1-3Abram iruei mai otoe Kanaan ne musum hutusa nea. Ne sahai, Sarai mo, isusu tewasi. Tau rei ne ia pina makahaie isa iruei ikataso. Ia makahaie rei, ia pina Mesir. Nanai Hagar. Ia makahaie rei ia pina hehuke asi. Reiso Sarai iasau osi sahai, “Anahatana iruiku ususu tewa. Reiso nene iake mo, anana re makahaie reini tau saham. Na hitio isusu osiku.”

Oyo Abram iamanaku. Sani rei oyo, Sarai irui Hagar osi Abram tau sahai muie. 4Reiso Abram inanai. Inanai oyo, sahai muie rei tinain taua. Ne sahai muie rei ianei ata tinain taua, reiso inana hatia tau Sarai. Iunai iake tewa.

5Oyo Sarai iasau osi sahai, “Urui Hagar, re makahaie rei osia tau saham nea. Ne ianei ata tinain taua oyo, iunaku iake tewa. Ano sahoro asana. Ne napa sahoro Anahatana inoo uata re isanae reini, na iarinii ia seia sahoro ne manisate runa ia seia sahoro isana.”

6Iahata, “Me makahaie rei, tea. Reiso ruam auna sae man tanui. Ano me kawasa tanui. Aunai pusu ruam me maue man nea, tea.”

Oyo Sarai ne hau tanui sui osa. Reiso rotu-tu Hagar irumai.

7Irumai oyo sira tau Anahatana iatuhete ruai osiki nooi sani Anahatana ne maisosie on roe noiyaha. Iatuhete ruai osiki haineke wae huhune poe arena nusue poe otoe huie. Arena rei nanie ereeu poe nia Sur. 8Iatuhete ruai iahata, “Hagar! Sarai ne makahaie! Ano on supa, nanie aeua supa?”

Iahata, “Upuku. Nanie urumaku arihoni upuku.”

9Iahata, “Anunia pan tanui na apakarian osiki. 10Au mka urui mea upu momou panesi. Mka rotu-tu sio oreken kuaso tewa. 11Potuina tewa oyo, mka asusu me ia ikine hanaie isa. Ahete nanai tau Ismael. Tea mo, ano arani Anahatana iatinu. 12Ne anamu hanaie rei, mka iatinu tau maunauna tewa. Mka ituntana runa mansiau panesi. Sio mansiau iae, mka otuntana runai oi. Ia mka iruei ikata ne mansiau tewa.”

13Hagar iasei pan anoi, “Kani unoo Anahatana nea reisi? Anahatana wain ino-noo au sui osa!” Reiso ihete Anahatana nanai tau, “Anahatana wain ino-noo.” 14Reiso sio oaoi wae huhune rei tau Lahai-Roi. Nene manariti, “Ia wain iamahaiki wain ino-nooku ne wae huhune.” Wae huhune rei wapo nia Kadesy runa nia Bered tihue. Wapo rotu-tu reini.

15-16Abram ne musum hutu wanu rahana nome oyo Hagar anai hanaie iamrae. Oyo amai Abram ihete nanai tau Ismael.