1Reiso sio Ismael noa upu orori Yusup poe otoe Mesir oaheniki osi Potifar rei. 2Ne Anahatana ikata runa Yusup reiso ne pakarian pusire raeu iake. Iahesa tau sae isa tewa. Iruei poe upui ne numa. Upui, reimo Potifar. 3Potifar ianei ata Anahatana ikata runa Yusup. Ianei ata Anahatana iakahaiki na ne pakarian raeu iake. 4Potifar anoi iake tau Yusup reiso ihitiki tau hanai wanane. Irui kawasa osiki na isaka ne numa hutae pusiki. Isaka ne sae man. 5Ihitiki oyo Anahatana irui iake osi Potifar ne numa hutae. Irui iake osi ne sae man. Masike mai numa runa noi ne nisiu iae, irui iake osiki. Yusup tutui reiso Anahatana irui iake osi Potifar. 6Potifar iparisaa tau Yusup reiso irui kawasa osiki na isaka ne sae man. Reiso Potifar anoi erenoa runa sae isa tewa nea. Anoi erenoa runa ne muaine man.

Yusup mo, ia hehu iake. Ne patane maka-makae. 7Reiso taue isa, Potifar sahai iasu-asumata Yusup. Oyo iasau osiki, “Mai na uata ineketa.”

8Ne Yusup ipenei inekei runai. Iahata, “Au upeneku. Upuku Potifar iparisaa tanuku tau ne sae man. Anoi erenoa runa sae isa mai numa anoe reini tewa nea. 9Mai numa reini mo, we kawasa mainae. Sani upuku Potifar oi. Iparisaa pusire osiku nea. Hasae ano sahoro tewa. Sapan na nanie una kahatene san rei na upalalosa tau Anahatana?”

10Masike san rei iae, Potifar sahai iapamanui iae, ne ipenei ineke ikatai. Iapamanui sui osa, ne ipenei sirinia.

11Tau ranie hatae isa Yusup inusui pan numa anoe nanie ipakarian. Ia osa-sa man nooi pan numa anoe rei tewa. Numa rei huie nai osa. 12Potifar sahai inesa tau ne papite iasau iahata, “Mai na uata ineketa.”

Ne ikoka ruai oyo ikasu heu ruai. Ikasu heu ruai oyo irumai. Ne, ne papite wamo ia pina rei ikatai. 13Ia pina rei inoo ata Yusup irumai ne, ne papite wani hanai atue 14reiso ioi iakapona sio numa anoe rei. Ioiso oyo iasau iahata, “Masi onoo. Ia Ibrani rei wain sahaku iroriki mai numa reini iakarotata. Inusui pan we kakaranae anoe nanie ineke runaku. Ne uakapona kuati. 15Iatinu au uakapona kuati oyo irumai, ne iarihoni ne papite mai nusuku.”

16Reiso Potifar sahai ikata Yusup ne papite rei erenapa sahai inuniki. 17Sahai inuniki samatoro isima nahu Yusup osiki. Iahata, “Ia Ibrani wain aroriki mai rei, reimo inusui mai re kakaranae nanie ineke runaku. 18Ne uakapona runai reiso irumai iarihoni ne papite mai nusuku.”

19Iatinu san rei oyo anoi eresaa mainae. 20Reiso iaisosi ne makahaia na onota Yusup na onusui pan pui anoe. Pui wani sio osaka ia aia ne maresia tanui. Reiso onusui pan pui anoe.

21Ne Anahatana ikata runa Yusup. Anoi runai rotu-tu ia pui upue rei ne sukai. 22Reiso ia pui upue rei irui Yusup isaka sio aia ne maresia rei. 23Ia pui upue rei isaka sio maresia tewa nea. Tewa mo, irui Yusup isakaso nea. Anahatana ikata runai reiso ne pakarian pusire iake. Mahesae tanui tewa.