Taitala guyau la biga katotila
1Mwa Guyau! Bawosi baisa yoku,
e bawosi butusi ninatotila deli karaiwaga duwosisia.
2Komwaidona ulo wotetila bisisu bwainawokuva wala.
Ki, avai tutaga bukumakaiagu?
Yeigu basisu ogu bwala tomigileu wala,
3e deli gala batagwala avai mitugaga bisisu baisa.
Matausina itotubulokaisi metoya baisa Yaubada,
si kidakeda avigaki kwekukologu goli.
Gala wala sitana bimmweiki wowogu paila vavagi makwaisina.
4Yeigu gala wala basasopa,
e deli gala wala avai tuta batagwala vavagi gaga mwada bipilasi ulo kaisisu.
5Yeigu bogwa wala bayabi availa availa matausina
ikikasilamsi mitugaga paila tomota ituwoli.
Yeigu gala batugwali tomota matauna
availa saina tokaluvalova deli tokamnomwana.
6Yeigu babigibwaili matausina availa availa deli si kimadagi baisa Yaubada,
e batugwali bisisuaisi ogu ligisa.
Matausina mokwitatoula wala tokamokwita
ibodi batugwali matausina biwotitalaigusi.
7Gala batagwala avai tosasopa bisisu ogu ligisa,
e deli gala avai tokwatudewa gaga batagwala bitotu omatagu.
8Yumyambwata yeigu bakatumati
tomitugaga oma valusi.
Yeigu babokavili komwaidosi tomitugaga
metoya ola valu Guyau.