Yɛnŋɛlɛ lo li ma sɛnwee wi shɔ
1Yurukɔɔlɔ to wi sɛwɛ yurugo. Pe maa ki koo yurugo ŋga kɔlɔmɔ na, pe maa ki yinri «Masho pɔlɔ yarifyɛɛnrɛ.» Davidi Yɛnŋɛlɛ gbɔgɔyurugo.
2E, Yɛnŋɛlɛ na shɔ,
katugu tɔnmɔ pìlan li ma gbɔn fɔ wa na yɔlɔgɔ.
3Mì tigi wa fɛnrɛgɛ ki ni fɔ wa nɔgɔna,
mi si yeresaga ta na yɛɛ na.
Mì tigi wa tɔnmɔ pi latijugo ki ni,
tɔnmɔ mba pi yɛn na fuun pìlan li.
4Mi yɛn na gbele na sagawa jaa, fɔ a na magala lì wɔ;
mi yɛn na Yɛnŋɛlɛ li wele konɔ, fɔ a na yɛngɛlɛ ke saa te welege ki na.
5Leele mbele pànla panra go fu pè lɛgɛ ma wɛ na yinzire ti na,
mbele paa ki jaa mbanla gbo, pe fanŋga kì gbɔgɔ;
pe yɛn na baga na na wi.
Mii yaraga ŋga lɛ, pe ma yo mbe ko yɔngɔ kan.
6E, Yɛnŋɛlɛ, màla kambajɛnmɛ pi jɛn,
na kajɔgɔrɔ ti woro ma lara ma na.
7 We Fɔ, Yawe Yɛnŋɛlɛ, mboro ŋa yawa pi ni fuun fɔ,
mbele pè pe jigi wi taga ma na, maga ka ti pe fɛrɛ shɔ na kala na!
Izirayɛli woolo Yɛnŋɛlɛ,
mbele pe yɛn nɔɔ lagajaa, maga ka ti pe fɛrɛ shɔ na kala na!
8Katugu mboro kala na, pe yɛn nala tegele, mìgi kun na yɛɛ ni;
mboro kala na, fɛrɛ tìlan go sogo.
9Mì pye nambanŋa na sefɛnnɛ pe yeri,
mì pye cɛnlɛ la yɛgɛ woo na nɔsepiile pe yɛgɛ na.
10Ma go ki yɛn mala ndanla ndanlawa mba ni, pi yɛn paa kasɔn yɛn nala sori wa na kotogo na;
mbele pe yɛn nɔɔ tegele, pe tɛgɛlɛ lì to na na.
11Mi mala yɛɛ tirige ma yeŋge le,
ko maga kan pe maa na tegele.
12Na mi ka jatere piriwɛn yaripɔrɔ le,
pe mala mɛgɛ ki lɛ maga le yomiyɛlɛ.
13Mbele pe maa cɛɛn wa ca ki mbogo yeyɔngɔ ki na, pe maa baro piin nala sanga,
sinwɔɔlɔ pànla mɛgɛ ki le yurugo.
14Ɛɛn fɔ Yawe Yɛnŋɛlɛ, mboro mi yɛn na yɛnri;
wagati ŋa wo wì yala mɔɔ kagbaraga ki pye.
E, Yɛnŋɛlɛ, ma kagbaraga kì gbɔgɔ, ki kala na, na yɔn sogo;
na shɔ mbe yala ma yɛn sɛnrɛ nuŋgba yofɔ yɛgɛ ŋga na ki ni!
15Na tile mala wɔ wa fɛnrɛgɛ ki ni, jaŋgo mi ka ka liwi wa ki ni naa,
na shɔ na panrafɛnnɛ pe kɛɛ;
na tile mala shɔ tɔnŋgbɔɔ pi yeri!
16Maga ka ti tɔnmɔ mba pila fuun pi kari na ni,
maga ka ti tɔnmɔ pi latijugo kilan li,
maga ka ti fanga kilan yɔn tɔn.
17Yawe Yɛnŋɛlɛ, na yɔn sogo, katugu ma kagbaraga ki yɛn ma yɔn;
ma yinriwɛ tawa gbɔɔ pi kala na, ki yaga ma kanŋga ma yɛgɛ wa na yeri mala saga!
18Mi ŋa ma tunmbyee, maga ka puŋgo wa na yeri!
Tege yɛn na na, ki yaga mala yɔn sogo fyaw!
19Fulo na tanla mala go shɔ,
pan mala shɔ na juguye pe kɛɛ!
20Pànla tifaga, ma fɛrɛ ti wa na na konaa mala go sogo yɛgɛ ŋga na, màga jɛn;
ma yɛgɛ yɛn na winfɛnnɛ pe ni fuun pe na.
21Tɛgɛlɛ na paa na tegele, lìlan nawa pi tanga na na fɔ mala pye yaŋa;
mìla pye naga sɔnri ndɛɛ lere wa yaa na yinriwɛ ta, ɛɛn fɔ lere sila na yinriwɛ ta;
mìla pye naga sɔnri ndɛɛ lere wa yaa ta mbanla kotogo ki sogo na na, ɛɛn fɔ lere sila ta.
22Pè shɔnrɔ le wa na yaakara ti ni,
wɔgɔ la pye na na, a pànla kan duvɛn tangara ni mbe wɔ.
23Yɛnŋɛlɛ sa ti pe liwɛn pi pye paa pɛnɛ yɛn wa pe yɛgɛ,
pe fɛrɛwɛ pi pye paa mɛrɛ yɛn mbe pe yigi.
24Pe yɛngɛlɛ ke wɔ pe na binriw paga kaa yaan naa,
pe sɛnŋgɛlɛ ke kurukuru pe na fɔ sanga pyew!
25Ma ti naŋgbanwa gbɔɔ mbe pye ma ni pe ni,
ma naŋgbanwa ndorogo ki gbɔn pe na!
26Ma ti pe cɛnsara ti jɔgɔ ti wɔ wa pew,
lere kpɛ ka ka cɛn wa pe paara yinrɛ ti ni naa!
27Katugu mboro jate mà jɔlɔgɔ wa lere ŋa na makɔ, pe maa wi jɔlɔgɔ ki seregi wi na naa;
lere ŋa ma kɛɛ kì gbɔn wi na, wi jɔlɔgɔ ko sɛnrɛ pe maa yari na toro.
28Pe kajɔgɔrɔ ti ni fuun ti taga pe go na,
maga ka pe yigi paa lesinmbele yɛn!
29Pe mɛrɛ ti gbo mari wɔ wa yinwege sɛwɛ wi ni,
maga kaa pe jate mbe pe pinlɛ lesinmbele pe ni.
30Mi wo na, mi yɛn fyɔnwɔ fɔ na jɔlɔ,
e, Yɛnŋɛlɛ, na shɔ mala yirige!
31Mi yaa la yuuro koo mbaa Yɛnŋɛlɛ li sɔnni,
mi yaa la li gbogo mbaa li shari.
32Paa ma sɔnni Yawe Yɛnŋɛlɛ, ko yɛn mɔɔ ndanla ma wɛ pe nɛgɛ wɔ ma yeri saraga ko na;
konaa ma wɛ napɔlɔ ŋa wì yɛnŋgɛlɛ yiri ma pye yenjoro ni wi na.
33Leele mbele pè pe yɛɛ tirige, pe yaa ki wogo ki yan mbaa yɔgɔri;
yoro mbele ye yɛn na Yɛnŋɛlɛ li lagajaa, Yɛnŋɛlɛ sa yinwetɔnlɔgɔ kan ye yeri!
34Katugu Yawe Yɛnŋɛlɛ li maa nuru fyɔnwɔ fɛnnɛ pe yeri,
li woolo mbele kasopiile li se pe tifaga.
35Naayeri wo naa tara ti ni, ti daga mbaa li sɔnni,
kɔgɔje wo naa wi nawa yaara ti ni fuun ti daga mbaa li sɔnni!
36Katugu Yɛnŋɛlɛ li yaa Siyɔn ca ki shɔ,
li yaa ti pe Zhuda tara cara ti kan naa fɔnŋgɔ,
li woolo pe yaa ka cɛn wa ti ni naa, mberi pye pe woro.
37Li tunmbyeele pe setirige piile pe yaa ka ki tara ti ta pe kɔrɔgɔ,
li yɛn ma leele mbele ndanla, ti yaa ka pye pe cɛnsaga.