Ekfukfu, Mósisu onye kẹ Nchileke kfuru nụ Nchileke
1Nggụbe Ojejoje;
keshinu k'ede-nwede;
bụ nggu bẹ ayi nọhawa l'ẹka.
2Tẹmanu tẹ ugvu ugvu nọdu;
mbụ tẹmanu t'i mee eliphe; mẹ mgboko;
b'ị bụha Nchileke;
bụru Nchileke ono;
bẹ ịi-bụ jeye lẹ tutu yoyo.
3Iimeje tẹ madzụ ghọo ẹja.
Ịisuje ayi t'ayi nwụhu;
ghọo ẹja ọdo.
4Kẹ l'ụnu afa labụ l'ụkporo afa iri dụle ngu-a
l'ọ bụ ujiku lanụ;
mbụ l'ọ bụ nwa-njibu-ẹnya l'ẹnyashi lanụ.
5Iigudeje anwụhu kpofu madzụ
l'ọ bụ onye kpofuru ẹswa;
kẹle madzụ dụ l'ọ bụ iru ẹwu.
6L'ụtsu; bẹ ọonoduje aja pulapula.
O -be l'urẹnyashi;
yọ kpọo nkụ; kụlashihu.
7Oke ẹhu-eghughu ngu
adzụwa ayi l'ọ bụ ọku;
Ẹhu-eghughu ngu mewaru ayi;
meji atọshihu ayi.
8Ẹjo iphe ayi meshiru;
b'i doru ayi giriri l'ifu.
Ẹjo iphe ayi meru l'edomi;
b'i mewaru t'ọ daburu ngu ẹba l'ifu.
9Ndzụ ayi mgburumgburu
bụlephu oke ẹhu-eghughu ngu ejije iya.
Ndzụ ayi l'ọ ha abụjelephu ude ude.
10Iphe ayi anọ-beje bụ ụkporo afa ẹto l'afa iri.
Ọ -bụru onye karu nka;
yọ nọo ụkporo afa ẹno.
Obenu l'iphe ejije iya nụ;
abụkotaje iphe-ẹhuka; mẹ aphụ.
Ọphu o nwedu ẹge aanọ-beje;
yọ bụru iya ayi.
11?Bụ onye maru ẹge
ẹhu-eghughu ngu shihuberu ike.
?Bụ onye b'o doru ẹnya;
mbụ ẹge oke ẹhu-eghughu ngu habe nshinu;
k'ọphu ọo-nọdu atsụ ngu egvu?
12Menua tẹ ayi maru ọnu-ọgu
ụboku ayi lẹ mgboko;
k'ọphu ayi e-shi iya maru iphe.
13Nggụbe Ojejoje; tụshihuru ọkpoma.
Egbe iphe ọwaa;
?bụ teke ole b'ọ nọ-behunu?
Phụnuaru ayịbe ndu ozi ngu imiko!
14Tẹ n-yemobu ngu jijenu ayi ẹpho l'ụtsu;
k'ọphu ayi a-nọduje agụ egvu;
l'ete ẹswa teke ayi nọkwadua ndzụ.
15Menua t'ẹhu-ọtso-ẹna ayi
yẹle iphe-ẹhuka phụ,
i meru; ayi ejee phụ hakọ.
Menua tẹ afa ẹhu-ọtso-ẹna ayi
yẹle afa olemole phụ, ayi taru
chịchichi phụ; dụgbalephu.
16Menua tẹ ayịbe ndu ozi ngu;
phụ iphe iimeshi;
nggu emee t'ụnwu ayi;
phụ ẹge ike ngu dụ-be biribiri.
17Menua t'ayi tụba ngu l'obu;
nggụbe Nnajiufu, bụ Nchileke ayi.
Menua t'iphe bụ iphe
ayi byiberu ẹka bụru ayi ụpete.
Iyee! Mee tẹ iphe bụ iphe
ayi byiberu ẹka nweru ishi.