1Sɛnwee, wo ŋa jɛlɛ wì se,

wi yinwege ki yɛn ma were, ma yin jɔlɔgɔ ni yɛgɛ ki ni fuun ni.

2Wi yɛn paa yarifyɛɛnrɛ yɛn, ti ma pɛlɛgi, sanni jɛnri mbe si fanla;

wi ma toro paa tige yinmɛ yɛn, pila mɔ.

3Yɛnŋɛlɛ, ko lere wo ma yɛngɛlɛ ke yɛn wi na naa kɔrɔsi,

màla yigi na kee na ni sa kiti kɔn na ni win!

4Ambɔ wi mbe ya mbe yaraga ŋga ki yɛn fyɔngɔ fu ka wɔ wa yaraga ŋga ki yɛn fyɔngɔ ni ki ni?

Ko lere woro wa.

5Kì kaa pye mà sɛnwee wi yinwege piliye yɔn ki kɔn maga tɛgɛ,

kì kaa pye mà yinwege yeyɛn yɔn ki tɛgɛ,

kì kaa pye mà kɔnlɔ gbɔn wi yinwege ki kan, ŋga wi se ya toro ki na,

6ki kala na, ma yɛgɛ ki laga wi na, jaŋgo wi wogosaga ta jɛnri,

jaŋgo wi nawa pi yinŋgi paa yɛgɛ ŋga na tunmbyee ŋa pe maa sara, yɔnlɔkɔgɔ wi kaa sara wi ta wi nawa pi ma yinŋgi we.

7Jigi tagasaga yɛrɛ yɛn tige ki yeri,

na paga ki kɔn, ki ma fun naa,

ki ma koro na njere fɔnndɔ yinrigi.

8Ali ki ninde ti ka lɛ wa tara ti ni,

ali na ki yunŋgɔngɔ ki ka cɛn ndɛɛ ki ku wa tara ti ni,

9na tɔnmɔ ka gbɔn ki na ma kɔ, ki ma fun naa,

ki ma njere yirige naa paa tige yirifɔnŋgɔ yɛn.

10Ɛɛn fɔ na lere wi ka ku, wi fanŋga ki ma kɔ pew;

na sɛnwee wi yinwege wɔnwɔn pi ka kɔ wi ni, wi ma pye yiŋgi?

11Lɔgbɔgɔ tɔnmɔ pi mbe ya waga,

gbaanla tɔnmɔ pi mbe ya kɔ mbe waga,

12ki pyelɔmɔ nuŋgba pi na, na sɛnwee wi ka sinlɛ wa kunwɔ pi wɔnlɔwɔ pi ni, wi se yiri naa;

wi se yɛn mbe yiri, fɔ naayeri wi ka sa kɔ wi wɔ wa,

wi se yɛn mbe yiri wɔnlɔwɔ pi na.

13E, Yɛnŋɛlɛ, ndɛɛ ki pye ma mbe ja yɛnlɛ mbanla lara wa kuulo tara,

mbanla yaga wa larasaga fɔ ma naŋgbanwa pi sa sogo na ni,

mbe wagati wa kɔn mbe tɛgɛ na kan, ŋa ni ma yaa kɔɔn jatere wi tɛgɛ na na, ki jɛn nala ndanla!

14Naga yɛn ma, na sɛnwee wi ka ku, wi mbe ya yiri mbe pye yinwege na naa wi le?

Ndɛɛ ki mbe ja ya pye, mi jɛn naga kun na yɛɛ ni, mbaa singi na tege tunŋgo wagati wi ni fuun wi ni,

fɔ na wagati wi ka sa gbɔn, wa mbe cɛn wa na yɔnlɔ.

15Kona ma jɛn nala yeri, pa mi jɛn nɔɔ yɔn sogo;

mi ŋa màla da, na la ki jɛn nɔɔ yigi maa ki jaa mbanla yan.

16Ma si yala koni, ma yɛn nala yɔngɔlɔ ke jinri,

ma se jɛn naa na kapege ki wele naa.

17Ma jɛn nala kapere ti le kasha ka ni, mberi lara, mbege yɔn ki pɔ ti na,

ma jɛn nala kajɔgɔrɔ ti tɔn.

18Konaa ki ni fuun, yanwiga ki ma to ma jaraga,

walaga ki ma jɛɛnri ma wɔ wa ki yɔnlɔ li ni.

19Tɔnmɔ pi maa fuun sinndɛlɛgɛ ki na naga mugu,

pi maa fuun na kee tara ti ni yɛgɛ ŋga na,

mboro fun pa ma ma sɛnwee wi jigi tagasaga ki jɔgɔ ma.

20Ma ma to wi na yɔnlɔ nuŋgba, ma ya wi ni, wi ma toro;

ma maa yɛgɛ cɛnwɛ pi kanŋga, ko puŋgo na, ma maa purɔ.

21Wi pinambiile pe yaa ka gbɔgɔwɔ ta laga wi puŋgo na o, wi se ko jɛn;

pe yaa kaa pe tifaga wi yo, wi se pye ko jɛnmɛ.

22Tege ŋga ki ma pye wa wi yɛɛra wire ti ni ko wi ma jɛn,

wi yinnɛ li ma pye kunwɔ kayaŋga na wi yɛɛ wogo na.