Luwaluh nan Mahdom hi Pun'adawan hi Badang
Hete ya psalm an intudo' David, ya hay intud'ana ya nan ap'apun di muntudtuduh nan kanta. Ya mahapul di instrumenton way gadengna ya un tukalon.
1Donglona' ni' hi unna' mumpabadang ay He"an na'ahhamad an Dios'u!
Ya badangana' ni' hinan aguguluwa',
at hom'ona' ni' ta abulutom nan luwalu'!
2Ya da'yun tatagun munha'it di panaphaphapitnan ha"in ya idinongyu!
Ya ipogpogyu nan nappuhin ugaliyu ya nan bubululyu!
3Mahapul an nomnomonyu an hi Apo Dios ya piliona nan nahamad di aatnah mihakup ay Hiya,
ya donglona' hi unna' munluwalun Hiya.
4Ya wa ay ta bumungot ayu ya elanyu ta bo'on hiyay dumalat hi pumbaholanyu,
ya pa'annomnomonyuy aat neh nan olo'anyuh nan mahdom.
5Ya mundenol ayun Apo Dios,
ya adi malgom di e'nongyun Hiya.
6Ya wadaday tatagun mangalih,
“Undan waday bumadang ay da'mi?”
At hiyanan ipattigmu ni' ahan di ama'ulaymun da'mi, Apo Dios!
7Ya nidugdugah di amlong hi impa'dammun ha"in
ya un nan pun'am'amlongan nan do'ol di inhabalna ya inyammanah ma'inum!
8At hiyaat unna' malenggop hinan mahdom an olo'a'
ti halimunana' an ipapto' ay He"a, Apo Dios, ta mid nappuhih ma'at ay ha"in.