Hay Mikantah nan Way Behta
Hete ya psalm an intudo' Asaph, ya hay intud'ana ya nan ap'apun di muntudtuduh kanta, ya hay stylena ya gittith.
1Ikantaan tu'uh Apo Dios ti umipa'amlong an mangipabi'ah ay ditu'u,
at olton tu'un mangit'u' hi pundayaw tu'un Hiya an Dios Jacob!
2At ete"ayun mungkanta,
ya tukalonyu nan tambourine ya nan maphod di gangohna an lyre ya alpa.
3Ya ipagangohyu nan talampet hinan Akayangan di Bulan ya nan tumabaana goh
hinan gutud di algaw di behta tu'u
4ti hiyah ne ohah nan uldin hi mahapul an aton tu'un holag Israel an inyuldin nan Dios Jacob.
5Ya inyuldinah ne ta way unudon nan holag Joseph hidin nakakandad Egypt
an hiyah ne din nangngolanmih nan hapit an agguymi na'awatan
6an inalinay,
“Len'ah'u nan madamot an impipi'ugyu,
ya pinogpog'u nan papangdonanyuh nan madamot an bahkit.
7At hidin na'unglanyu ya numpahmo' ayu,
ya binaliwa' da'yu,
ya tembal'u da'yuh din wada' hidih nan ma'ugtul an mangmangitit an bunut.
Ya agguy nadnoy ya tinapnga' di pangulugyuh din wadanyud Meribah.
8At da'yun tatagu' ya ihamadyun donglon tun pamadan'un da'yu!
O Israel, maphod ni' hi unyu ihamad an donglon!
9Ma'ahhapul an adiyu dayawon nan bulul,
ya adiyu goh dayawon nan dios di udum an babluy!
10Ti Ha"in ya anggay hi Apo Dios hi immannung an Diosyuh nangibaliw ay da'yud Egypt ta enekak'u da'yu,
at Ha"in di pun'adawanyuh badang hi un way mahapulyu,
at umannung an idat'un da'yu.
11Mu nan tatagu' an holag Israel ya agguyda inunud din inali' ay dida
ti unna' at goh din'ug ay dida.
12At okodda ta atonda nan pohpohdondan aton,
ya nan itugunda ya hiyay unudonda.
13Gulatna ahan ta donglona' ay da'yun tatagu' an holag Israel
ta unudonyu nan pohdo' hi atonyu
14at punnaudo' an ipa'abak nan buhulyu ta diday pangidalhina' hinan pummolta' ay da'yu.
15Ta hanan bumobohhol ay Ha"in ya dayawona' mahkay an dumalat di ta'otda,
mu nan moltada ya mi'id di apogpogana.
16Mu da'yu ya nan ma"aphod an ma'an di ipa'an'u,
ya pa'inuma' da'yuh nan danum di iyu'an an ma'allameeh an nalpuh nan daplah ta nangamung hi un ayu mahengla.”