Isak iainisi arihoni Upuri na irui iake osi Yakup
1Isak ikore-korei iamtuai. Matai usena raputiso nea. Reiso taue isa ioi Esau, anai hanaie manaonete. Iahata, “Esau.”
Esau isana, “Oe, ama.”
2Iahata, “Ano anei ata wani uamtuaku nea, tea! Reiso mka ukarihuru uamahai potuina tewa nea. 3Reiso anana me henua niuna, na aeu akaohu na ahunu peni isa mai osiku. 4Aroriki hokaya mai, oyo aapamasai ia-ia pusu sae wani we sukai rei. Roriki mai osiku na uaiki. Tiaku pokone pusi samatoro uainisi arihoni Upuri Anahatana na irui iake osia. Uainisi osia on wani uamkona asi reini.”
5Isak runa Esau wason oanamana ne, Ribka iatinu. Reiso taa Esau ihitio ieu iakaohui, 6oyo Ribka ioi Yakup. Iahata, “Yakup. Eu mai ee. Na uasau na sae isa reini wani mato uatinui. Amamu mato iasau osi kakamu. Iahata, 7‘Aeu na ahunu peni isa osiku mai. Apamasai ia-ia pusu sae wani we sukai rei. Na uaiku tiaku pokone samatoro uainisi arihoni Upuri Anahatana na irui iake osia. Uainisi osia on wani uamkona asi reini.’ 8Reiso mai na atinu ia-ia runa sae wani nanie uasau osia reini. 9Eua pan re makapanau naniaya na anini une-une honua hata ua waron rapokotueso. Aninire na uapamasare ia-ia pusu sae wani amam ne sukai rei. 10Na aroriki osiki na iaiki. Iaiki tiai pokone na iainisi na Upuri Anahatana irui iake osia on wain iamkona asi reini.”
11Ne Yakup iahata, “Ina, ano anei, tea! Kakaku mo, ne patane hunua panesi. Ne au mo, tewa. 12Pene tu-tu amaku iakahuu hanaku atue na iahana ata hanaku atue nene hunua tewa, areimo uakarotai rei, tea! Reiso mka iainisi arihoni Upuri Anahatana na irui iake osiku tewa, ne mka iainisi arihoni Upuri Anahatana na irui kahatene osiku.”
13Inai iahata, “Anaku. Pene anom reuponu san rei! Mka au sahoro uhana rosa rei. Reiso eu na anana sae wani uasau osia rei. Eu na anana une-uneu rai mai osiku. Pene anom reuponu.”
14Taa san rei oyo, Yakup ieu inana une-uneu rai osi inai. Iseka tau pusire pusi oyo iruire osi inai iapamasare. Iapamasare pusu sae wani amai ne sukai rei. 15Iapamasare pusi oyo, inana Esau ne api honua waron iaunuture mai numa anoe rei. Inanare osi Yakup. Oyo iausahure osi Yakup. 16Ita inana une-une anae nene unte. Ipakei mai hanai atua runa tionai waron hunua tewa rei. 17Ipake pusi Yakup pusi oyo, irui muaina rai runa porotiu waron iunare rai.
18Yakup inanare arihoni inai oyo irorire osi amai. Hoka pan amai oyo iahata, “Ama.”
Amai isana, “Oe. Ano mo, ano seia? Ano Esau te, ano Yakup?”
19Iahata, “Au mo, au Esau, tea! Anamu manaonete. Ama. Uhunu peni isa, uapamasai pusu sae wani aasau osiku rei. Hanu roe na aruea na ai peni wani uroriki osia reini. Ai pusiki oyo ainisi arihoni Upuri Anahatana na irui iake osiku.”
20Iahata, “Asupui supa rapu-rapu man rei, ama?”
Iahata, “Ama. Upumu Anahatana wain ano ainisi ainaa runai iruiki osiku.”
21Iahata, “Reiso mai na uakahuua, ata kani titue ano mo, ano Esau?” 22Oyo Yakup ieu ihaineke amai. Ihainekei oyo amai akahuui. Iakahuui oyo iahata, “Niomu mo, Yakup nioi. Ne hanam atua mo, hana atu Esau!”
23Reiso Isak iationa Yakup tewa tau Yakup hanai atua hunua. Hunua sani Esau. Ne haineke Isak nanie iainisi arihoni Upuri Anahatana na irui iake osiki, 24ne iasei honu san rei, “Titue ano mo, ano Esau?”
Iahata, “E-e. Ama. Au reini mo, au Esau, tea sahoro seia?”
25Iahata, “Reiso rui peni reino mai na uaiki. Uai pusi oyo uainisi arihoni Upuri Anahatana na irui iake osia.”
Reiso Yakup irui muaina rai runa tihu anggur mkane na ininu. 26Iai pusi oyo iahata, “Eu mai hainekeku. Na amukiku mkane.”
27Reiso Yakup ieu haineke amai nanie imukiki. Ne amai ioko Esau ne apia haua. Ioko san rei oyo iainisi arihoni Upuri Anahatana na irui iake osiki. Iahata,
“Upuku Anahatana.
Anaku ne apia raini haua iaka.
Haua iaka sani hau nisi
wani ano auna nene atuhu huaya panesi.
28Uainisi na arui uane on roe nante.
Auna ne nisiu nene atuhu panesi.
Uainisi na auna ne maneiu runa anggur nene huaya panesi nai osa.
29Uainisi na auna niana waisa pusiso ouna manianeu tanui.
Auna sio mai otoa-otoa pusiso ohahue tanui.
Uainisi na auna nea upu momou
no kawasa mainae arihoni wanin nea upu momou.
Auna wanin nea upu momou ohahue tanso.
Uainisi na arui kahatene osi sio wason nanie orui kahatene osiki.
Uainisi na arui iake osi sio wason nanie orui iake osiki.”
Esau iainisi arihoni amai na amai iainisi arihoni Upuri Anahatana na irui iake osiki
30Isak iainisi arihoni Upuri Anahatana na irui iake osi Yakup pusi oyo Yakup ihokai arihoni amai. Mata huni tewa oyo Esau ihokai on pan wesie. 31Ia iae irie peni rei iake oyo iroriki osi amai. Iahata, “Hanu roe nea ama. Aruea na ai we muaina waron urorire osia reini. Ai na ainisi arihoni Upuri Anahatana na irui iake osiku.”
32“Ano seia reini?”
Iahata, “Au ama. Au mo, anamu hanaie manaonete, tea?”
33Isak isira reiso ikana-kananunu. Ikananunu oyo iasei, “Ano rei sahoro ia seia wain sinasi irori peni osiku rei? Au uaire nea on anunia tewasi rei! Reiso au uainisi arihoni Upuri Anahatana na irui iake osiki nea. We mainisie reimo, we mainisie nanie haineke umataku. Reiso we mainisie rei osi ruai runa nea upu nea momou rotu-tu ria supan.”
34Esau iatinu san rei oyo irani nioi mainae. Irani iatamisi rotu-tu ipesi rau ruai. Oyo iasau, “Ama. Ainisi osi au reini oi. Ama.”
35Iahata, “Wanimu sinasi ihokai mai iakarotaku. Uainisi arihoni Upuri Anahatana na irui iake osiki. Aikee nanie uainisi osi ano san rei, ne ia mai inanare nea. Reiso uruire osiki nea.”
36Esau iahata, “Areini mo, nai ua nea. Waniku iakarotaku. Reiso nanai pannuhui. Inana we kawasa manaonete nea. Ita inana mainisie wani mka osiku rei. Ama ano me mainisie tamene isa tewa nea?”
37Iahata, “Uainisi na iuna mainae inesi ano. Uainisi na nea kakau nea waniu ouna manianeu tanui. Au iae uainisi na Upuri Anahatana iuna ne nisi nene manei huaya panesi, nene anggur huaya panesi. Reiso mka urui sae osia oi, ama?”
38Esau iainisi arihoni amai sirinia. Iasei, “Ama. Ano me mainisie osa rei man si? Ainisi na Upuri Anahatana irui iake osi au oi ama!” Iainisi san rei ne irani sirinia.
39Reiso amai iasau san rei,
“Uane on roe nante osia tewa.
Me nisiu nene huaya panesi tewa.
40Ano mo, mka amahaia ahita runa me nisau man.
Ahita runa me tunue man.
Mka auna maniane tau wanim.
Ne masike san rei iae mka ano ahanamata atinu tanui.
Ano mka arumaya arihoni ne kawasa sani koropou
wani sio okanihoo tionai erenosui
oyo ererumai arihoni upue ne kawasa.”
Isak iaisosi Yakup irumai pan etei Laban
41Reiso Esau ipenei tau wanin nea. Tau sae? Amai iainisi na Upuri Anahatana irui iake osi wanin. Irui osi Esau ruai tewa. Reiso Esau iasau pan anoi san rei, “Potuina tewa nea oyo mka amaku imatai. Imatai oyo anoma rapunokoi. Anoma rapunokoi pusi oyo mka uhunu waniku.”
42Ribka iatinu tau anamanae rei oyo iaisosiso na ooi Yakup. Iahata, “Mai na atinu anamanae reini ee. Kakamu ipenei tanua reiso nanie ihunua. 43Reiso apusu we anamanae reini. Masi aeua rapu pan hotaku Laban waipan iruei pan nia Haran. 44Aruea pan etemu rotu-tu potuina mkane rotu-tu kakamu ne sate rei eremanu 45na anoi kanihue runa sae wani aunai tanui rei. Unoo ata kakamu anoi eresaa tewa nea, mka uaisosi sio umau pan, onanaya na anunia mai numa. Upeneku tau unoo we hehuka hanaia uamo omatamo tau ranie hatae osa.”
46Reiso Ribka iasau osi sahai san rei, “Uhanamata unoo Esau ne sio pina rakana ua rei. Upeneku tanso. Munata Yakup iausahai mai otoe reini runa ia pina arihoni sio Het isa honu nene iake umataku nai osa.”