1Pakai chu thangvah’un! Vannhoa kon’in Pakai chu thangvah’un! Vanthamjol-a kon’in Amachu thangvah’un! 2Avantilte jousen thangvah’un! Van sepaite jousen thangvah’un! 3Nisa le lha-in amachu thangvah’un! Aphelhet lhet ahsi hon Amachu thangvah’un! 4Achungsang lam’a um vantham jol’in thangvah’un! Meilom chung sangpeh’a um meitwi hon Amachu thangvah’un! 5Thilseho jousen Pakai chu thangvahna peuvin, ajeh chu Aman thu apen ahileh amaho chu ahung kisemdoh jengun ahi. 6Aman tonsot tonsot geija dinga anagontohsoh ahitai. Ama daan semchu itih hijongleh kikhokhel louding ahi. 7Leisetna kon in thangvah’un, twikhanglen lailunga thilsemhon thangvah’un, 8meileh gel hon, buhbang leh meilom hon thangvah’un, huileh adap asatnin Ama thu chu ngaijun. 9Mol leh lhangho, aga nei thingphung ho le Cedar thinghon, 10gamsa ho le ganhingho jousen, ganhing neochacha ho le vacha hon, 11leiset chunga lengho le mipite jousen, leiset chunga vaihom hole thutanho jousen, 12pasal khangthah ho le numei khangthah hon, tehse hole chapanghon, 13abonchauvin Pakai min thangvah’u hen! Ajeh chu Aminhi aloupi lheh jenge, hiche amin loupina hi leiset le vanho jouse sanga sangjo ahi. 14Aman amite chu ki khat atundohpeh tan ahi, amadinga kitahna neijouse Aman angailut Israel mipite chu jana apetan ahi. Pakai chu thangvah’in umhen!