Yawe Yɛnŋɛlɛ, ma pye na winfɛnnɛ pe winfɔ,

mbele pe yɛn na malaga gbɔɔn na ni, maa malaga gbɔɔn pe ni!

2Ma tugurɔn sigeyaraga jɛgɛ ki lɛ konaa ma tugurɔn sigeyaraga gbegbeŋge ki ni,

ma yiri ma pan mala saga malaga ki na!

3Sɔgbɔ wo naa njanraga ki ni, ti yirige na jɔlɔfɛnnɛ pe na;

maga yo na kan fɔ mboro ma yɛn na shɔfɔ we!

4Mbele paa jaa mbanla gbo, ma ti pe fɛrɛ shɔ konaa pe go sogo!

Mbele paa kapege jate na ni, ma ti pe sɔngɔrɔ puŋgo, fɛrɛ mbe pe yigi!

5Pe pye paa yan waga yɛn, ŋga tifɛlɛgɛ ki maga lɛ ma kari ki ni;

Yawe Yɛnŋɛlɛ li mɛrɛgɛ wi taga pe na wila pe puro!

6Diwi mbe ye wa pe konɔ li ni konaa laa wɔnri;

Yawe Yɛnŋɛlɛ li mɛrɛgɛ wila pe puro!

7Pè baga na na go fu, ma titɛgɛ kɔn, ma mɛrɛ jan ki na, na mɛgɛ ni;

pè titɛgɛ wɔ go fu, jaŋgo mbe to wa ki ni.

8Ki daga jɔlɔgɔ mbe fo ki to pe na, ŋga pee cɛn ki cɛnwɛ;

ki mɛrɛ ti pe yigi mbe pe tɔngɔ!

9Mi wo na, mi yaa kaa yɔgɔri Yawe Yɛnŋɛlɛ li fanŋga na;

mi yaa kaa nayinmɛ nii li shɔwɔ mba lìlan shɔ pi kala.

10Mi yaa kaa ki yuun na nawa pi ni fuun ni fɔ:

«Yawe Yɛnŋɛlɛ, ambɔ wi yɛn fanŋga ni paa ma yɛn?

Mboro ma ma fyɔnwɔ fɔ wi shɔ wi winfɛnnɛ mbele pe fanŋga kì wɛ wi na pe kɛɛ;

ma ma fyɔnwɔ fɔ wo naa ŋa wi yɛn tege na pe shɔ mbele pe yɛn na nii pe go na pe kɛɛ.»

11Sɛrɛfɛnnɛ yagboyoolo pèle yiri na kɔrɔgɔ;

pe yɛn nala yewe kagala ŋgele mii jɛn ke wogo na.

12Kajɛŋgɛ ŋga mì pye, pe maga fɔgɔ tɔn kapege ni;

leele pe je na na.

13Ma si yala, mi wo na, sanga ŋa ni pàa pye na yaa, mi ma jatere piriwɛn yaripɔrɔ le pe wogo na;

mi mala yɛɛ tirige ma yeŋge le,

mi ma koro na yɛnri pe kan suyi.

14Mìla pye naga piin, paa yɛgɛ ŋga na ma wɔnlɔ nakoma ma nɔsepyɔ kala ma pye;

na jatere wìla piri na na, a mì yɛgɛ san na toro shɔɔn, paa yɛgɛ ŋga na lere nɔ ma kaa ku we.

15Ɛɛn fɔ na jɔlɔgɔ ka to na na, pe ma saa pe yɛɛ gbogolo na yɔgɔri;

pe ma saa pe yɛɛ gbogolo mbe yiri na kɔrɔgɔ, mila pye ki jɛnmɛ;

pe maa gbele na na sanga pyew.

16Na pe kanla yan mì kurugo, pe maa tɛgɛ na na fɔ jɛŋgɛ,

fɔ na pe ŋgangala ke kaa nala fingiri.

17E, Yawe Yɛnŋɛlɛ, ma yaa pyeri laga kala li wele fɔ sa gbɔn wagati wi wiin?

Na go shɔ ki jɔgɔwɔ pyefɛnnɛ pe kɛɛ;

na shɔ ki jaraye pe kɛɛ!

18Kona, mi yaa kaa sharaga kaan ma yeri wa janwa gbɔlɔ li sɔgɔwɔ;

mi yaa kaa ma sɔnni wa lelɛgɛrɛ ti sɔgɔwɔ.

19Mbele pe yɛn nala wiin go fu, maga ka ti paa tɛgɛ na na!

Mbele pànla panra go fu, maga ka ti paa yɛngɛlɛ kɔɔn na na mbaa na tegele!

20Katugu paa la yɛyinŋge sɛnrɛ yuun fyew,

mbele pe yɛn ma cɛn pɔw laga tara ti ni, pe yɛn na lesangara sɛnrɛ yuun pe mɛgɛ ni.

21Pe yɛn na yɔngbɔgɔ yuun na na, na yuun fɔ:

«Ɛnhɛɛn cɔ, wòo yan gbɔgɔyi we yɛngɛlɛ ke ni.»

22Ee, Yawe Yɛnŋɛlɛ, ŋga kì pye màga yan, maga ka pyeri pe na;

maga ka ma yɛɛ laga lali na ni Yawe Yɛnŋɛlɛ!

23Yɛn ma yiri, yiri ma pan mala tanga ki kan na yeri,

na Yɛnŋɛlɛ, na Tafɔ, yere na kala li ni!

24Yawe Yɛnŋɛlɛ, na Yɛnŋɛlɛ, na kiti wi kɔn ma yala ma yɛn sinŋɛ yɛgɛ ŋga na ki ni,

jaŋgo paga kaa yɔgɔri na kala na!

25Paga kaa ki yuun mbe yo fɔ: «Ɛnhɛɛn, ŋga wàa pye na jaa koyi ŋga yɛɛn.»

Paga kaa ki yuun mbe yo fɔ: «Wòo jɔgɔ pew!»

26Mbele fuun pe yɛn na yɔgɔri na jɔlɔgɔ ki kala na, fɛrɛ mbe pe yigi, pe go sogo;

mbele pè yiri na kɔrɔgɔ, pe fɛrɛ shɔ, pe go sogo!

27Ɛɛn fɔ mbele paa ki jaa mbege yan fɔ mi yɛn jɛrɛgisaga fu,

poro mbaa jɔrɔgi nayinmɛ ni paa yɔgɔri;

pe yaa koro mbaa ki yuun suyi fɔ:

«Yawe Yɛnŋɛlɛ, Yɛnŋɛlɛ le, li yɛn ma gbɔgɔ,

lo na li maa ki jaa li tunmbyee wi pye yɛyinŋge na we!»

28Kona Yawe Yɛnŋɛlɛ, ma yɛn sinŋɛ yɛgɛ ŋga na, mi yaa la ki wogo ki yɛgɛ yuun,

mbaa ma sɔnni sanga pyew.