Hay Ingkantan David hidin Nangabakana
Hete ya psalm an intudo' David an baal Apo Dios, ya hay intud'ana ya nan ap'apun di muntudtuduh kanta, ya hay ipa'innilana ya nan namaliwan Apo Dios ay hiyah an amin hinan buhulna ya hinan Alin hi Saul. An inalinay:
(II Sam. 22:2-51)
1Pa'appohpohdo' He"a, Apo Dios, an nangidat hi bi'ah'u!
2Hi Apo Dios ya ay batun nahamad hi ipo"oya' ta mabaliwana'.
Hiya an nangibaliw ay ha"in hinan buhul'u ya umat goh hinan nahamad an allup unu hapiaw an mananin ha"in.
Nidugah di abalinanan mangibaliw ay ha"in ti umat nongkay hi batu an nahamad hi ipo"oyan!
3At hi Apo Dios an nahamad hi madayaw di numpabadanga',
ya immannung an binaliwana' ay Hiyah nan buhul'u.
4Ti hidin hi'ihi'itangan ataya' ya paddungnay unna' inloblob hinan do'ol an puma"i,
5ya paddungna goh di tali an nibobod ay ha"in
unu hulu ta nahulua' an mi'id di ato' an lumayaw.
6At gapuh nan nidugah ahan an numanomnoma' ya numpahpahmo'a' ay Apo Dios,
at dengngolnay luwalu' hidih nan Timpluna.
7Ya gapuh boholnah nan buhul'u ya immalyog tun luta,
ya ta"on nan nipognadan di duntug ya niwogot.
8At paddungnay mun'ahu' di olongna,
ya waday apuy hi bimmuhu' hi timidna an gumhob.
9Ya piniwa'nad daya ta nun'ohop an inggatinah nan ma"ang'angingitit an bunut.
10At nilugan hinan muntadyapan an cherubim an pun'iyaddib di mabi'ah an tuyup.
11An nale'woh di odolnah nan ma"ang'angitit an bunut an napnuh udan.
12Mu dumalat nan nidugah an humiliana ya nidugah an umanilat,
ya nun'a'agah di o"ongol an dalallu ya nan mundalang an apuy.
13Hiya an na'abbagbagtun Dios ya hay oha goh hi umatan di bungotna ya ay idul,
14at nun'ipalayawna nan buhul an dumalat hinan ilat an paddungnay nun'ipananan dida.
15Ya namaganan nan baybay ta ma"attig di dopona,
ya ta"on nan pognad tun luta ya nun'abudhan an dumalat goh nan nidugah an boholna!
16Ya ta"on un wad abuniyan ya paddungnay nunluung ta ginuyuda' hinan bunol di danum.
17Ta binaliwana' ay Hiyah nan mun'abi'ah ya nan ma'abohhol an buhul'u an nidugah di abalinanda ya un ha"in.
18Ti hidin gutud di nunligligata' ya immaliday buhul,
mu binaliwana' ay Apo Dios.
19Ya manu ay binadangana' ya binaliwana' ay Hiyah nan atata'ot an ma'at ay ha"in
ti umamlong ay ha"in.
20Ti miyunnudan hinan nahamad ya maphod an pangat'uy inatnan ha"in
21ti inunud'u nan Tuguna an agguy'u inat nan nappuhi ta agguy'u din'ug Hiya.
22Ya an amin din inyuldina ya immannung an inunud'u an agguy'u nginohoy,
23ya inilanan mi'id di numbahola' ay Hiya.
24At hiyanan indatna an Dios di lagbu' an miyunnudan hinan nepto' an aat'u
ti maphod di nangibilanganan ha"in.
25Ti minaynayun di pangipapto' Apo Dios hinan tatagun mangedenol ay Hiyah enggana,
at maphod di atonah nan maphod di pangatda.
26Ti nahamad di atonah nan maphod di ugalina,
mu moltaona nan mangat hi nappuhi.
27Ya nan mumpa'ampa ya baliwana,
mu nan mumpahiya ya diday mipa'ampa.
28Ya nipaddung hi Apo Dios hi dilag'u
ti ipapatalna nan adi maphod an punnomnom'u.
29Ya Hiya ay di bumadang ay ha"in ya abalina' an abakon nan mangubat ay ha"in,
ya Hiya ay di pi'yibba' ya abako' dida an ta"on un na'allup di babluyda!
30At Hiyay ay hapiaw an mananin amin hinan mihi'ug ay Hiya
ti na'ahhamad nongkay di aatna an ipa'annungnan amin di ibagana.
31Hiya ya anggay di Ap'apu,
ya Hiya ya anggay di mipaddung hinan batu an abaliwan tu'u.
32Hiyay Dios an alpuwan di bi'ah'u,
ya Hiyay mangipaphod hi aat'u ta nahamad.
33Ya Hiya nongkay di mangidat hi abalina' an tumagtag an umat hi amabi'ah di ulha
ta umuya' mipo"oy hinan ata'nang an duntug ta mabaliwana'.
34Ya idatnay abalina' an mi'gubat ta olog'un oladon di gambang an pana.
35At hiyanan nangabakona',
ya impabagtua' an gapuh badangnan ha"in.
36Ya gapuh nangipapto'anan ha"in at paddungnay agguya' nihungpul hinan dalan!
37Mu ha"in di numpamdug ay dida ta engganay un'u numpatoy didan amin.
38At hiyanan mid mangiballoh
39ti indatnay bi'ah'un ni'gubat ta inabak'u nan buhul'u.
40Ya impata'otna dida ta limmayawda,
at numpatoy'u didan ma'abohhol ay ha"in.
41Ya hidin nanganapandah bumadang ay dida ya mi'id,
ya ta"on unda numpahpahmo' ay Apo Dios mu agguyna binaliwan dida.
42At hiyanan numpatoy'u dida an paddungnay un'u nunggumu' dida
ta engganay unda numbalin hi hupu' unu pito' hinan kalata!
43At immannung an binaliwana' ay Apo Dios hinan nangohoy an tatagu
ta numbalinona' hi ap'apun di tataguh nan abablubabluy an ta"on hinan agguy nanginnilan ha"in.
44Ya an amin di ibaga' ya unudonda
45ti din buhul'u ya wumogwogdan mumpangabuhu' hinan nipo"oyanda
ta umalidan mumpa'ampan ha"in.
46At madayaw hi Apo Dios an wagwadah enggana!
Hiyay ay batu an nahamad hi ihi'ugan an mamaliw ay ha"in!
47Hiya nan Dios an mangiballoh hinan buhul'u,
at numbalinona' hi ap'apuh nan abablubabluy
48ti binaliwana' hinan aton nan mun'abungot an buhul'u,
at impabagtua'.
49At hiyanan nan anabagtun Apo Dios di hapihapito' hinan tataguh nan abablubabluy,
ya ikankanta' goh di pundayaw'un Hiya
50ti nangabakona' an alin pento'na,
ya impattignay anidugah di homo'nan ha"in an hi David ya hinan holag'uh enggana!