Mbe Yɛnŋɛlɛ li yɛnri li duwaw wunlunaŋa wi na
1Wunlunaŋa Salomɔ wi yurugo.
E, Yɛnŋɛlɛ, wunlunaŋa wi naga ma kiti kɔnlɔmɔ pi ni,
ma kasinŋge jatere wi kan wunlunaŋa pinambyɔ wi yeri!
2Ki ka pye ma, wi yaa la kiti wi kɔɔn ma woolo pe na kasinŋge ni,
mbaa ma woolo mbele pe yɛn tege na pe kiti wi kɔɔn mbe yala kaselege ki ni.
3Yanwira ti yaa ka pan yɛyinŋge ni leele pe kan,
tinndiye fun pe yaa ka pan yɛyinŋge ni leele pe kan kasinŋge ki fanŋga na.
4Wi woolo pe ni, mbele pe yɛn fyɔnwɔ fɛnnɛ, wi yaa ka pe tanga ki kan pe yeri,
mbe mbele pe yɛn tege na pe shɔ,
mbe mbele pe yɛn na pe jɔlɔ pe tɔngɔ.
5Kona mbe yɔnlɔ konaa yeŋge ki ni ti ta ti yɛn na yinrigi fɔ mbe sa dunruya wi kɔ,
leele pe yaa la fyɛ ma yɛgɛ fɔ sanga pyew.
6Wunlunaŋa wi yaa pye paa tisaga yɛn, ŋga ki ma pan yariluguro yirifɔnndɔ na,
paa tisafoŋgo yɛn, ŋga ki ma tara ti yinŋgi jɛŋgɛ.
7Kasinŋge ki yaa fanŋga ta wi wunluwɔ sanga wi ni,
mbe yeŋge ki ta ki yɛn na yinrigi fɔ sa dunruya wi kɔ, yarijɛndɛ ti yaa la lege mbaa kee yɛgɛ.
8Wi yaa ka cɛn tara ti ni fuun ti go na,
mbege lɛ Efirati gbaan wi na fɔ sa gbɔn wa tara ti kɔsaga ki na.
9Mbele pe yɛn ma cɛn wa gbinri wi ni, pe yaa kaa kanŋguuro kanni wi yɛgɛ sɔgɔwɔ mbaa wi gbogo,
wi juguye pe yaa kaa taambugɔ ki mugu (mbege naga fɔ wì ya pe ni).
10Tarisisi tara wunlumbolo konaa lɔgɔ furo nda wa kɔgɔje wi ni wa lege, ti wunlumbolo pe yaa kaa paan mbaa boyan yaara kaan wi yeri;
Saba tara wunlumbolo naa Seba tara wunlumbolo pe yaa kaa paan yarikanra ni wi kan.
11Wunlumbolo pe ni fuun pe yaa ka pan mbaa fɔli wi yɛgɛ sɔgɔwɔ mbaa wi gbogo,
cɛngɛlɛ ke ni fuun ke yaa ka go sogo mboo kan.
12Katugu mbele pe yɛn tege na, na gbele naa yinri wi pe saga, wi yaa ka pe shɔ,
mbe fyɔnwɔ fɛnnɛ mbele sagafɔ woro pe na pe shɔ.
13Wi yaa ka fanŋgɔgɔ fɛnnɛ poro naa mbele pe yɛn tege na pe yinriwɛ ta;
wi yaa ka fyɔnwɔ fɛnnɛ pe go shɔ.
14Wi yaa ka pe shɔ pe jɔlɔfɛnnɛ poro naa lewɛlimbɛlɛ pe kɛɛ,
katugu pe yinwege wogo ki yɛn ma gbɔgɔ wi yeri fɔ jɛŋgɛ.
15Yɛnŋɛlɛ sa yinwetɔnlɔgɔ kan wunlunaŋa wi yeri!
Leele mbaa yinrigi tɛ ni wa Saba tara, paa paan wi ni wi kan!
Leele mbaa Yɛnŋɛlɛ li yɛnri wi kan sanga pyew,
mbaa duwaw piin wi kan pilige pyew!
16Yɛnŋɛlɛ sa ti yarilire tila yɔngɔ jɛŋgɛ wa tara ti ni,
yarilire sheshere mbe pye fɔ wa yanwira ti go na mbaa fige,
ti yɔn paa yɛgɛ ŋga na tire ti ma kaa fyɛnwɛ wa Liban tara yanwira ti na we.
Leele pe lɛgɛ wa cara ti ni, paa yɛgɛ ŋga na yan ki yɛn wa wasege ki ni!
17Yɛnŋɛlɛ sa ti wi mɛgɛ ki koro wa fɔ sanga pyew;
wi mɛgɛ ki ka ka kɔ paa yɛgɛ ŋga na yɔnlɔ ki yɛn wa suyi.
Leele paa duwaw piin pe yɛɛ kan wi mɛgɛ ki ni;
cɛngɛlɛ kaa ki yuun fɔ wi yɛn fɛrɛwɛ na!
18Sɔnmɔ yɛn Yawe Yɛnŋɛlɛ, Yɛnŋɛlɛ le, Izirayɛli woolo Yɛnŋɛlɛ li woo,
lo nuŋgba pe, lo li maa kagbɔgɔlɔ piin!
19Yɛnŋɛlɛ na gbɔgɔwɔ wolo, sɔnmɔ yɛn li woo fɔ sanga pyew!
Li gbɔgɔwɔ yanwa pi tara ti lagapyew ki yin!
Anmiina! Anmiina!
20Zhese pinambyɔ Davidi wi Yɛnŋɛlɛ yɛnrɛwɛ sɛnrɛ pa tì kɔ lagamɛ.