Egvu, e deru nụ onye ishi egvu tẹ Ụnwu Kora gụa
1Unu kụa ẹka; unubẹ ndiphe!
Unu gude ẹhu-ọtso-ẹna
chiaru Nchileke mgbe-egvu!
2Ishi iya abụru lẹ Ojejoje, bụ
Ọkaribe-Kakọta-Nụ dụ biribiri;
bụru iya bụ eze lẹ mgboko mgburumgburu.
3O wotawaru iphe bụ
mbakeshi ye ayi l'ẹka.
4Ọ bụ yẹbedua fọtaru ayi alị, ayi bu;
mbụ alị ono, Jékọpu, bụ
onye Nchileke yeru obu
egudeje eku onwiya ono.
5Nchileke ejewa l'aba-eze iya.
Eechiwaru iya mkpu
ẹhu-ọtso-ẹna;
l'egburu iya ụpyoku.
6Unu gụa egvu gude kele
Nchileke ekele!
Unu gụaru iya egvu ekele!
Unu gụa egvu gude
kele eze ayi!
Unu gụaru iya egvu ekele!
7Kẹ l'ọ bụ Nchileke bụ eze
lẹ mgboko gbaa mgburumgburu.
Unu raa ẹ́vù gude jaa ya ajaja!
8Ọ bụ Nchileke bụ eze iphe bụ mbakeshi.
Ọ nọ l'aba-eze iya, dụ nsọ.
9Ndu nweru ẹnya lẹ mgboko
dzukobekwaru l'ọ bụ
ndibe Nchileke kẹ Ébirihamu;
kẹle ndu eze, achị mgboko-a
bụkwa Nchileke nwe ẹphe.
Ọ kwa Nchileke;
bẹ kangokotaru nụ.