Yawe Yɛnŋɛlɛ li kagbaraga ki yɛn kɔsaga fu
1Yaa Yawe Yɛnŋɛlɛ li sɔnni,
katugu li yɛn ma yɔn,
katugu li kagbaraga ki yɛn kɔsaga fu!
2Yɛnŋɛlɛ na lì wɛ yarisunndo ti ni fuun ti na, yaa li sɔnni,
katugu li kagbaraga ki yɛn kɔsaga fu!
3Lo na li yɛn tafɛnnɛ pe ni fuun Fɔ, yaa li sɔnni,
katugu li kagbaraga ki yɛn kɔsaga fu!
4Lo nuŋgba lo li maa kafɔnŋgɔlɔ tugbɔŋgɔlɔ piin,
katugu li kagbaraga ki yɛn kɔsaga fu!
5Lo lì naayeri wi gbegele tijinliwɛ ni,
katugu li kagbaraga ki yɛn kɔsaga fu!
6Lo lì tara ti gbegele mari tɛgɛ tɔnŋgbɔɔ pi go na,
katugu li kagbaraga ki yɛn kɔsaga fu!
7Lo lì yanwa yirigeyaara tugbɔɔrɔ ti gbegele,
katugu li kagbaraga ki yɛn kɔsaga fu!
8Lo lì yɔnlɔ ki gbegele, jaŋgo ki cɛn pilige ki go na,
katugu li kagbaraga ki yɛn kɔsaga fu;
9ma yeŋge ko naa wɔnŋgɔlɔ ke gbegele, jaŋgo ke cɛn yembinɛ li go na,
katugu li kagbaraga ki yɛn kɔsaga fu!
10Lo làa Ezhipiti tara fɛnnɛ pe pinambiile koŋgbanmbala pe gbo,
katugu li kagbaraga ki yɛn kɔsaga fu!
11Lo làa Izirayɛli woolo pe yirige ma pe wɔ wa Ezhipiti tara,
katugu li kagbaraga ki yɛn kɔsaga fu!
12Làa ki pye li fanŋga ko naa li yawa po ni,
katugu li kagbaraga ki yɛn kɔsaga fu!
13Làa Kɔgɔje yɛɛn wi tɔnmɔ pi kɔn shyɛn,
katugu li kagbaraga ki yɛn kɔsaga fu;
14ma ti a Izirayɛli woolo pè tanga ma kɔgɔje wi kɔn wa wi nandogomɔ ma yiri,
katugu li kagbaraga ki yɛn kɔsaga fu!
15Ɛɛn fɔ làa Farawɔn wo naa wi maliŋgbɔɔnlɔ pe jaanri wa Kɔgɔje yɛɛn wi ni,
katugu li kagbaraga ki yɛn kɔsaga fu!
16Lo làa li woolo pe yɛgɛ sin wa gbinri wi ni,
katugu li kagbaraga ki yɛn kɔsaga fu!
17Lo làa wunlumbolo tugbɔmbɔlɔ tɔngɔ,
katugu li kagbaraga ki yɛn kɔsaga fu!
18Lo làa wunlumbolo fanŋga fɛnnɛ gbo,
katugu li kagbaraga ki yɛn kɔsaga fu!
19Lo làa Amɔri cɛnlɛ woolo pe wunlunaŋa Sihɔn wi gbo,
katugu li kagbaraga ki yɛn kɔsaga fu.
20Lo làa Bazan tara wunlunaŋa Ɔgi wi gbo,
katugu li kagbaraga ki yɛn kɔsaga fu!
21Làa pe tara ti shɔ mari kan li woolo pe yeri kɔrɔgɔ,
katugu li kagbaraga ki yɛn kɔsaga fu!
22Làa ti kan Izirayɛli woolo, li tunmbyeele pe yeri kɔrɔgɔ,
katugu li kagbaraga ki yɛn kɔsaga fu!
23Lo làa jatere pye we na sanga ŋa ni wàa pye wa we jɔlɔgɔ ki ni,
katugu li kagbaraga ki yɛn kɔsaga fu!
24Lo làa we shɔ we jɔlɔfɛnnɛ pe kɛɛ,
katugu li kagbaraga ki yɛn kɔsaga fu!
25Lo li maa yaakara kaan yaara nda fuun tì da ti yeri,
katugu li kagbaraga ki yɛn kɔsaga fu!
26Yaa Yɛnŋɛlɛ na wa naayeri li sɔnni,
katugu li kagbaraga ki yɛn kɔsaga fu!