Kain ihunu wanin
1Adam inekei ikata sahai Hawa oyo tinain taua. Anai iamrae, ia hanaie. Iamrae poe, Hawa iahata, “Anahatana iakahaiku reiso ususu we ia iki hanaie.” Reiso ihete nanai tau Kain. Nene manariti, “Ususu.” 2Ita ia iki muie isa iamrae honu. Nanai Habel. Uaso sio mainaya, oyo Kain isaka irahu nisi. Ne Habel mo, isaka rompau runa une-uneu.
3Ereeu mai, taue isa Kain inana atuhu oyo iruire osi Anahatana. 4Habel iae san rei oi. Ne ia mo, irui rompau. Rompau anaya manaoneta. Irui nene minaya. Reiso Anahatana ikaumin runa Habel irui rompau nene minaya rai. 5Ne Kain mo, ipenei iararumai runa ne atuhu rai. Reiso Kain anoi eresaa hunu ruai rotu-tu uai anoe remtukui.
6Reiso Anahatana iasau osi Kain. Iahata, “Amuna na anom eresaa rei? Na uamu anoe remtukui rei? 7Sani auna iake, mka uamu anoi kaie. Mka anoku iake runaya. Ne sani auna kahatene mo, ainati. Rosa wani rekaohua haineke nea. Ano nanie apalalosa. Ne kahurae apamese anom.”
8Nene taue isa Kain iasau osi wanin san rei. Iahata, “Mai, na uata ieuta na ria nisi.”
Hokaso ria nisi, oyo Kain ihunu wanin. 9Reiso Anahatana iasei tau Kain, “Wanimu Habel wainpa?”
Iahata, “Mpanei. Ia seia ianeiki? Au usaka waniku?”
10Iahata, “Amuna na auna kahatene san rei? Wanimu ne nasini wani reasei nea. 11Au nanie urui kahatene osia, reiso wani uneia arihoni tuamane reini. Tuamane wani ereninu wanim ne nasini rei. Tau ahunu wanim, tuamane rei ereninu ne nasini. Reiso nanie uapasanaya. 12Sani nanie arahua mka atuhu isia tewa. Mka aeu ahori-horia asupu nainiamu manisate isa tewa mai tuniai reini.”
13Iahata, “Upu. Ira oe! Mka umataku tea! Apasanaku mainae san rei mana mo, ukua tewa! 14Aneiku arihoni tuamane reini. Aneiku arihoni uamu anoe. Mka uhori-horiku, usupu naniaku mai tuniai reini tewa. Reiso sani ia isa isupuku mka ihunuku.”
15Iahata, “Tewa. Sani ia isa ihunua, mka ia rei, uapasanai mainae rotu-tu nai itu.” Oyo Anahatana iakakinai na sio umau osupui pene ohunui. 16Oyo ieui iarihoni Anahatana uai anoe. Iruei pan tuama Nod pan napi ranie mata eresaa, pan Eden on pan hae.
Kain nea upu nea momou
17Kain iausahai, oyo sahai uaso osusu no ia iki hanaie isa nanai Henokh. Iamrae poe, Kain wain iapuoo niane isa reiso ihete niane nanae tau Henokh erepusu anai hanaie. 18Ita Henokh iausahai, isusu anai hanaie isa wain nanai Irad. Ita Irad iausahai, isusu anai hanaie wain nanai Mehuyael. Ita Mehuyael iausahai, isusu anai hanaie wain nanai Metusael. Ita Metusael iausahai, isusu anai hanaie wain nanai Lamekh. 19Lamekh inana ne pinau ua. Ia isa nanai Ada. Ia isa honu nanai Sila. 20Ada isusu Yabal. Ia sahoro nea upu nea momou oapiara makapanau. Orueso tau numau waron onanare arihoni makapana unta. 21Yabal wanin nanai Yubal. Ia sahoro nea upu momou oaise sae isa wani nooi sani gitar runa oauhona suling. 22Lamekh sahai muie Sila isusu Tubal-Kain. Ia sahoro nea upu momou otuka alatiu arihoni tampaka runa mamono. Tubal-Kain hotai nanai Naama.
23Lamekh iasau osi ne pinau uaso, irui ruai roe uae. Iahata,
“Ada runa Sila uamo. Saka ono-noo au.
Sani ia honue isa nanie ihitaku mo, mka uhunui.
24Sani ia isa ihunu Kain, Anahatana iapasanai mainae nai itu.
Mka sani ia isa ihunu au mo,
Anahatana iapasanai mainae nai osa, nai hutu itu rahana itu.”
Set iamrae
25Adam inekei ikata sahai honu. Oyo isusu anai hanaie isa honu. Anai hanaie rei nanai Set. Inai iahata, “Anahatana irui anaku hanaie isa honu ikati Habel wain kakai ihunui.” Set nene manariti, “Irui.” 26Set iausahai oyo isusu anai hanaie isa nanai Enos. Tau muie rei samatoro mansiau oainisi oainaa runa Anahatana.