Dosa deng sengsara
1Waktu itu ada orang-orang yang datang sama Yesus, trus dong kastau kalo ada orang-orang Galilea yang Gubernur Pilatus de bunu. Dong dapa bunu waktu dong ada kas korban binatang untuk Allah. 2Dengar begitu Yesus bilang,
“Kalo orang-orang Galilea yang dapa bunu sperti itu, kam pikir dong pu dosa lebi banyak dari smua orang Galilea yang lain? 3Tra begitu! Sa kastau kam: Kalo kam tra mo tobat dari kam pu dosa-dosa, kam smua nanti mati kena claka sperti dorang. 4Ato kam masi ingat 18 orang yang mati karna dapa tindis dari bangunan tinggi yang rubu dekat kolam Siloam to? Kam pikir, dong pu dosa lebi besar dari smua orang yang tinggal di Yerusalem ka? 5Tra begitu! Sa kastau kam lagi, kalo kam tra mo tobat dari kam pu dosa-dosa, kam smua juga pasti mati kena claka sperti dorang.”
Conto tentang pohon ara yang trada bua
6Trus Yesus crita satu conto begini,
“Ada orang satu, de pu kebun anggur trus di situ ada tumbu juga pohon bua ara. Satu hari de datang untuk cari bua di pohon itu, tapi de tra dapat satu bua juga. 7Jadi orang yang pu kebun tu de bilang sama orang yang jaga kebun itu, ‘Ko liat, slama tiga taun sa datang cari bua di pohon ara ini tapi trada bua. Ko tebang saja pohon ini, percuma de tumbu untuk makan smua dari tana ini.’
8Tapi orang yang jaga kebun tu bilang, ‘Bapa, kas tinggal de taun ini lagi, nanti sa skop tana dekat pohon itu deng kas pupuk. 9Sapa tau taun depan de bisa bua, tapi kalo trada bua juga, baru Bapa bisa tebang.’ ”
Yesus De kas sembu orang pas di orang Yahudi pu hari ibada
10Pas hari ibada, Yesus De kas ajar di orang Yahudi dong pu tempat ibada satu. 11Di situ ada mace satu, roh jahat bikin de sakit 18 taun sampe de pu blakang bongkok deng tra bisa bediri lurus. 12Waktu liat mace itu, Yesus De panggil mace itu baru bilang, “Mama skarang ko sembu dari ko pu sakit.” 13Trus Yesus taru tangan di mace itu, waktu itu juga mace de bisa bediri lurus trus de puji-puji Allah.
14Kepala tempat sembayang itu mara karna Yesus kas sembu orang pas di hari ibada, trus de bilang ke orang banyak, “Ada enam hari to untuk kerja, kam bisa datang di hari-hari itu supaya kam dapa kas sembu, jang kam datang pas hari ibada.”
15Dengar begitu, Tuhan jawab,
“Kam ini orang-orang yang pura-pura baik, pas hari ibada kam smua pigi kas lepas kam pu sapi ato kledai dari kandang, trus bawa kluar pigi kas minum. 16Liat mama ini! De ini turunan Abraham, trus Iblis su ikat de dlapan blas taun. Tra bole ka, kas lepas mama ini dari Iblis pu ikatan di hari ibada?”
17Yesus bicara begitu, smua orang yang lawan Yesus jadi malu skali, tapi smua orang yang lain dong snang liat Yesus bikin hal-hal luar biasa.
Conto tentang biji yang kecil skali deng ragi
18Habis tu Yesus De tanya,
“Sa mo crita, kira-kira Allah jadi Raja itu sperti apa? 19Allah jadi Raja tu sperti biji sesawi yang kecil skali, orang dong ambil trus pigi tanam di de pu kebun. Lama-lama biji yang tadi dong tanam itu de tumbu trus de jadi pohon, baru burung-burung dong bikin sarang di cabang-cabang di pohon itu.”
20Yesus crita lagi,
“Deng apa lagi Sa mo kas conto Allah pu krajaan? 21Allah pu krajaan tu sperti ragi, yang mace satu de ambil ragi sedikit trus de campur deng tepung tiga pulu kilo, bikin sampe adonan naik smua.”
Sapa yang mo slamat
22Waktu dong jalan pigi ke Yerusalem, Yesus lewat dari kampung ke kampung juga dari kota ke kota deng trus kas ajar ke orang-orang dong.
23Trus ada satu orang de tanya sama Yesus, “Bapa, hanya sedikit orang saja ka yang nanti dapa kas slamat?”
24Trus Yesus jawab begini,
“Pintu surga tu kecil, jadi kam musti usaha mo masuk dari pintu yang sempit itu. Karna, ingat! Banyak orang coba mo masuk tapi tra bisa. 25Karna kalo tuan ruma su tutup de pu pintu, kam nanti bediri di luar trus ketuk-ketuk pintu baru bilang, ‘Bapa, tolong ka buka tong pintu!’
Dengar begitu tuan ruma itu de nanti jawab kam, ‘Kam sapa? Sa tra knal kam, sa tra tau kam datang dari mana.’
26Trus kam mo jawab, ‘Bapa tra knal kitong ka! Tong ni yang biasa duduk makan minum deng bapa, juga Bapa yang su kas ajar di tong pu kota-kota!’
27Tapi nanti tuan itu de bilang lagi, ‘Sa tra tau kam, kam datang dari mana. Pigi dari sini, kam smua yang bikin jahat!’
28Di sana nanti ada suara mnangis sedi skali sampe gigi bunyi karna sengsara skali. Karna kam sendiri liat Abraham, Isak sama Yakub deng smua nabi-nabi dong di dalam Allah pu krajaan, tapi kam sendiri dapa buang kluar! 29Orang nanti datang dari timur deng barat, utara deng slatan; dong nanti datang duduk makan sama-sama di dalam Allah pu krajaan. 30Dengar baik-baik, ada orang yang rasa diri trada apapa de yang nanti jadi orang nomor satu, trus orang yang rasa diri nomor satu de yang nanti jadi orang yang trada apapa.”
Yesus rasa kasian Yerusalem
31Waktu itu ada orang-orang Farisi yang rajin ikut hukum Musa dong datang bicara sama Yesus begini, “Bapa, Ko pigi cepat, kas tinggal tempat ini, karna Herodes de mo bunu Ko.”
32Trus Yesus jawab,
“Kam pigi trus kastau Herodes tukang tipu itu, ‘Hari ini deng besok Sa usir roh jahat deng kas sembu orang trus hari ketiga baru Sa pu kerja slesai.’ 33Biar begitu hari ini, besok sama besok lusa Sa harus jalan trus sampe ke Yerusalem, karna nabi tra bole dapa bunu di luar Yerusalem.
34Sayang skali orang-orang Yerusalem! Kam yang bunu nabi-nabi! Allah pu utusan kam lempar deng batu sampe mati! Ulang-ulang kali Sa mo kas kumpul kam smua sperti ayam betina kas kumpul de pu anana di bawa de pu sayap, tapi kam tra mau. 35Karna itu Allah de mo lepas tangan dari kam smua deng kam pu kota. Supaya kam tau, kam trakan liat Sa lagi, sampe pas waktu nanti kam bilang, ‘Allah berkati Dia yang datang deng nama Tuhan.’ ”