Baku soal jawab tentang Yesus pu kuasa
1Satu waktu Yesus kas ajar deng kastau Allah pu Brita Baik sama orang banyak di Tempat Ibada Pusat. Begini di tempat itu ada juga imam-imam kepala, guru-guru agama sama orang Yahudi pu tua-tua adat dorang. 2Trus dong bilang sama Yesus, “Coba Ko kastau sama kitong dulu, deng kuasa apa Ko bikin ini smua? Sapa yang kasi Ko kuasa untuk bikin ini smua?”
3Yesus jawab, “Sa mo tanya dulu. Coba kam kastau Saya, 4Yohanes de kas baptis orang deng sapa pu kuasa? Allah ato manusia?”
5Dong mulai baku bahas soal itu, trus dong bicara,
“Kalo tong bilang, ‘Deng Allah pu kuasa,’ De nanti bilang, ‘Knapa kam tra percaya dia?’ 6Tapi kalo tong bilang ‘Deng manusia pu kuasa,’ smua orang nanti lempar tong deng batu, karna percaya kalo Yohanes itu nabi.” 7Jadi dong jawab, “Kitong tra tau.”
8Trus Yesus jawab sama dong, “Kalo begitu Sa juga trakan kastau sama kam deng kuasa apa Sa bisa bikin ini smua.”
Conto tentang orang-orang jahat yang sewa kebun anggur
9Trus Yesus kastau conto ini sama orang banyak,
“Ada satu orang tanam anggur di de pu kebun. De kas sewa sama orang-orang yang kerja kebun itu, trus de brangkat ke tempat yang jau deng tinggal di sana untuk waktu yang lama. 10Su waktu mo panen, orang yang pu kebun tu suru de pu pesuru pigi ambil sebagian hasil panen di orang yang sewa kebun. Tapi orang yang sewa, dong pukul orang itu baru dong suru pulang deng tangan kosong. 11Habis itu de suru orang lain lagi, tapi orang itu dong pukul juga baru bikin malu de trus suru pulang deng tra bawa apapa. 12Trus de suru orang yang ketiga, tapi orang itu dapa pukul sampe luka-luka baru dong lempar de kluar kebun. 13Jadi orang yang pu kebun tu pikir, ‘Sa harus buat apa lagi? Sa mo kirim sa pu anak yang paling sa sayang. Pasti dong nanti hormat de.’
14Tapi begitu dong liat de pu anak itu, dong bicara deng atur rencana begini, ‘De ini yang nanti pu hak di tana ini, mari tong bunu de supaya tana ini tong bisa ambil.’ 15Trus dong lempar de kluar kebun trus dong bunu anak itu.
Kam pikir orang yang pu kebun anggur, bikin apa sama orang-orang itu? 16De pasti pigi ke kebun anggur, trus bunu orang-orang yang sewa kebun itu, trus kasi kebun itu sama orang-orang lain.”
Begitu dong dengar itu, dong bilang sama Yesus, “Sperti begitu jang kas biar jadi sama kitong!”
17Tapi Yesus liat dong baru bilang, “Kalo begitu apa arti ayat ini:
‘Batu yang tukang-tukang bangunan dong buang karna tra perlu,
skarang jadi batu fondasi yang paling penting.’
18Orang yang jatu kena batu itu, pasti de hancur. Juga kalo batu itu jatu kena orang pasti orang hancur.”
Soal bayar pajak
19Guru-guru agama deng imam-imam kepala, dong tau kalo conto itu Yesus bicara kas sala dorang. Karna itu dong mo skali tangkap Yesus di situ juga, tapi dong smua takut sama orang banyak. 20Jadi dong cari waktu yang baik. Dong bayar orang untuk jadi mata-mata, dong pura-pura jadi orang baik trus tanya-tanya untuk bisa jebak Yesus supaya Yesus kas kluar kata-kata yang lawan pemrinta Roma, supaya dong bisa kasi De sama Gubernur yang pu kuasa untuk adili. 21Begini orang-orang itu tanya sama Yesus, “Guru, tong tau kalo smua yang Ko bilang deng kas ajar itu benar. Tong tau juga kalo Bapa kas ajar Allah pu mau untuk tong deng trus trang tra kas beda-beda orang. 22Karna itu coba Bapa kastau sama kitong: Mnurut tong pu aturan agama, tong musti bayar pajak sama Raja Besar Roma ato tra usa?”
23Tapi Yesus tau dong pu maksud jadi De bilang, 24“Coba kas liat sama Saya, satu uang logam perak. Gambar deng nama sapa yang ada di situ?”
Dong jawab, “Raja Besar Roma.”
25Trus Yesus bilang sama dorang, “Kalo begitu, kasi apa yang jadi hak dari Raja Besar Roma sama Raja Besar Roma, trus kasi apa yang jadi hak Allah sama Allah.”
26Dong smua diam deng heran dengar Yesus jawab begitu. Karna itu dong tra bisa mo jrat Yesus di depan orang banyak.
Yesus kas ajar tentang hidup kembali
27Begini datang orang-orang dari klompok Saduki, dong ini yang tra percaya kalo orang mati bisa hidup kembali. Jadi dong tanya sama Yesus,
28“Guru! Musa de su tulis printa ini untuk kitong, kalo satu laki-laki de mati baru de pu maitua masi ada tapi dong tra pu anak, de pu sodara laki-laki musti kawin deng de pu maitua supaya ada turunan untuk laki-laki yang su mati itu. 29Ada crita satu begini, tuju orang sodara dong smua laki-laki. Yang sodara pertama kawin, trus mati tra pu anak. 30Trus yang sodara kedua de kawin deng de pu janda itu, tapi de juga mati baru tra pu anak. 31Begitu juga sodara yang ketiga sampe yang ketuju smua tra pu anak juga. 32Sampe prempuan itu juga de mati. 33Jadi kalo orang mati hidup kembali, dari dong smua sapa yang jadi paitua dari prempuan itu? Karna tuju orang sodara itu su kawin deng dia.”
34Yesus jawab sama dong,
“Orang-orang yang hidup skarang ini dong baku kawin. 35Tapi orang-orang yang pantas hidup lagi stela dong mati, hidup kembali di jaman yang nanti datang, dong tra kawin. 36Dong sama sperti malaikat, tra bisa mati lagi. Dong su jadi Allah pu anana, karna Allah su kas hidup dorang. 37Musa sendiri su kastau deng jlas kalo orang mati nanti hidup kembali. Waktu de tulis tentang pohon-pohon duri lebat yang menyala itu de bilang Tuhan itu, ‘Allah yang Abraham, Isak, deng Yakub dong ada semba.’ 38De bukan Allah orang mati, tapi Allah orang yang hidup! Karna di depan Allah smua orang hidup.”
39Dengar begitu ada guru-guru agama yang bilang, “Guru, yang Ko bilang ini betul skali.” 40Begitu jadi sapa saja tra brani lagi mo tanya-tanya sama Yesus.
Hubungan Yesus deng Daud
41Tapi Yesus tanya sama dorang,
“Bagemana orang bisa bilang, kalo Raja yang Allah pili itu Daud pu turunan? 42Karna Daud sendiri bilang dalam buku Mazmur,
‘Tuhan su kastau sama sa pu Tuan:
Duduk di Sa pu sebla kanan,
43 sampe Ko pu musu-musu
Sa taru di bawa Ko pu kaki.’
44Jadi kalo Daud bilang Raja yang Allah pili itu ‘de pu Tuan’ bagemana bisa De turunan Daud?”
Yesus kas naseat supaya hati-hati deng guru-guru agama
45Waktu orang-orang masi dengar Yesus bicara, Yesus kastau De pu murid-murid dong,
46“Kam harus hati-hati deng guru-guru agama. Dong snang jalan pake baju-baju panjang trus dong mo skali dapat hormat di pasar, juga paling suka duduk paling depan di tempat ibada deng di pesta-pesta. 47Tapi dong biasa tipu janda-janda deng ambil paksa dong pu ruma. Trus yang tutup dong pu klakuan jahat itu, deng doa yang panjang-panjang. Dong pasti nanti trima hukuman yang lebi brat.”