1Ka Apollos daa nam be Korint teŋin la ka Paul doli teensin n gaadi keŋ Efesus teŋin. Anina ka o nye nyaꞌandolib sieba, 2ka buꞌosi ba ye, “Yanam n niŋ Yesu yadda la, ya diꞌe Winaꞌam Siig Suŋ laa?”

Ka ba lebis ye, “Ayei, ti nan ziꞌ wum ye Siig Suŋ bee.” 3Ka Paul buꞌosi ba ye, “Bo kuꞌom suub ka ya diꞌe?”

Ka ba lebis ye, “Li ane Joon kuꞌom suub la ka ti diꞌe.”

4Ka Paul yel ye, “Joon kuꞌom suub la paꞌalne ye ya tiake ya tuumbeꞌed sueya. Ka Joon daa paꞌal Jew dim ye ba dol one na kenne on Joon nyaꞌaŋ la na, ka o yuꞌur buon Yesu.” 5Ban wum neꞌeŋa la ka diꞌe kuꞌom suub Zugsob Yesu yuꞌur zug. 6Ka Paul noki o nuꞌus paꞌal ba zutin ka Winaꞌam Siig Suŋ la keenn ba saꞌan na ka ba pianꞌad pianꞌazuna ka diꞌe Winaꞌam pianꞌad n tis nidib. 7Ba daa ane wuu nidib piina ayi.

8Ka nwadisa atanꞌ ka Paul kpenꞌed Jew dim laꞌasug doogin pianꞌad n tisid nidib ne sukpiꞌeuŋ ka tuꞌasidi ba Winaꞌam naꞌam yela n kpeꞌeŋid ye o fendigi ba. 9Ka sieba mor zukpiꞌeuŋ ka pu siake, ka pianꞌad pianꞌayood Zugsob suer la yela paalo ni. Ka Paul ne nyaꞌandolib sieba basi ba ka toom. Ka daar wusa ka o tuꞌasid nidib Winaꞌam yela, Tirannus paꞌalug doogin, 10ka niŋ neꞌeŋa yuma ayi. Ka nidib wusa bane be Asia teensin wum Zugsob pianꞌad, Jew dim ne bane kaꞌ Jew dim la wusa.

11Ne Winaꞌam paŋ Paul daa tum tuumnyalima hale. 12Hale ba daa nok pien ne fuud line siꞌisi o niŋgbina la more keŋ banꞌadnam ni, ka ba paam laafe, ka kikiris yi ka bas sieba.

13Ka Jew dim sieba ban daa giligid n kat kikiris nidib saꞌan la, daa makid ye ba kat kikiris ne Zugsob Yesu yuꞌur n yet kikiris la ye, “M yeti ya ne Yesu yuꞌur, on ka Paul moon o yela la, ye ya yim.” 14Ba daa ane Jew dim maalmaan kpeenm on yuꞌure buon Seva la biisa ayopoi daa tum neꞌeŋa. 15Amaa ka kikirig la lebis ye, “M miꞌ Yesu ka miꞌ Paul. Ka yanam a anoꞌonama?” 16Ka one mor kikirig la due paami ba nyaŋe ba, ka ba yi yin la biel ne sapoꞌat.

17Ka Jew dim ne bane kaꞌ Jew dim wusa bane be Efesus teŋin wumi li yela. Ka dabiem kpenꞌ ba wusa. Ka ba duꞌosid Zugsob Yesu yuꞌur. 18Ka yadda niŋidib bedego keŋ nidibin na n peligi ba poosi tuꞌasi ba tuumbeꞌed. 19Ka tiim dim sieba more ba gbana na laꞌase nyuꞌe bugum ka li di soꞌ mekama nini ni. Ka ba gelig gbana la ligidi ka li a anzurifa ligidi tusa piisnu. 20Ala ka Zugsob pianꞌad la kpelim yadigid ka paasid ne paŋ.

21Neꞌeŋa nyaꞌaŋ ka Paul tenꞌes o sunfin ye o na gaadi yi Masedonia ne Akaia teensin n keŋ Jerusalem, ka ye, “M yaꞌa keŋ anina, asee ka m laꞌam keŋ Room teŋin.” 22Ka o tum o suŋidiba ayi ka ba yuda buon Timoti ne Erastus, Masedonia teŋin ka on meŋ kpelim Asia n yuug biꞌela.

23Saŋkan la Zugsob suer dolim daa ane yela hale Efesus teŋin. 24Dau soꞌ daa be ka o yuꞌur bun Demetrius. O da more anzurifa kunt siꞌelnam ka li wenne Artemis puꞌusum doog ne. Ka li niŋ nyood bedego n tis anzurifa tumtumnib la. 25Ka o laꞌas o tumtum taab n yel ye, “Nidiba, ya miꞌ ye tuumbama nwa ni ka ti kpanꞌam yit na. 26Ya wumya ka ya meŋ nye Paul n niŋid siꞌem la. Li kaꞌ Efesus teŋin maꞌanee, amaa laꞌam ne Asia soꞌolim wusa, o kpeꞌeŋi nyaŋe fendig nidib bedego n yet ye wina ban ka nidib me ne ba nuꞌus la kaꞌ winaa. 27Line pak kaꞌane ti tuuma la saꞌuŋ maꞌane, amaa Artemis paŋ me na saꞌam, one mor paŋ ka Asia soꞌolim wusa ne dunia nidib wusa puꞌusid la. Ba yaꞌa pu niŋ siꞌela, o puꞌusum doog la na lieb zaalim.”

28Ban wum pianꞌad bama la ba sunya peligne ka ba tans ye, “Efesus dim win Artemis ane one mor paŋ la.” 29Ka tukpeedug yadig teŋin la wusa. Ka nidib la gbanꞌe Gaius ne Aristarkus babayi bane a Masedonia teŋ nidib n dol Paul la, n zo ne ba keŋ antuꞌa doogin. 30Ka Paul bood ye o kpenꞌ nidibin la amaa ka o nyaꞌandol taaba pu siake. 31Ka kpeenmnam sieba bane aa o zuanam tum o saꞌan na belim o ye o da kpenꞌ antuꞌa doogin laa.

32Ka tukpeedug due nidibin la ka ba tansid konꞌob konꞌob, ba bedego ziꞌ line ke ka ba laꞌas la zug. 33Ka Jew dim gaŋ Alekizanda ka o ziꞌe nidib la tuon, ka sieba tenꞌes ye one soꞌe antuꞌa la. Ka Alekizanda paꞌal ne o nuꞌus n kpeꞌeŋ ye o pianꞌa n tis nidib la. 34Amaa ban baŋ ye o ane Jew nid la, ka ba wusa laꞌase maal tukpeedug yuug hale yel ye, “Efesus dim baꞌar Artemis ane one mor paŋ.”

35Ka teŋ la kpeenm maꞌae ba ka yel ye, “Efesus nidiba, dunia nidib wusa miꞌ ye Efesus dim gur Artemis one mor paŋ la doog, ka laꞌam gur kugir kane naam saazug lu la na. 36Soꞌ ku nyaŋe kiꞌis yel bamaa. Dinzugo kel tukpeedug ka da niŋ sukpiꞌeuŋ yoode. 37Ya mor nimbama kpela na ka ba me pu yel yelbeꞌed n tisi ya baꞌar la bee maal yelbeꞌed n tis o puꞌusum doogo. 38Ka Demetrius ne o tumtumnib yaꞌa moren pianꞌad ne soꞌ, antuꞌa dabisir be, ka bane mor kpiꞌeuŋ be. Dinzug ya tunꞌe mor taaba paae antuꞌa tuꞌad la tuon. 39Amaa ya yaꞌa lem bood siꞌel n paas, li na maal ne teŋ nidib laꞌasugin. 40Yanam maal siꞌel zina la zug, ti mor yel, bane ied zaba la maꞌad ziri. Ti ku nyaŋe yel lin ke ka ba maal tukpeedug bama. Ti me ku nyaŋe tuꞌasi li gbin nyainee.” 41On yel neꞌeŋa naae la ka yeli ba ye ba widigim.