3Yɛnŋɛlɛ sa ti na sepilige ki kɔ ki wɔ wa,

konaa yembinɛ na ni pège yo ma yo fɔ pè pinambyɔ wa kugbɔ lɛ, Yɛnŋɛlɛ sa ti ki yembinɛ li kɔ li wɔ wa!

4Ki pilige ye, Yɛnŋɛlɛ sa ti ki kanŋga diwi,

mbe Yɛnŋɛlɛ li ta wa naayeri, liga ka jatere tɛgɛ ki pilige ki na naa fyew.

Yanwa ka ka yiri ki pilige ki ni!

5Diwi gbɔlɔ mbe ye ki pilige ki ni konaa kunwɔ pi diwi wi tɔn ki na,

kambaara wɔrɔ mbe tɔn ki na,

diwi fyɛrɛ woo mbe ye ki yɔnlɔ ki na!

6Diwi gbɔlɔ mbe ye mbege pilige ki tɔn pew,

yɔgɔrimɔ kpɛ ka ka pye ki yembinɛ li ni yɛlɛ li piliye sannya yi sɔgɔwɔ,

ki yembinɛ paga kali jiri mbeli pinlɛ yende piliye sannya yi ni!

7Ee, ki yembinɛ li ni, jɛlɛ ka ka ya yere kugbɔ ni,

yɔgɔrimɔ tinmɛ kpɛ ka ka logo ki yembinɛ li ni!

8Yɛnŋɛlɛ sa ti mbele pe maa piliye yi daŋgi pege yembinɛ li daŋga,

poro mbele pe ma ya ma yarifɛlɛgɛ Leviyatan ki pye mbege yirige we!

9Ki yembinɛ li yindogo yɔn wɔnŋgɔlɔ ke pye diwi,

li lalaaga yanwa pi sige sa te, piga ka pan,

liga ka lalaaga yɔn yanwa pi yan!

10Katugu lara nda tìla na kugbɔ ki lɛ, ki yembinɛ li sila kala la pye mbe ti paga kanla se,

mbe ti mi ka kaa ki jɔlɔgɔ ŋga ki yaan yɛnlɛ ni.

11Yiŋgi na mi sila si ku wa na nɔ wi lara na sesaga?

Yiŋgi na na sesaga ma yiri wa na nɔ wi lara, wɔnwɔn pi sila si shɔ na yeri?

12Yiŋgi na lere la si ta mala teŋge wa wi tɔɔrɔ ti na?

Yiŋgi na yinnɛ la si ta ma kan na yeri, a mi wɔnri?

13Ndɛɛ ko sila pye, anmɛ mi yɛn ma sinlɛ ma pye yɛyinŋge na wa fanga ki ni,

anmɛ mi yɛn wa kunwɔ pi wɔnlɔwɔ pi ni na wɔnlɔ, anmɛ mi yɛn na wogo.

14Mi jɛn na pye wa wunlumbolo poro naa tara ti legbɔɔlɔ pe ni,

poro mbele pe maa wunlumbolo yinrɛ kanni pe yɛɛ kan we.

15Mi jɛn na pye wa wunlumbolo piile pe ni, poro mbele tɛ la pye pe yeri,

a pè pe yinrɛ ti yinyin warifuwe ni.

16Nakoma mi se jɛn na pye laga, mi jɛn na pye

paa pyɔ ŋa wì ku wa wi nɔ lara, a pè suu se wi yɛn,

paa pipigile yɛn, ŋgele kè ku ke sila yɔnlɔ yanwa pi yan.

17Wa ko laga ko ni, lepeele pe se ya mbe kapege pye lere na,

mbele pe yɛn tege na ma pye fanŋga fu fɛnnɛ, pe yɛn na wogo wa ki laga ki ni.

18Kasopiile pe yɛn wa yɛyinŋge na,

pe woro na pe jɔlɔfɛnnɛ pe magala li nuru naa.

19Lepigile naa legbɔɔlɔ pe yɛn ja,

kulo wì shɔ wi tafɔ wi fanŋga ki kɛɛ.

20Yiŋgi na Yɛnŋɛlɛ li mɛɛ mbele pe yɛn na jɔlɔ pe yaga pe ma yanwa pi yan?

Yiŋgi na mbele pe nawa pì tanga pe na, li mɛɛ pe yaga yinwege na?

21Pe maa kunwɔ pi singi, ɛɛn fɔ pila pan mbe pe lɛ,

pe maa kunwɔ pi lagajaa ma wɛ penjagbɔrɔ jawa na†.

22Ndɛɛ ki pye pe fanra ti ta, a pe pe le,

pe jɛn na yin nayinmɛ ni mbaa yɔgɔri jɛŋgɛ.

23Mi yɛn lere wa, ŋa wi suu karisaga ki jɛn,

ŋa Yɛnŋɛlɛ lùu yɔn tɔn kɛɛ ki ni fuun ki na,

yiŋgi na Yɛnŋɛlɛ li silan yaga yinwege na naa?

24Katugu jɛngɛ ŋga mila jɛɛn ko ki pye na yaakara re,

na kayaŋga gbelege ki yɛn na yinrigi kɔnlɔ fu.

25Ŋga mi yɛn na fyɛ ki yɛgɛ, ko ki mala ta,

ŋga kila na sunndo wi kɔɔn na na, ko kì gbɔn na na.

26Mi woro na yɛɛ kan, yɛyinŋge woro na na, wogosaga si woro na na;

ɛɛn fɔ yɛwɛrɛgɛ ko ki yɛn na na.