1Mataanoe sio niana-niana mai tuniai reini pusiso utuso no sou osa. 2Oeuso rotu-tu ohokaso ria rani mata msaae. Ohokaso ria watane wan hekan. Watane rei nanae Babilonia. Hoka ria oyo orueso ria rei.

3Taue isa oasau osi umau. Oahata, “Mai na inehu tuamane runa monota oyo iamanre na makaya.” Reiso sio ouna hatu nanie oapuoo numa. Oyo onana aspal opunui tau hatu rai na nanie rakina umau. 4Oamanou pusire, ita oasau osi umau honu. Oahata, “Mai na iapuoo kota isa. Kota wani nene numa isa rehokai roe nante. Iapuooi na sio pusiso oatinu nanari na pene isama-samata ineka pusi tuniai reini.”

5Wasoni onanai asi, oyo sira tau Yahweh ikaisunu nanie inoo kota rei. Kota runa nene numa wani sio mansiau oapuooi rotu-tu erehokai roe nante rei. 6Iahata, “Sio reini no niane osa, no sou osa. Areini mo, mato mataanoe. Potu-potuina, mka ouna sae man pusu no maue. 7Reiso mai, na ikaisunu na iuna wena-wena no sou. Iwena-wena no sou na pene oanei umau.”

8Reiso Anahatana iuna wena-wenaso, oneka pusi tuniai reini. Reiso oapuoo kota rei tewa nea. 9Ria kota rei, Anahatana iuna wena-wena no sou, reiso kota rei nanae Babel. Nene manariti, “Wena-wenaso”. Ria kota rei, Anahatana iuna wena-wenaso oneka pusi tuniai reini.

10Areini sahoro Sem nea upu momou nanao. Waene erekaisunu musum ua nea, Sem ne musum utuni. Ne musum utuni samatoro isusu anai hanaie manaonete. Nanai Arpakhsad. 11Isusu Arpakhsad oyo ikarihuru iamahai rotu-tu musum 500 honu. Ne isusu ne hehuka umau honu.

12Arpakhsad ne musum 35, isusu anai hanaie manaonete nanai Selah. 13Isusu Selah oyo ikarihuru iamahai rotu-tu musum 403 honu. Ne isusu ne hehuka umau honu.

14Selah ne musum 30, isusu anai hanaie manaonete nanai Eber. 15Isusu Eber oyo ikarihuru iamahai rotu-tu musum 403 honu. Ne isusu ne hehuka umau honu.

16Eber ne musum 34, isusu anai hanaie manaonete nanai Peleg. 17Isusu Peleg oyo ikarihuru iamahai rotu-tu musum 430 honu. Ne isusu ne hehuka umau honu.

18Peleg ne musum 30, isusu anai hanaie manaonete nanai Rehu. 19Isusu Rehu oyo ikarihuru iamahai rotu-tu musum 209 honu. Ne isusu ne hehuka umau honu.

20Rehu ne musum 32, isusu anai hanaie manaonete nanai Serug. 21Isusu Serug oyo ikarihuru iamahai rotu-tu musum 207 honu. Ne isusu ne hehuka umau honu.

22Serug ne musum 30, isusu anai hanaie manaonete nanai Nahor. 23Isusu Nahor oyo ikarihuru iamahai rotu-tu musum 200 honu. Ne isusu ne hehuka umau honu.

24Nahor ne musum 29, isusu anai hanaie manaonete nanai Terah. 25Isusu Terah oyo ikarihuru iamahai rotu-tu musum 119 honu. Ne isusu ne hehuka umau honu.

26Terah ne musum 70, isusu ne hehuka hanaia tonu. Ia manaonete nanai Haran. Ia autihue nanai Abram. Ia muie nanai Nahor.

27Areini sou monae arihoni Terah. Terah isusu Haran, Abram, runa Nahor. Haran isusu anai hanaie manaonete nanai Lot. 28Isusu Lot. Ereeu honu oyo amai, Haran, imatai pan ne niane hahae. Ne niane rei nanae Ur. Ur wapan otoe Babilonia. Haran imatai mo, amai iamahaiki asi. 29Abram iausahai inana Sarai. Nahor inana Milka. Milka mo, Haran anai pina. Haran, anai hanaie isa honu, nanai Yiska. 30Ne Sarai mo, imutui. Isusu tewa.

31Terah sio ohitio oeu arihoni kota Ur ria otoe Babilonia. Terah ieu ikata anai hanaie Abram runa ne mananue Sarai, runa momoi Lot. Ateso nanie oeuso nau otoe Kanaan. Ne ohokaso pan nia Haran oyo orueso pan rei. 32Orueso pan Haran oyo Terah imatai. Imatai tau ne musum 205.