Winaꞌam Siig Suŋ la ken la na yela
1Ka Pentekost daar n paae la, ka ba wusa daa be zinꞌig yinni. 2Ka toꞌoto yim ka vuud yi arazana ni na n wenne sisiꞌem titaꞌar ne, n peꞌel doog kan ka ba be la. 3Ka ba nye siꞌel lin wenne bugum zilima ne, n pudug n zoon ba wusa yinni yinni zutin. 4Ka Winaꞌam Siig Suŋ daa peꞌeli ba wusa, ka ba pinꞌil n pianꞌad ne teŋzuŋ pianꞌad wuu Siig Suŋ la n tisi ba siꞌem la.
5Ka Jew dim sieba ban yi dunia soꞌolim wusa na, daa be Jerusalem ni. Ba daa ane bane dol Winaꞌam suer suꞌuŋa. 6Ka nidib bedego n wum vuud la, ka ba laꞌas taaba, ka li lidigi ba bedego, bozugo soꞌ wusa wum ban pianꞌad o meŋ buudi pianꞌad. 7Ka ba lidig n buꞌosid taaba ye, “Gosima, nidib bane pianꞌad nwa wusa kaꞌane Galilee dim bee? 8Ka li niŋ wala ka ti wusa yinni yinni wum ka ba pianꞌad tinam buudi pianꞌade? 9Ti yi ne Partia ne Media ne Elam ne Mesopotamia ne Juuda ne Kapadosia ne Pontus ne Asia, 10ne Frigia ne Pamfilia ne Egipiti ne Libiya lin kpiꞌe Sairene ne saam ban yi Room teŋin la, Jew dim ne sieba bane kaꞌ Jew dim buudi, ka lee doli ba malima, 11ne Krete dim ne Arabia dim. Ka li niŋ wala ka tinam wum ka ba pianꞌad ti buudi pianꞌad n yet tuumtitada ban ka Winaꞌam tum la?” 12Ka ba lidig n buꞌosid taaba ye, “Yel kaŋa nwa gbin lee a bo?”
13Amaa ka sieba poꞌogi ba, ka yet ye, “Nimbama nwa nune daam n kool.”
Piita moolug la yela
14Ka Piita due ziꞌen ne Tumtumnib piina yinni la, n yeli ba ne kukotitaꞌar ye, “Juuda dim, ne bane be Jerusalem nwa ni, ya wusa baŋim yelkaŋa, ka kelis man ye m tuꞌasi ya yel siꞌa la. 15Li nan ane beogin, dinzugo nidib nwa ku nu daam n kool wenne yanam tenꞌesid siꞌem laa. 16Amaa neꞌeŋa ane bun lin ka Winaꞌam nodiꞌes Joel da pun sob li yela la ye,
17Winaꞌam yel ye,
‘Dunia naar yaꞌa ti liꞌel,
m na buꞌe m Siig Suŋ la n niŋ ninsaalib buudi wusa zut.
Ka ba biribis ne ba bipumis na diꞌe Winaꞌam pianꞌad n tis nidib.
Ka ba dasam na nye Winaꞌam yela wuu zaansuŋ ne.
Ka ba niŋkuda me na zaansim.
18Ka saŋkan la m na buꞌe m Siig Suŋ la niŋ m tumtum dap ne m tumtum poꞌab zutin.
Ka ba na diꞌe m pianꞌad n tis nidib.
19M na maal bunnyalima agol ka maal zanbina dunia zug.
Ziim ne bugum ne walim ne nyoꞌos na ti be.
20Nintaŋ na ti lieb lik,
ka nwadig muꞌe wenne ziim ne,
ka Zugsob lebig daar la nyaan paae.
21Ka lin saŋa la, on wusa buol Zugsob yuꞌur,
o na nye faangir.’
22“Israel dim wusa, wumi pianꞌakaŋa nwa. Winaꞌam daa tum tuumnyalima ne bunnyalima ne zanbina Yesu saꞌan, one a Nazaret dau la, ka paꞌali ba ye one tum o ba saꞌan. Ya pun miꞌ neꞌeŋa, bozugo li daa maali ya saꞌan. 23Winaꞌam pun miꞌ siꞌel wusa. O boodim la zug, ka o zaŋ Yesu niŋ ba nuꞌusin ka ba ke ka nimbeꞌednam gbanꞌe o n kpaꞌ o tabil dapuudir zug n ku. 24Ka Winaꞌam saꞌam kuꞌum paŋ ka vuꞌug o kumin, kuꞌum ku tunꞌe mor o la zug. 25David da pun tuꞌas o yela sa ye,
‘M nyet Zugsob la m tuon daar wusa.
On bee ne man la zug,
soꞌ ku nyaŋe niŋi m siꞌel la.
26Dinzugo m mor sumalisim,
ka pianꞌad sumalisim pianꞌad.
Ala men, m mor tiꞌir, man na kpi,
27ka Winaꞌam ku basi m siig kpiꞌim teŋ la zug.
O ku ke ka mam one a o Ninsuŋ la punꞌe.
28On ke ka m baŋ o nyovur suer la zug,
ka m mor sumalisim bedego o tuon.’
29“M zuanama, keli ka m ansig n tuꞌasi ya, ti yaab naꞌab David yela. O da kpine ka ba pinꞌ o yaugin. Ka o yaug be ti saꞌan kpela hale n paae zina. 30David da ane Winaꞌam nodiꞌes ka baŋ ye Winaꞌam po ne ziꞌel ye o na ke ka nid yinni yi o yaas la sisoog n zinꞌin o naꞌam gbauŋ la zug. 31Dinzugo David da pun deŋi nye Winaꞌam da ye o tum siꞌem la. Ka tuꞌas Kiristo kuꞌum vuꞌugir yela ye,
‘Winaꞌam ku bas o kpiꞌim teŋ, bee ke ka o niŋgbiŋ punꞌe.’
32Yesu la nwa, one ka Winaꞌam vuꞌug o kumin la. Ka ti wusa nye li, ka tuꞌasi ya li yela. 33Dinzug ka Winaꞌam duꞌos o n ziꞌel o datiuŋ, ka o diꞌe Siig Suŋ, line ka o pun yel ziꞌel la. Yanam wum ka nyet siꞌel nannanna la, a piini line ka o tisi ti. 34David meŋ da pu du arazana ni. Amaa o meŋ da yel ye,
‘Zugsob la yel m Zugsob ye,
“Zinꞌinim m datiuŋ,
35n gur saŋa kan ka m na ke ka fu biꞌemnam lieb fu noba kuk.” ’
36“Dinzug, keli ka Israel dim buudi wusa baŋ yelmeŋir ye Yesu kan ka ba daa kpaꞌ tabil dapuudir zug n ku la, on la ka Winaꞌam paꞌali ya ka o a Zugsob ne Kiristo.”
37Nidib la n wum pianꞌad nwa la, ka li kpenꞌ ba sunya ni hale, ka ba buꞌos Piita ne Tumtumnib la ye, “Ti baꞌabiise, ti na niŋ wala?”
38Ka Piita lebisi ba ye, “Tiakimi ya sunya, ka ya wusa yinni yinni diꞌe Winaꞌam kuꞌom suub ne Yesu Kiristo yuꞌur, ka Winaꞌam na yiisi ya tuumbeꞌed n bas. Ka ya na diꞌe Winaꞌam piini line a o Siig Suŋ. 39Noor ziꞌelug la ane ya din ne ya biis din ne bane be lalle, hale ne nidib bedego ban ka Zugsob la na ti buoli ba o saꞌan la.”
40O daa pianꞌ pianꞌad sieba bedego n saꞌali ba ne nimmua n yeli ba ye, “Yiisim ya meŋ ne zumaaŋ kaŋa nimbeꞌednam la saꞌan.” 41Ka bane daa siak Piita pianꞌad la daa diꞌe kuꞌom suub. Ka daar kan la, nidib bane daa paꞌas ba ni la wenne tusa atanꞌ. 42Ka ba daa kpelim ziꞌe kiŋkiŋ ne Tumtumnib la paꞌalug. Ka mor noor yinni ka laꞌasedi dit diib ne taaba ka sosid Winaꞌam.
Yadda niŋidib la beilim tuuma la yela
43Ka dabiem daa kpenꞌ nidib la wusa, ka Winaꞌam ke ka Tumtumnib la tum tuumnyalima ne zanbina bedego. 44Ka nidib ban daa niŋ yadda la wusa daa mor noor yinni ka pudugid ban mor siꞌel wusa ne taaba, 45ka kuos ba laꞌad ne ba arazaꞌas wusa n pudug n tis on mekama nar ye o diꞌe siꞌem. 46Ka daar wusa ka ba laꞌased Winaꞌam puꞌusum yin, ka me laꞌased yir yir n dit ne taaba, ka mor sumalisim ne poog yinni, 47ka duꞌosid Winaꞌam yuꞌur suꞌuŋa, ka paam bareka nidib wusa saꞌan. Ka Zugsob paasid bane ka o tilig daar wusa la n laꞌased yadda niŋidib la saꞌan.