1Dau soꞌ daa be Sizerea, ka o yuꞌur buon Konelus. O daa ane sogianam kobuga kpeenm ka ba buoni ba ye Itali sogianam. 2O daa ane ninsuŋ ka puꞌusid Winaꞌam, on ne o yidim wusa, ka suŋid Jew dim bane a noŋ dim, ka puꞌusid Winaꞌam daar wusa. 3Ka nintaŋ gbiꞌir win ka li wenne zaansuŋ ne, ka o nye malek nyain. Ka malek la yi Winaꞌam saꞌan n kpenꞌ o saꞌan n buol o ye, Konelus.

4Ka on nye malek la ka dabiem kpenꞌ o ka o yel ye, “Naa, wala?”

Ka o lebis n yel o ye, “Fu Winaꞌam sosug ne fu tuumsuma la paae Winaꞌam saꞌan, n tienn Winaꞌam fu yela. 5Tum nidib Joppa teŋin ka ba mor Simon Piita na. 6O signe Simon one a gbanzab la yin. Ka o yir kpiꞌene ateuk la.”

7Ka malek la n tuꞌas o naae ka keŋ la, ka Konelus buol o tumtumnib ayi ne sogiasuŋ yinni, one be bane tum o tuuma la saꞌan, 8ka tuꞌasi ba siꞌel wusa n naae, ka tumi ba Joppa teŋin.

9Ka beog nie ka ba be sueren n liꞌel teŋ la, ka Piita du doog zug nintaŋ soos ye o sos Winaꞌam. 10Ka o koꞌom daa zabid ka o bood diib ye o di. Ban nam be anina n maan diib la, ka li wenne o zaansim ne. Ka o nye 11ka arazana yoꞌog, ka siꞌel wenne pientitaꞌar ne n lo li luas anaasi sigid dunia ni na. 12Ka bunkonbid wusa laꞌam ne bunvuuda ne niis buudi wusa bee li poogin. 13Ka o wum kukor ka li yel ye, “Piita, duom kuu li n di.”

14Amaa ka Piita lebis n yel ye, “Ayei, Zugsoba, m nam ziꞌ di line kisa ka a dianꞌade.”

15Ka kukor la lem yel o yaꞌas ye, “Bun lin ka Winaꞌam maal suꞌuŋa la, mit ka fu ye li kisa.”

16Ka li niŋi ala noorimbutanꞌ, ka yuꞌun leb arazana ni.

17Ka Piita daa biꞌesid o potenꞌerin bun lin ka o nye la gbin. Ka bane ka Konelus daa tum la, buꞌos Simon yir zinꞌig n kena ziꞌe yaŋirin, 18ka buol n buꞌos ye ba baŋ ye Simon Piita la sig ne anina bee?

19Ka Piita nan tenꞌesid lin ka o nye yela la, ka Winaꞌam Siig Suŋ yel o ye, “Gosima, dap atanꞌ bood uf. 20Duom sig n bieli ba ka da biꞌesida; ka mane tumi ba na.”

21Ka Piita sig teŋin n keŋ dap la saꞌan n yeli ba ye, “Mane la ka ya bood la. Ya ken labaar a bo?”

22Ka ba yel o ye, “Konelus on a sogianam kobuga kpeenm, ka a ninsuŋ n puꞌusid Winaꞌam, ka Jew dim soꞌolim wusa pianꞌad o yel suꞌuŋa la, ka Winaꞌam daa tum o maleksuŋ o saꞌan n saꞌal o ye, o tum buol uf na ka fu na tuꞌas o fun mor siꞌel.” 23Ka Piita diꞌe ba. Ka ba gbeenn o saꞌan.

Ka beog nie ka o due n doli ba. Ka yadda niŋidib sieba ban be Joppa la biel o n keŋ. 24Ka daba ayi daar ka ba paae Sizerea teŋin. Ka Konelus daa guri ba ka buol o duꞌadib ne o zuanam n laꞌas. 25Ka Piita n kpenꞌed la ka Konelus tuꞌos o n igin o tuon n puꞌus o wenne Winaꞌam. 26Amaa ka Piita due o ka yel ye, “Ziꞌenim, ka mam me ane dau wuu fun a siꞌem la.”

27Ka ban pianꞌad ne taaba la ka kpen nye ka nidib bedego laꞌas taaba. 28Ka o yeli ba ye, “Ya meŋ miꞌ ye Jew dim kis ne ban na laꞌas ne nid soꞌ one a buud zoŋ, bee ba kpenꞌ o yin. Amaa Winaꞌam pun paꞌal man ye m da buol nid ye o a dianꞌad daana. 29Alazug ka fu tum buoli m ka m pu zanꞌase, ka kena. Bo yela ka fu tum buoli ma?”

30Ka Konelus lebis n yel o ye, “Dabisa anaasi nwa gaad saŋkaŋa nwa win, ka m daa be yin n sosid Winaꞌam. Ka dau soꞌ ye fuug ka li nie nyain n ziꞌe m tuon, 31ka yel ye, ‘Konelus, Winaꞌam wum fu sosug la, ka tenꞌes tuumsuma ban ka fu maan la. 32Dinzugo tum Joppa teŋin n buol Simon Piita na. O sig ne Simon yin, one a gbanzab ka o yir kpiꞌe ateuk la.’ 33Alazug ka m tum yimmo, ka fu maal suꞌum ka kena la. Ti wusa be Winaꞌam tuon kpela ye ti wum bun lin wusa ka Zugsob la yel ye fu tuꞌasi ti la.”

34Ka Piita yaꞌae o noor n yel ye, “Yelmeŋir, m baŋ ye Winaꞌam pu gaansid nidiba. 35Amaa ye buudi wusa ni soꞌ yaꞌa puꞌusid o ka maan line a suꞌum, on daana paae o yaꞌam. 36Ya miꞌ labaar kan ka Winaꞌam tum Israel dim saꞌan n moon sumalisim labasuŋ la Yesu Kiristo maꞌasim zug, one a ti wusa Zugsob. 37Ya miꞌ tuum kane daa pun maal Juuda teŋin wusa la yela. Li daa pinꞌil ne Galilee teŋin Joon n daa moon kuꞌom suub yela la nyaꞌaŋ. 38Ya miꞌ Yesu one yi Nazaret la yela, Winaꞌam daa tis o Siig Suŋ ne paŋ siꞌem ka o daa keŋ zinꞌig wusa n tum tuumsuma, ka maꞌed ban wusa ka Sutaana daa namisid la. Ka Winaꞌam daa be o saꞌan.

39“Ti nye bun lin wusa ka o tum Jew dim teŋin ne Jerusalem la. Ba daa yaꞌal o dapuudir zug n kuu o. 40Amaa Winaꞌam daa due o dabisa atanꞌ daar la, ka ke ka o nie o meŋ paalo ni, 41tinam bane ka Winaꞌam daa gaŋ la saꞌan. Ka ti tuꞌasid nidib bun lin ka ti daa nye la, tinam bane laꞌam di ka nu ne o la, o kuꞌum vuꞌugir nyaꞌaŋ la. O lee daa pu nie o meŋ nidib wusa saꞌane. 42O yeli ti ye ti moolim yel nidib ye on ka Winaꞌam zaŋ n ziꞌel ye o kat bane voe ne bane kpi la saria. 43Winaꞌam nodiꞌesidib la wusa da tuꞌas o yela, ye on mekama niŋ Yesu yadda, Winaꞌam na yiis o daana tuumbeꞌed n bas o yuꞌur poogin.”

44Piita n nan kpelim tuꞌasid neꞌeŋa la, ka Winaꞌam Siig Suŋ la sig ban wusa wum pianꞌad la zutin. 45Ka Jew dim yadda niŋidib bane kenn ne Piita la na lidig ne ban nye ka Winaꞌam tisid nimbane kaꞌ Jew dim buudi la o Siig Suŋ la, 46ne ban wum ka ba pianꞌad teŋzuŋ pianꞌad n duꞌosid Winaꞌam yuꞌur la zug.

47Ka Piita yel ye, “Nimbama nwa diꞌe Winaꞌam Siig Suŋ la wenne tinam daa diꞌe siꞌem la. Ka anoꞌone na kadi ba Winaꞌam kuꞌom suub diꞌere?” 48Ka o yeli ba ye ba diꞌem kuꞌom suub ne Yesu Kiristo yuꞌur. Ka ba sos Piita ye o kpelim ba saꞌan dabisa biꞌela.