Yesus pili murid pertama
1Satu hari Yesus bediri di pinggir danau Genesaret. Banyak orang dempet-dempet kliling Yesus supaya dong mo dengar Allah pu kata-kata. 2Begini Yesus liat ada prahu dua di danau situ, orang-orang tukang tangkap ikan su turun dari prahu itu, dong ada kas bersi dong pu jala. 3Yesus naik dalam prahu satu, yang pu prahu tu Simon. Trus Yesus suru Simon dorong de pu prahu ke tenga sedikit, baru Yesus duduk dalam prahu deng mulai kas ajar orang banyak.
4Habis kas ajar, Yesus bilang Simon, “Ko tolak prahu ke tempat yang dalam trus buang jala, supaya kam tangkap ikan.”
5Simon de jawab, “Bapa guru, spanjang malam tong kerja kras tapi tra tangkap apapa, tapi karna Bapa yang suru, sa mo lepas jala lagi.” 6Dong kas lepas jala begini, dong dapat ikan banyak skali sampe jala mo robek. 7Jadi dong kode panggil teman-teman di prahu lain supaya bantu dong. Teman-teman dong datang baru sama-sama dong isi prahu dua tu deng ikan sampe mo tenggelam.
8Waktu Simon Petrus de liat itu, de kas jatu badan di depan Yesus pu kaki baru bilang, “Tuhan! Sa ni tra pantas dekat Tuhan. Kas tinggal sa suda, karna sa ni orang yang pu dosa!” 9Simon bicara begitu, karna Simon deng orang yang sama-sama di situ, heran skali liat ikan yang dong dapat sampe banyak begitu. 10Begitu juga Simon pu teman kerja Yakobus deng Yohanes, bapa Zebedeus pu anak dua.
Trus Yesus bilang sama Simon, “Jang takut! Skarang ko jadi orang yang jala manusia.” 11Habis Simon deng de pu teman-teman tarik prahu kas naik di darat, trus dong kas tinggal smua di situ trus pigi ikut Yesus.
Yesus kas sembu orang yang sakit kulit busuk
12Satu kali begini, Yesus De di kota satu. Di situ ada satu orang yang pu kulit penu deng luka busuk. Waktu de liat Yesus, de kas tunduk badan sampe muka kena tana di depan Yesus pu kaki trus minta, “Tuhan, kalo mau, Tuhan kas sembu sa ka.”
13Trus Yesus kas tangan pegang orang itu, deng bilang, “Sa mau, ko sembu suda.” Waktu itu juga, de pu sakit kulit busuk hilang.
14Yesus larang de jang kastau ke sapa-sapa trus bilang, “Pigi, kas liat ko pu diri ke imam trus kasi korban untuk kas bersi ko pu diri. Kasi sperti yang Musa de printa, sebage bukti ke dorang.” 15Tapi smakin banyak orang crita tentang Yesus. Karna tu banyak orang datang mo dengar deng mo dapa kas sembu dari dong pu sakit. 16Tapi Yesus biasa pigi ke tempat sepi yang kring untuk doa.
Yesus kas sembu satu orang yang tra bisa jalan
17Satu hari Yesus kas ajar banyak orang di ruma satu, di situ ada orang-orang Farisi yang rajin ikut hukum Musa deng guru-guru agama juga duduk dengar. Dong smua datang dari Yerusalem, juga dari kampung-kampung di Galilea deng Yudea. Kuasa Tuhan ada sama Yesus untuk kas sembu orang-orang sakit. 18Pas waktu itu ada orang-orang yang pikul orang lumpu satu, dong angkat pake kayu dua, dong coba mo bawa masuk orang itu taru depan Yesus. 19Tapi dong tra bisa bawa de masuk, karna orang banyak skali di situ. Dong naik ke ruma itu pu bagian atas, dong kas bolong baru kas turun orang itu deng de pu tikar di tenga orang-orang pas depan Yesus. 20Waktu Yesus liat dong pu iman, De bilang, “Sodara, ko pu dosa-dosa su dapa kas ampun.”
21Guru-guru agama deng orang Farisi dong pikir dalam hati, “Orang ini sapa yang brani hina Allah? Cuma Allah saja yang bisa kas ampun dosa-dosa.”
22Tapi Yesus su tau yang dong pikir jadi De bilang dorang, “Apa yang kam pikir dalam hati? 23Kam pikir lebi gampang, bilang, ‘Ko pu dosa-dosa su dapa kas ampun,’ ato bilang, ‘Bediri deng jalan suda’? 24Tapi ini supaya kam tau kalo di dunia ini Sa, Anak Manusia yang Allah utus, pu kuasa kas ampun dosa.” Trus Yesus bilang sama orang yang lumpu itu, “Sa kastau ko, bediri, angkat ko pu tempat yang ko tidur trus pulang ke ko pu ruma!”
25Langsung orang yang tra bisa jalan tu, de bangun di depan dong smua. Habis tu de angkat tempat yang de tidur baru pulang deng puji Allah. 26Orang smua di situ dong heran, trus dong puji Allah. Deng rasa takut dong bilang begini, “Luar biasa skali pristiwa yang tong liat hari ini!”
Lewi tukang tagi pajak ikut Yesus
27Trus waktu Yesus kluar, De liat satu orang yang tukang tagi pajak. De pu nama Lewi, de ada duduk di tempat tagi pajak. Begini Yesus bilang ke dia, “Mari ko ikut Saya.” 28Dengar begitu, Lewi de bediri kas tinggal smua-smua trus ikut Yesus.
29Habis tu, Lewi bikin pesta makan-makan yang besar di de pu ruma untuk Yesus. Banyak orang-orang, tukang tagi pajak deng orang-orang lain juga ikut makan sama-sama deng Dia. 30Orang Farisi yang rajin ikut hukum Musa deng dong pu guru-guru agama sungut-sungut sama Yesus pu murid-murid, dong bilang, “Knapa kam makan minum sama-sama deng tukang tagi pajak deng orang-orang yang pu dosa?”
31Yesus jawab ke dong, “Bukan orang sehat yang perlu dokter, tapi orang sakit. 32Sa tra datang untuk panggil orang yang rasa diri benar tapi Sa datang untuk orang yang ada dosa, supaya dong kas tinggal dong pu sala baru balik sama Allah.”
Tentang puasa
33Orang-orang Farisi yang rajin ikut hukum Musa bilang ke Yesus, “Yohanes pu murid-murid biasa dong doa deng puasa, begitu juga tong pu murid-murid, tapi Ko pu murid-murid ni dong tinggal makan deng minum.”
34Yesus jawab dong begini, “Bisa ka, pengantin laki-laki pu teman dapa suru puasa pas pengantin itu ada sama-sama dong? 35Tapi nanti de pu waktu nanti, waktu pengantin itu su dapa ambil dari dong, pas waktu itu baru dong puasa.”
36Trus Yesus tamba crita satu conto lagi untuk dong tu begini,
“Trada orang to yang robek kain spanggal dari baju yang baru trus tempel di baju yang lama, percuma de su robek baju yang baru trus kain dari baju baru tu tra cocok deng baju yang lama itu. 37Begitu juga, trada orang yang isi anggur yang baru dalam kantong kulit yang lama, karna kalo bikin begitu anggur yang baru itu nanti bikin robek kantong itu, trus air anggur itu nanti tabuang-buang trus kantong itu rusak. 38Karna itu air anggur baru harus simpan di dalam kantong yang baru juga. 39Begitu juga orang tra mau minum air anggur yang baru kalo de su rasa air anggur yang lama. Karna de bilang, ‘Anggur yang lama tu lebi enak.’ ”