Yakup runa Esau uaso osupu umau
1Yakup inoo Esau runa ne netau sio utuni ate wason ohokaso. Reiso isama Lea ne hehuka, Rahel ne hehuka, runa no makahaia rei no hehuka pusiso. 2Isamaso oyo ianena no makahaia runa no hehuka roe uae. Ita Lea runa ne hehuka paka tihue. Samatoro Rahel runa Yusup hae muie nai osa. 3Ne Yakup irori uae. On nau nanie ieui ihaineke kakai ihahue rotu-tu nai itu. 4Ne Esau irumai nau inopa wanin. Inopai oyo imukiki. Oyo uaso orani. 5Ne Esau inoo sio pinau runa no hehuka rei, oyo iasei, “Seiso wason okataya reini?”
Iahata, “Upu. We hehuka wason Anahatana iruiso osiku. Anahatana irui iake osiku reiso irui we hehuka panesi reini, tea?”
6Taa san rei oyo no makahaia runa no hehuka oeuso mai ohainekei, ohahue mai tanui. 7Ita Lea runa ne hehuka samatoro Yusup runa inai ohainekei oyo ohahue mai tanui oi. 8Esau iahata, “Makapanau polotu-polotu waron sinasi ororire mai tanuku rei, nanie tau sae?”
Iahata, “Upu. Nanie rauna anom iake tanuku.”
9Ne iahata, “Pene nea. Au we makapanau panesi nea. Pene arui osiku nea.”
10Iahata, “Pene. Nanare noi. Sani anom iake runaku nea mo, anana makapanau rai noi. Au una sana tanua ne anom eresaa tanuku tewa nea, areimo sani una sana tau Anahatana ne iapuheui. Reiso unoo uamu anoe mo, areimo sani unoo Anahatana uai anoe. 11Uainisi arihonia na araruma we makapanau waron urorire osia reini. Anahatana irui iake osiku reiso irui sae waron uninare.” Yakup itentene sirinia reiso kakai inana ne makapanau.
12Oyo Esau iahata, “Mai na ieuta. Ueu uanaone arihonimo.”
13Iahata, “Upu. Ruamu anei we sio ikina reimo omankaeso. Samatoro kahurae au ueu manu-manu. Tewa mo, we makapanau waron rasusu asi. Munata ueu usapae runare mo, mka ramata pusire. Masike usapae runare ranie hatae osa man iae, mka ramata pusire. 14Reiso upu, aeu anaonea. Ami on mai apusua manu-manu. Ueu ukatu sio ikina runa makapanau rotu-tu ahokama poe tanumo poe otoe Edom.”
15Iahata, “Munata sanreimo iake. Mka uarihoni we netau umau osia na oakahaia.”
Ne iahata, “Upu. Ruae nea. Pene anom reuponu runaku. Hete sae anom iake runaku.”
16Reiso Esau inuniki napi roe Edom tau ranie hatae rei sirinia. 17Ne Yakup ieui napi poe nia Sukot. Hoka poe iapuoo ne numa wani sio onanai rerihoni makapana unta rei. Iapuooi oyo inana koka osi ne makapanau. Inana koka rei, reiso sio oaoi niane rei nanae tau Sukot. Sukot nene manariti, “Kokau.”
18Reiso sio oeuso on pan otoe Mesopotomia rotu-tu ohokaso mai kota Sikhem mai otoe Kanaan iake oyo oapuoo no numa unte. Oapuooi mai kota nusue. Ohokaso mai no patana miri-mirika sirinia. 19Mai naniao rei mo, ohane tuamane rei rerihoni Hemor nea upu. Hemor mo, Sikhem amai. Ohane tau nene hunonie perak inata utuni. 20Hoka mai oyo Yakup irane hatu noore sani anau nanie iainisi iainaa runa Anahatana. Ihete hatu rai nanae tau El Elohe Israel. Nene manariti Anahatana wain sio Israel oainisi oainaa runai.