1O Pakai, eihuhhing’a ka Pathen, sunleh nangma kakou in, jan leh nakom kahin nailut ji e. 2Tun kakouna neijah peh’in lang katona neisan peh’in. 3Ajeh chu kahin khohi boina adim in, thinan eikainai chehcheh e. 4Athisa bang bep kahitai, mithahat tah khat athahat na bei nungsang bep kahitai. 5Amahon mithi lah’a eidalha uvin lhan ah mithi lup’in kalum e. Keima hi suhmil in kaum tai,nami kaihoina a kon in eiki lamang tai. 6Nang in kotong noinung pen athim pen ah neison lha e. 7Nalung han na gihtah chun eidelphan, hichu twi kinong bangin akinong’in eichup tai. 8Keima hi doumah in neisem in kagol kapai ho neidelmang peh gamtai. Keima hi thang’ah ka-oh in kiteldoh theilouvin kaum e. 9Kamit lhin kamit achupmin kho muthei louvin kaum e. O Pakai niseh’in na panpina kathum in nami lungsetna ngaichan kakhut teni kahin sange. 10Nathil kidang bol hohi mithi dinga phachom ding hinam? Mithi hungthodoh a nathangvah theiding hinam? 11Lhankhuh a kon in amahon nami ngailutna longlou hi ahin phongdoh theina diuvem? Suhmangna mun’a umhon nakitah nahi aphongdoh theina diuvem? 12Muthim’in nathilbol kidang hohi aseiphong nadiuvem? Thil suhmil delna gam'a umhon na chonphat na hochu aseiphong theina diuvem? 13O Pakai nangma kakouve,niseh-a nakom a katao jingding ahi. 14O Pakai, ibola kei nei paidoh hitam? Ibol a kei a kon a naki heimang hitam? 15Kakhang don lai a pat a, kanatna hin thina komcha eina lhutsa ahitan, nagim neina masanga hin thabei leh lungkham tah’in kading e. 16Nalunghan na tijat umtah chun eilonvuh’in, tijat naumna chun eithabei sah e. 17Hiche hochun sun nilhum in twisoh bangin kavel a eilon khum un ahi. Muthimhi kakinai pipen kagol in apang un ahi.