Bibeli Luayãtaalá Soũↄ 119

Gbãakpaa Lua yã́wa

1Báaadeↄn gbɛ̃́ pↄ́ aa ku tàaesai

aa Dii ikoyã kũaↄ ũ.

2Báaadeↄn gbɛ̃́ pↄ́ aaì Dii yã'onɛ ma

aaì aà kĩ́i wɛɛlɛ ń nↄ̀sɛmɛndooↄ ũ.

3Aali yãkpaanlakɛo,

aaì aà dↄ̀ↄ sɛ́.

4N n ↄtondↄkĩi ↄ̀lↄwɛ̃ɛ,

kɛ́ wàↄ tɛi ń laaio.

5Má ye màↄ ku ma dↄ̀ↄwaɛ,

míↄ n yãdilɛnɛↄ kũa.

6Tó má n yãdilɛaↄ kũa píi,

bee a to wí ma kũo.

7Gↄↄ pↄ́ málɛ n yãmaapiↄ dada,

má n sáaukpa ń nↄ̀sɛpuaoɛ.

8Máↄ n yãdilɛnɛↄ kũaɛ,

ńsu ma to we míↄmiↄo.

9Kpelewa ɛ̀waaso a kɛ àↄ ku gbãlɛsaii?

Sema aà yãkɛa kpaaĩ ń n yã́o.

10Málɛ n kĩ́i wɛɛlɛ ń nↄ̀sɛmɛndoo,

ńsu to mà pãalɛ n yãdilɛaↄnɛo.

11Ma n yã́ dà ma sↄ̃ guu,

kɛ́ másu duunakɛnɛo yã́i.

12Ma n sáaukɛ̀, Dii,

ǹ n yãdilɛnɛↄ damɛɛ.

13N ikoyã pↄ́ bↄ̀ ń lɛ́uↄ píi,

má dau siu nɛ́ɛ.

14Málɛ pↄnakɛ ń n yã'onɛↄ

lá wì kɛ ń àizɛɛowa.

15Málɛ n ↄtondↄkĩi wàaipa,

ma làasoo ku n kɛkɛáↄwa.

16Ma pↄ kɛ̀na n yãdilɛaↄwa,

n yã́ a sãmaguo.

17Yãmaakɛ mapi n zↄ̀blenaɛ,

mí e màↄ ku màↄ n yã́ kũa.

18Ma wɛ́ kɛ̃́mɛɛ,

kɛ́ mà wɛsi n ikoyã bↄnsaɛↄlɛ.

19Bↄ̀mↄn ma ũ dṹnia guu,

ńsu ǹ n yãdilɛaↄ ulɛmɛɛo.

20N ikoyãↄ nidɛa gↄↄpii

mɛ́ tò ma nisĩna vùa.

21Ni waladeↄ lele, ni láaikɛmá,

gbɛ̃́ pↄ́ pã̀alɛ n yãdilɛaↄnɛpiↄ.

22Ma bↄ sↄ̃́sↄ̃a ń sa pↄ́ aaì kamaguou,

asa má n yã'onɛↄ kũaɛ.

23Baa kɛ́ kíaↄ zↄ̃̀lɛ lɛkpàaĩmazi,

ma làasoo aↄ ku n yãdilɛnɛↄwaɛ.

24N yã'onɛↄ mɛ́ ì ma pↄ kɛ na,

n yã́pi mɛ́ ì lɛdaa.

25Ma nisĩna naa líwa.

Ma misi lá ń òwa.

26Ma a yãkɛaↄ dↄ̀dↄnɛ, ↄ̃ ń wèa.

Ǹ n yãdilɛnɛↄ damɛɛ.

27To mà n ↄtondↄkĩiↄ dↄ̃,

ma làasoo iↄ ku n yãbↄnsaɛↄwa.

28Kua pↄsiau ma nↄ̀sɛ ↄ́ↄlↄ̀.

Ma gba gbãa lá ń òwa.

29Ma kɛ̃ sã́sãzɛwa,

ní ma gba zɛ́ mà zɛ ń n ikoyão.

30Ma sĩana zɛ́ sɛ̀,

ma sↄ̃ ìↄ ku n ikoyãwa.

31Má n yã'onɛↄ kũa ↄplapla.

Dii, ńsu to wí ma kũo.

32Má wãa ń n yãdilɛaↄ,

asa n ma sↄ̃ dàmɛɛ doũɛ.

33Dii, ǹ n yãdilɛnɛↄ zɛ́ ↄlↄmɛɛ

màↄ kũa e ma wɛ̃ni lɛ́u.

34Ma gba ↄ̃nↄ màↄ n ikoyã kũa,

míↄ zĩkɛwà ń nↄ̀sɛmɛndoo.

35Ma da n yãdilɛaↄ zɛ́u,

asa bee mɛ́ ì kamagu.

36To ma sↄ̃ ta n yã'onɛↄwa,

asu tá gbɛ̃ble'aiwao.

37To ma wɛma pↄ́ gianaↄla,

ma lɛ́ ń láo n zɛ́ guu.

38Yã́ pↄ́ ń ò kɛ mapi n zↄ̀blenaɛ,

lɛ́ pↄ́ ń gbɛ̃̀ n vĩakɛnaↄnɛpi.

39To sↄ̃́sↄ̃a pↄ́ má a vĩa vĩ gɛ̃ ma swã́ kpɛ,

asa n yãkɛkɛa maaɛ.

40Má ye n ↄtondↄkĩii fá,

ma lɛ́ ń láo n maakɛa guu.

41Dii, mↄ gbɛ̃kɛkɛmɛɛ,

ma suaba lá ń òwa,

42mí yã́zãsi ma sↄ̃̀sↄ̃nawa,

asa málɛ n yã́ náaikɛ.

43Ńsu to màↄ ku sĩana'oanɛ́ saio,

asa n ikoyãↄ ↄ̃ ma wɛ́ dↄi.

44Máↄ n ikoyãↄ kũa

za gbã e gↄↄpiiɛ,

45míↄ bɛ ma laaiwa,

asa ma n ↄtondↄkĩi wɛ̀ɛlɛɛ.

46Má n yã'onɛↄ o kíaↄnɛ,

wí a ma kũo.

47N yãdilɛaↄ ì ma pↄ kɛ na,

asa má ye yã́piↄiɛ.

48Má ye n yãdilɛaↄi ↄ̃ ma ↄdↄi,

mi làasookɛ n yãdilɛnɛↄwa.

49To yã́ pↄ́ ń ò n zↄ̀blenaɛ dↄngu,

asa ń tò ma wɛ́ dↄiɛ.

50Ma nↄ̀sɛ ì níni ma taasikɛa guu,

asa n yã́ mɛ́ ì ma lɛ́ ń láo.

51Waladeↄ lɛ́ ma yáalↄ maamaaɛ,

ń beeo má pãalɛ n ikoyãɛo.

52Mi làasookɛ n ikoyã yãaↄwa,

ↄ̃ aaì ma nↄ̀sɛ nínimɛɛ, Dii.

53Ma pↄ ì pa maamaa

vãikɛnaↄ pãkpaa n ikoyãi yã́i.

54Mi lɛsi n yãdilɛnɛↄ musu

ma kua dṹniau bↄ̀mↄ ũ guu.

55N yã́ ìↄ dↄmagu gwã́, Dii,

ↄ̃ miↄ n ikoyãↄ kũa.

56Má yã́ beeↄ dↄ́ɛ dↄ̃,

asa miↄ n ↄtondↄkĩi gwaɛ.

57Dii mɛ́ ma baa ũ,

ma lɛgbɛ̃̀ ma mɛ̀ má n yãma.

58Mi awakpanɛ ń nↄ̀sɛmɛndoo,

sùuukɛmanↄ lá ń òwa.

59Ma a yãkɛaↄ gwà,

ↄ̃ ma n yã́zɛ sɛ̀.

60Máↄ wãa, má zɛzɛo,

má n yãdilɛaↄ da.

61Baa tó gbɛ̃vãiↄ ba lìamazi,

n ikoyãↄ sãmaguo.

62Mi fɛlɛ mà n sáaukpa wɛɛdo

n ikoyã maapiↄ musu.

63N vĩakɛnaↄ gbɛ̃nan ma ũ,

gbɛ̃́ pↄ́ aaì n ↄtondↄkĩi gwaↄ.

64Dii, n gbɛ̃kɛ dṹnia pà.

Ǹ n yãdilɛnɛↄ damɛɛ.

65N maakɛ̀ mapi n zↄ̀blenaɛ,

lá ń òwa, Dii.

66Wɛzɛ̃ ń dↄ̃ao damɛɛ,

asa ma n yãdilɛaↄ sìɛ.

67E ǹyↄ̃ gɛ́ ↄtↄ̃ↄlɛia, má sã́sãaɛ,

ãma tiasa má n yã́ kũa.

68Ń maa mɛ́ ni yãmaakɛ.

Ǹ n yãdilɛnɛↄ damɛɛ.

69Baa kɛ́ waladeↄ yã́sia lì wa nànaa,

miↄ n ↄtondↄkĩi gwa ń nↄ̀sɛmɛndooɛ.

70An swã́ yìaa, aa sↄũkũ̀,

mapi sↄ̃ ma pↄ na n ikoyãwa.

71N ↄtↄ̃ↄlɛaa kɛ̀ maaɛ,

asa ma e ma n yãdanɛↄ dàdaɛ.

72Ikoyã pↄ́ lɛ́ bↄ n lɛ́u maamɛɛ

dɛ vua ń ã́nusu ↄwatɛ̃ ↄ̀aa sↄoↄla.

73N ↄ mɛ́ ma ikàsa, ↄ̃ n ma kɛ.

Ma gba ↄ̃nↄ mà n yãdilɛaↄ dada.

74Tó n vĩakɛnaↄ ma e, an pↄ ì kɛ na,

asa n yã́ ↄ̃ ma wɛ́ dↄi.

75Dii, má dↄ̃ kɛ́ n ikoyãↄ maa,

kɛ́ ń náai vĩ yã́i ↄ̃ n ↄtↄ̃̀ↄlɛa.

76Gbɛ̃kɛkɛmɛɛ, ma nↄ̀sɛ i níni,

lá ń ò mapi n zↄ̀blenaɛwa.

77Mↄ ǹ wɛ̃nadↄ̃mɛɛ màↄ ku aafia,

asa n ikoyãↄ mɛ́ ma pↄnakɛbↄ ũ.

78To wí waladeↄ kṹ, asa aa yãdↄ̀aɛ,

mí làasookɛ n ↄtondↄkĩiwa.

79To n vĩakɛnaↄ mↄ ma kĩ́i,

gbɛ̃́ pↄ́ aa n yã'onɛ dↄ̃piↄ.

80To màↄ ku tàaesai n yã́ↄ musu,

kɛ́ wí su ma kũo yã́i.

81Ma sↄ̃anzi ǹ ma suaba e ma nisĩna lòo,

n yã́ ↄ̃ ma wɛ́ dↄi.

82Ma wɛdↄ̀dↄ n lɛgbɛ̃ai e ma wɛ́ wò,

bↄɛ ńyↄ̃ ma nↄ̀sɛ nínimɛɛi?

83Má dɛ lán báa bↄ̀ↄ pↄ́ tɛ́zãna màwaɛ,

ń beeo n yãdilɛnɛↄ lí sãmaguo.

84Mapi n zↄ̀blena máↄ n dã e bↄɛ ni?

Bↄɛ ńyↄ̃ ĩada ma wɛ̀lɛↄwai?

85Waladeↄ ì ɛyↄ̃mɛɛ,

an yã́ lí kↄ̃'e ń n ikoyãoo.

86N yãdilɛaↄ píi náai vĩ.

Dↄmalɛ, asa wàlɛ ĩadaa pãɛ.

87À gↄ̃̀ yↄↄ aa ma bↄ dṹniauɛ,

mapi sↄ̃ mi n ↄtondↄkĩi tó weo.

88Ma lɛ́ ń láo n gbɛ̃kɛ yã́i,

mí n yã'onɛ ma.

89Dii, n yã́ ìↄ ku gↄↄpiiɛ,

a zĩ́napɛlɛa musu n bɛ.

90Ń náai vĩ wɛ̃ ń wɛ̃o,

n dṹnia kàlɛ, ↄ̃ a ku.

91N ikoyãↄ mɛ́ tò pↄ́pii kú gbã,

asa pↄ́pii misiilɛanɛ.

92Tó n ikoyã mɛ́ ma pↄnakɛbↄ ũo,

dↄ̃ ma mìdɛ ma taasikɛa guu.

93N ↄtondↄkĩi a sãmagu bauo,

asa a sabai ↄ̃ n ma lɛ ń láo.

94N pↄ́n ma ũ, ma suaba,

asa miↄ n ↄtondↄkĩi wɛɛlɛɛ.

95Gbɛ̃vãiↄ lɛ́ ma wɛ,

ↄ̃ ma laai ku n yã'onɛↄwa.

96Má è pↄ́pii maa lɛ́ kuɛ,

ãma n yãdilɛaↄ zↄ̃ↄ lɛ́ vĩo.

97Má ye n ikoyãi à kɛ̀ zài,

miↄ làasookɛwà gↄↄpiiɛ.

98N yã́ tò ma ↄ̃nↄ dɛ ma ibɛɛↄla,

asa a ku ma sↄ̃u gↄↄpiiɛ.

99Ma wɛzɛ̃ dɛ ma yãdanɛdeↄla,

asa ma làasoo ìↄ ku n yã'onɛↄwaɛ.

100Ma ↄ̃nↄ dɛ maezↄ̃ↄↄla,

asa miↄ n ↄtondↄkĩiↄ gwaɛ.

101Mi gbápɛlɛ zɛ́ vãie guuo,

kɛ́ mà e màↄ n yã́ kũa yã́i.

102Mi kɛ̃ n ikoyãↄwao,

asa ḿmɛ ń dàmɛɛ.

103N yã́ↄ namɛɛ à kɛ̀ zài,

a na dɛ zↄ́a ma lɛ́u.

104N ↄtondↄkĩi ì ma gba ↄ̃nↄ,

a yã́i tò má za sã́sãzɛ píiu.

105N yã́ mɛ́ filia ũ ma gbázĩ,

ì gupumɛɛ zɛ́u.

106Ma lɛgbɛ̃̀ ↄ̃ ma kpalɛ ma siwà,

ma mɛ̀ máↄ zĩkɛ n ikoyãↄwaɛ.

107Ma taasikɛa kɛ̀ zài, Dii.

Ma lɛ́ ń láo lá ń òwa.

108To n sáau pↄ́ málɛ kpá kángu,

ní n ikoyãↄ damɛɛ, Dii.

109Gↄↄpii miↄ ku ga lɛ́zĩɛ,

ń beeo n ikoyãↄ lí sãmaguo.

110Vãikɛnaↄ baikpàmɛɛ,

kási mi zã n ↄtondↄkĩiwao.

111N yã'onɛↄá ma pↄ́ɛ gↄↄpii,

aaì to ma pↄ kɛ na.

112Ma a sↄ̃ kpà n yãdilɛnɛↄwa,

máↄ kũa gↄↄpii e ma wɛ̃ni lɛ́uɛ.

113Má za nↄ̀sɛmɛmpladeↄgu,

má ye n ikoyãi.

114Ḿmɛ ń ma ulɛkĩi ń ma sɛ̀ngbaoo ũ,

n yã́ ↄ̃ ma wɛ́ dↄi.

115À gomala vãikɛnaↄ,

kɛ́ mà zĩkɛ ma Lua yãdilɛaↄwa.

116Ǹyↄ̃ ma kũa lá ń òwa, míↄ ku,

ńsu to tãmaa ma nɛo.

117Ǹyↄ̃ dɛ ma gbãa ũ, míↄ aafia,

ma wɛ́ iↄ pɛ n yãdilɛnɛwa láasai.

118Ɔzↄ̃ gbɛ̃́ pↄ́ pã̀alɛ n yãdilɛnɛɛi,

an mↄafiliyã a àikɛnɛ́o.

119Ni dṹnia vãikɛnaↄ waa bìsa ũ,

a yã́i tò má ye n yã'onɛi.

120Má n vĩa vĩ, ma mɛ ì seenata,

n ikoyãↄ ì to vĩa ma kũ.

121Ma yãkɛ̀ a zɛ́wa wásawasaɛ,

ńsu ma to ma ĩadamadeↄnɛo.

122Kpɛ́gaausi mapi n zↄ̀blenaɛ,

ńsu to waladeↄ ma wɛtão.

123Ma wɛ́ dↄ n dↄnlɛi e ma wɛ́ wò,

má sↄ̃́anzi ǹ ma suaba lá ń òwa.

124Yãkɛmɛɛ n gbɛ̃kɛ guu,

ní n yã́ da mapi n zↄ̀blenaɛ.

125N zↄ̀blenan ma ũ, ma gba ↄ̃nↄ,

kɛ́ mà n yã'onɛↄ yáasi dↄ̃.

126N yãkɛgↄↄ kà, Dii,

wàlɛ bↄ n ikoyã kpɛ.

127Má ye n yãdilɛaↄi dɛ vuaa,

baa vua baasaa.

128Má è n ↄtondↄkĩi maa,

a yã́i má za sã́sãzɛ píiu.

129N yã'onɛↄ dɛmɛɛ yãbↄnsaɛ ũ,

Ayãmɛto má dà ma sↄ̃u.

130N yã́ bↄↄlɛkɛa ì gupunɛ́,

ì nↄ̀sɛdoũdeↄ gba ↄ̃nↄ.

131Ma lɛ́ ɛlɛa, málɛ we fòofoo,

asa n ikoyãↄ ni lɛ́ ma dɛɛ.

132Ma wɛgwa, sùuukɛmanↄ,

lá ni kɛ gbɛ̃́ pↄ́ ye n tↄ́iↄnɛwa.

133Ma dazɛwa lá ń òwa,

ńsu to yãvãie kibleao.

134Ma bↄ gbɛ̃́ taiinkɛnaↄ ↄzĩ,

kɛ́ màↄ n ↄtondↄkĩi gwa.

135Mapi n zↄ̀blena wɛgwa,

ní tó mà n yãdilɛnɛↄ dↄ̃.

136Wɛ́'i lɛ́ bàalɛ ma kùawa,

kɛ́ wa n ikoyã kũao yã́i.

137Dii, ń maa,

n yãkɛkɛaↄ zɛvĩ.

138N n yã́ↄ dìlɛ a zɛ́wa,

aa náai vĩ maamaaɛ.

139N yã́ lɛ́ kɛ ma ibɛɛↄnɛ yãe ũo,

ↄ̃ a yã́ lɛ́ ma dɛ.

140Wa è n yã́ sãa vĩo,

mapi n zↄ̀blena, má yei maamaaɛ.

141Pↄen ma ũo, wì sakamagu,

ń beeo n ↄtondↄkĩi lí sãmaguo.

142N yã́ ìↄ zɛvĩ gↄↄpiiɛ,

n ikoyã sĩana vĩ.

143Taasi n yã'ↄ̃mao ma le,

ãma n yãdilɛaↄ mɛ́ ma pↄnakɛbↄ ũ.

144N yã'onɛↄ maa gↄↄpiiɛ,

ma gba ↄ̃nↄ kɛ́ màↄ ku.

145Mi n sísi ń nↄ̀sɛmɛndoo,

wea Dii, míↄ n yãdilɛnɛↄ kũa.

146Mi lɛzunzi,

ma suaba, míↄ n yã'onɛↄ kũa.

147Mi fɛlɛ gudↄsai mà wiilɛma,

n yã́ ma wɛ́ dↄi.

148I lí na ma wɛ́u gwãasĩnao,

kɛ́ mà e làasookɛ n yã́wa yã́i.

149Ma yãma n gbɛ̃kɛ yã́i, Dii,

ma lɛ́ ń láo lá n ikoyã'òwa.

150Gbɛ̃́ pↄ́ lɛ́ lɛkpaaĩmaziↄ kãi,

aa zã̀ ń n ikoyão.

151Ń kumanↄ kãi, Dii,

n ikoyã píi sĩana vĩ.

152Má dↄ̃̀ n yã'onɛↄwa à gɛ̃̀gɛ̃,

kɛ́ ń dìlɛ àↄ ku gↄↄpii yã́i.

153Ma taasi gwa, ní ma suaba,

asa n ikoyã i sãmaguo.

154Zɛmanↄ, ní ma bↄ,

ma lɛ́ ń láo lá n a lɛgbɛ̃̀wa.

155N dↄnlɛ zã̀ ń vãikɛnaↄ,

asa aali n yãdilɛnɛↄ wɛɛlɛo.

156Ń sósobi vĩ zↄ̃ↄ, Dii,

ma lɛ́ ń láo lá n ikoyã'òwa.

157Ma ĩadamadeↄ ń ma wɛ̀lɛↄ dasi,

ãma mi pãalɛ n yã'onɛↄnɛo.

158Má ye n náaikɛnsaiↄ gĩyãio,

kɛ́ aaliↄ n yã́ kũao yã́i.

159Gwa lá má ye n ↄtondↄkĩii.

Dii, ma lɛ́ ń láo n gbɛ̃kɛ yã́i.

160N yã́pii zĩ́naá sĩanaɛ,

n ikoyãↄ maa, aa láaa vĩo.

161Gbãadeↄ ì ĩadaa pã,

ãma n yã́ ↄ̃ má a vĩa vĩ.

162Mi pↄnakɛ ń n lɛgbɛ̃ao,

lán gbɛ̃́ pↄ́ àizɛɛ zↄ̃ↄ kↄ̃mpawa.

163Má za mↄafiliu, má ye a yã́io,

n ikoyã má yei.

164Miↄ n táasilɛ gↄↄ do gɛ̃n soplapla

kɛ́ n ikoyãↄ maa yã́i.

165Gbɛ̃́ pↄ́ ye n ikoyãiↄ aafia zↄ̃ↄ,

yãe lí tó aa fùo.

166Ma wɛ́ dↄi ǹ ma suaba, Dii,

mi zĩkɛ n yãdilɛaↄwa.

167Má n yã'onɛↄ kũa ń nↄ̀sɛo,

má yei maamaaɛ.

168Mi n ↄtondↄkĩi gwa, mi n yãma,

asa ma kɛkɛá píi kú n ↄzĩɛ.

169To ma wiilɛa kama, Dii,

ma gba ↄ̃nↄ lá ń òwa.

170To ma wabikɛa n le,

ma suaba lá n a lɛgbɛ̃̀wa.

171N táasilɛa aↄ dↄ ma lɛ́uɛ,

asa ni n yãdilɛnɛↄ damɛɛ.

172Má lɛsi n lɛgbɛ̃a musu,

asa n yãdilɛaↄ maa píiɛ.

173Ǹyↄ̃ kú ń dↄamalɛ sↄuo,

asa ma zɛ ń n ↄtondↄkĩioɛ.

174Málɛ a nidɛ ǹ ma suaba, Dii,

n ikoyã mɛ́ ma pↄnakɛbↄ ũ.

175To màↄ ku, míↄ n táasilɛ,

to n ikoyãↄ aaↄ ma kũa.

176Ma liaa lán sã pↄ́ sã̀sãwa,

mapi n zↄ̀blena, ma wɛɛlɛ,

asa n yã́ↄ i sãmaguo.

Notes