Nan Hapit Apo Dios an Wah nan Puo'
Hi David di nangitudo' eten psalm.
1Da'yun a'anghel ya idaydayaw ya e'gonan tu'uh Apo Dios
ti nidugah di abalinana.
2Ya e'gonan tu'u nan ma"aphod an ngadana,
ya munluung tu'un mundayaw ay Hiya an na'ahhamad an mid nipaddungana.
3Ya wa ay ta humapit hi Apo Dios ya madngol hinan baybay ti ay idul.
4Nidugah di abalinan nan hapit Apo Dios,
ya ma'innilah nan panaphapitna an Hiya ya madayaw.
5Ya nan hapit Apo Dios ya puntomangna nan ayiw an cedars
ya ta"on nan ayiw an cedar ad Lebanon ya punggupungna.
6Ya paddungnay ipalattu'na an umat hinan uyaw an baka nan Duntug an Sirion ad Lebanon.
7Ya humapit ay hi Apo Dios ya umilat ad daya,
8ya miwogot goh nan mapulun,
ya ta"on nan Mapulun an Kadesh.
9Ya humapit ay goh hi Apo Dios ya etelona nan ayiw an oaks,
at mun'agah nan tubun di ayiw hi inalahan,
ya an amin nan tatagun wah nan Timpluna ya gunda it'u' an mangalih,
“Madayaw hi Apo Dios!”
10Hi Apo Dios di mumpapto' hi an amin an ta"on un hidin lobong,
at Hiyay alih mid pogpogna.
11Immannung an hi Apo Dios di mangidat hi abalinan nan tataguna,
ya wagahana dida ta malenggopda.