihon tatagu. 8Nganney namnamaon nadan adi mangulug ke Apu Dios nah tiempon poppogonay nitaguwan da? 9Kon wada key ligat ya kon ena donglon di pumpahpahmok da? 10Kon damanan makihayyup dan hiya an Apu Dios an Kabaelanan am-in? Ya kon mundasal dan hiya?

11Aga ta ituttuduk ya paka-ieksplikar kun dakayuy mipanggep nah ongal an kabaelan Apu Dios. 12Mu adi gayam mahapul te dakayu ke ya impakattibo yun am-in. Mu tipet maid di hilbinay kanalkalyon yu?

13Athituy pangastigun Apu Dios hi pumate ya gaga-ihon tatagu: 14Takon di dakol di imbabale da ya ahida metlaing mungkakateh gubat weno mate dah inagang. 15Hanadan matdaan ya mate dah dogo ya adi ibaluwan di inayan da dida.

16Man-ut kaddakaddangyan nadan gaga-ihon tatagun dakdakol di silber da ya bulwati da, 17mu loktat ya nadan maphod an tataguy ahi mangibulwatin dadiye. Ya alan nadan limpiyun tatagu dadiyen silber da. 18Hay nunhituwan nadan gaga-ihon tatagu ya adi nahamad, umat nah balen di kakawwa ya umat nah allung an pun-adugan nah payo.

19Man-u nin te kadangyan dad uwanin mahmahhuyop da, mu indanit eda bumangun ya nama-id di kinadangyan dat mumbalin da mon nakawwotwot. 20Umalin diday katatakut an holholtapon da, umat hi umaliyan di puwok nah hilong ya umat nah kalbongan di luta. 21Itayyap di dibdib an malpuh nangappit hi timilan di algo dida ta mama-id da. 22Ilaput dan mangihwang hi adol dan mamtik da mu maid di homok nan puwok. 23Hanan namahig an bungug di puwok ya nan atonan dumadag di umipatakut nadah tatagu yaden mamtik da.