2Ali ma pan ma gbɔn, na kayaŋga ki yɛn na seregi na kee yɛgɛ,

jɔlɔgɔ ŋga Yɛnŋɛlɛ lì taga na na, kì wɛ jɛngɛ ŋga mila jɛɛn ki na.

3Ɛnhɛn! Ndɛɛ ki pye Yɛnŋɛlɛ li yɛn laga ŋga na migi jɛn,

mi jɛn na kari fɔ wa li cɛnsaga!

4Mi jɛn na kari sanla kala li yɛgɛ yo, mbanla tanga ki naga,

mi jɛn na sa sɛnlɛgɛrɛ yo na tanga ki wogo na.

5Sɛnrɛ nda li jɛn na yo mbanla yɔn sogo, mi jɛn nari jɛn;

mi jɛn nali woyoro ti kɔrɔ jɛn.

6Naga yɛn ma, li yaa li fanŋga ki ni fuun ki tɛgɛ mbe win na ni wi le?

Ayoo dɛ! Ɛɛn fɔ lo na, li yaa nuŋgbolo jan mbe logo na yeri.

7Li jɛn naga jɛn fɔ lesinŋɛ wawi wi yɛn na para li ni;

lo na li yɛn na kiti kɔnfɔ, li jɛn na tanga ki kan na yeri sanga pyew.

8Ɛɛn fɔ na mi ka kari wa yɔnlɔ yirisaga kɛɛ yeri, li woro wa ma,

na mi ka kari wa yɔnlɔ tosaga kɛɛ yeri, mi seli yan wa ma.

9Naga yɛn ma, li kɛɛ yɛn ma yanra tunŋgo ka na wa yɔnlɔparawa kamɛŋgɛ kɛɛ yeri wi le? Ayoo mi seli yan wa ma.

Li saa lara wa yɔnlɔparawa kalige kɛɛ yeri wi le? Na yɛnlɛ li se taga li na?

10Konaa ki ni fuun, mi yɛn na tanri konɔ na na, lìli jɛn;

na li kanla wa mbe wele, pa mi yaa yiri kpoyi paa tɛ yɛn.

11Katugu mi yɛn na tanri wa li tulugo ki ni suyi;

mi yɛn na tanri li konɔ li na, mii kɛ mbe wɔ wa li ni.

12Mii je mbaa tanri li ŋgasegele ke na;

mìlan nandanwa kala li yaga wa, ma tanga ma yala li yɔn sɛnyoro ti ni.

13Ɛɛn fɔ na li ka kala na kɔn mbe tɛgɛ, ambɔ wi mbe ya mbeli kanŋga.

Kala na kali ndanla, lo li ma pye.

14Ŋga lì kɔn ma tɛgɛ na kanŋgɔlɔ, ko li yaa pye,

lì ko kagala koro cɛnlɛ lɛgɛrɛ gbɛgɛlɛ ma tɛgɛ na kan.

15Ki kala na, na sunndo wi yɛn na kɔɔn na na wa li yɛgɛ sɔgɔwɔ;

na mi kaa sɔnri li wogo ki na, mi maa fyɛ.

16Yɛnŋɛlɛ lo lìlan fanŋga ki kɔ na ni,

Yɛnŋɛlɛ na yawa pi ni fuun fɔ lìlan sunndo wi kɔn na na.

17Konaa ki ni fuun, ali mbege ta diwi ye na na, kii na yɔn ki tɔn na na;

ali mbege ta diwi gbɔlɔ na tɔn.