Bibeli Luayãtaalá Soũↄ 109

Sa bɛ̃̀ɛ oa ibɛɛɛ

Davidi lɛ.

1Lua, ḿmɛ mi n táasilɛ,

ńsu ǹyↄ̃ nílɛao.

2Asa gbɛ̃vãi bↄnkpɛdeↄ ì ma yaa,

aaì lɛkↄↄlɛkamazi ń ɛɛo.

3Aaì liamazi ń yã́'ĩio,

aaì sòlekɛmanↄ pↄewiwinɛsai.

4Aaì ma yeańzi fĩabomɛɛ ń yãdↄmao,

mapi sↄ̃ miↄ wabikɛma.

5Aaì maa fĩabomɛɛ ń vãio,

ma yeańzi sↄ̃ ń zaamaguo.

6Gbɛ̃vãi sóikɛ ń dↄaanawa,

ǹ aà na gudɛnaɛ a ↄzĩ.

7To yã́kpalɛ bↄaànↄ vãi,

to aà wabikɛa yã'iɛ̀.

8Aà wɛ̃ni su àↄ gbã̀ao,

gbɛ̃pãle i zↄ̃lɛ aà gbɛu.

9Aà nɛ́ↄ gↄ̃ desai,

aà na i gↄ̃ gyaa ũ.

10Aà nɛ́ↄ gↄ̃ lìaanaↄ ũ aaↄ baakɛ,

aaↄ pↄ́ wɛɛlɛwɛɛlɛ pↄ́kↄlɛkĩi.

11Aà fĩade aà pↄ́ↄ naaa píi,

buipãleↄ aà zĩ ài siwà.

12Gbɛ̃e su gbɛ̃kɛkɛɛ̀o,

wasu wɛ̃nadↄ̃ aà nɛ́ pↄ́ a tòↄnɛo.

13Aà buiↄ midɛ,

an tↄ́ ga gbɛ̃́ pↄ́ lɛ́ fɛlɛↄ guu.

14Aà deziↄ vãikɛa yã́ dↄngu, Dii,

ńsu ǹ aà da duuna kɛ̃wà bauo.

15An duuna aↄ dↄngu gↄↄpii, Dii,

an yã́ i sã gbɛ̃́ↄgu dṹniau,

16kɛ́ ìli làasookɛ gbɛ̃kɛwao yã́i,

ì ĩada taasideↄ ń wɛ̃nadeↄ

ń gbɛ̃́ pↄ́ an kã́ gàↄwa e aa ga.

17A ye savãi'oa gbɛ̃́ɛi,

to à wi aà musu.

Sa maa oa gbɛ̃́ɛ lí kaaàguo,

a kɛ báaa vĩ sↄ̃o.

18À lɛkɛanɛ́ ula dà,

à gɛ̃̀ aà nↄ̀sɛu lán íwa,

à tàalɛaàgu lán nísiwa.

19Àↄ fĩwà gↄↄpii zwãa ũɛ,

iↄ dↄ aàpi asana ũ.

20Dii fĩabo ma yãdↄmadeↄnɛ màa

ń gbɛ̃́ pↄ́ aaì vãi o ma musuↄ.

21Dii Gbãapiide, ma wɛgwa n tↄ́ yã́i,

ma bↄ n maa ń n gbɛ̃kɛo yã́i.

22Asa taaside wɛ̃naden ma ũ,

ma pↄ yà dúuduu.

23Málɛ sãalɛ lán oosi uenawa,

málɛ gɛ̃zɛa lán ĩ́ana kwasɛawa.

24Lɛye tò ma gbá lɛ́ sɛ́ lↄo,

ma fɛ̃fɛ̃ e ma gↄ̃ wákambaau ũ.

25Ma gↄ̃nɛ́ pↄ́sↄ̃sↄ̃a ũ,

aaì ma gwa aa mikɛ déũdeũ.

26Dↄmalɛ Dii ma Lua,

ma suaba n gbɛ̃kɛ yã́i,

27aai dↄ̃ kɛ́ n ↄdàa,

kɛ́ ḿmɛ ń kɛ̀mɛɛ, Dii.

28Tó aa ma ka, ńyↄ̃ báaadamagu,

tó aa fɛ̀lɛmanↄ, wí a ń kṹ,

mapi n zↄ̀blena mí pↄnakɛ.

29Tↄ́ ĩ́i a gↄ̃ ma yãdↄmadeↄnɛ ula ũ,

aa wida ńzĩawa lán gomusuwa.

30Má Dii sáaukpa ń lↄↄ gbãao,

má aà táasilɛ balu guu.

31Asa ì zɛ ń wɛ̃nadeↄɛ,

ì ń sí gbɛ̃́ pↄ́ lɛ́ yãdańlaↄwa.

Notes

*109:8 Zĩn 1.20

†109:25 Mat 27.39