Bibeli Luayãtaalá Yobu 28

Ɔ̃nↄ sáaukpaa

1Ãnusuyↄ̃kĩi kú,

vuabaasakĩi kú lↄ.

2Wì mↄsi bↄ tↄↄlɛu,

wì mↄgotɛ̃ bↄ gbɛu.

3Gbɛ̃nazĩna ì gusia yá,

ì tↄↄlɛ yↄɛ e a lɛ́ lɛ́u,

ì gbɛ pↄ́ kú gusia níiniiu wɛɛlɛ.

4Wì ɛyↄ̃ tↄↄlɛ nↄnau wà zɛbↄ we,

gu pↄ́ gbɛ̃e lí bɛbɛ à kauo.

Ba wì loowà wà gɛ̃ò ɛpiu.

5Blɛ ì bↄlɛ tↄↄlɛwaɛ,

ↄ̃ gbɛ̃nazĩna ì tↄↄlɛ títiu lilɛ

lá tɛ́ ì pↄ́ lilɛwa.

6Safii ku a gbɛↄ guu,

vua ku a bùsuti guu.

7Bã nↄ̀ↄsonaↄ a zɛ́ dↄ̃o,

bleaa lí wɛsi zɛ́pilɛo.

8Sɛ̃̀a nↄ̀bↄ tↄdeↄ lí zɛ́pi sɛo,

nↄ̀ↄmusuↄ lí bɛbɛuo.

9Gbɛ̃nazĩna ì gbɛkão wíwi we,

ì gbɛ̀sĩsĩↄ zĩ́lɛ sↄ.

10Ì zɛ́ da gbɛu we,

ì wɛsi gupi pↄ́ bɛɛɛdeↄlɛ píi.

11Ì zɛzↄ̃ swa'iɛ,

ì bↄ ń pↄ́ pↄ́ ulɛaↄ gupuau.

12Ɔ̃nↄ sↄ̃, wì e má ni?

Dↄ̃a kúkĩin mái?

13Gbɛ̃nazĩna a bɛɛɛ dↄ̃o,

wìli e dṹnia guuo.

14Ísi ì mɛ á vĩo,

ísia ì mɛ a ku a kĩ́io.

15Wa fↄ̃ lú ń vua maaoo,

wa fↄ̃ a lɛũkpakɛ ń ã́nusuoo.

16A bɛɛɛ dɛ Ofii bùsu vuaa

ge safii gbɛ bɛɛɛde ge onisi.

17Wa fↄ̃ lɛɛũ ń vuao ge bĩsãgbɛo,

wa fↄ̃ a fĩabo ń vua tɛ̃ɛtɛ̃ɛ pↄ́oo.

18Wa ↄpua ge gbɛdii yã'o lↄe?

Ɔ̃nↄkũa bɛɛɛ dɛ òsowɛɛlɛaa.

19Wa fↄ̃ lɛɛũ ń Etiopi bùsu topazaoo,

wa fↄ̃ lú ń vua maaoo.

20Ɔ̃nↄ ì bↄ má ni?

Wɛzɛ̃ kúkĩin mái?

21A ulɛa pↄ́piiɛ,

baa bã pↄ́ ì vua musu lí a wɛ́pao.

22Kaalɛ ń gao ì mɛ,

wá swã́ a feena màɛ.

23Lua mɛ́ a zɛ́ dↄ̃,

aàpi mɛ́ a kúkĩi dↄ̃.

24Asa ì gugwa e dṹnia lɛ́waɛ,

ì pↄ́ pↄ́ kú zĩ́lɛ e píi.

25Kɛ́ Lua gbãa dìlɛ ĩ́anaɛ,

mɛ́ à ísia í lɛ́ dàɛ̀,

26kɛ́ à lou ikoyã dìlɛ,

mɛ́ à zɛbↄ̀ loupilɛaɛ,

27zĩbeezĩ à ↄ̃nↄ laai gwà à a maabò,

a dìlɛ, ↄ̃ à a sáaukpà.

28Ɔ̃ a ò gbɛ̃nazĩnaↄnɛ:

Vĩakɛa Diiɛ mɛ́ ì mↄ́ ń ↄ̃nↄo,

mikɛ̃a yãvãiwa mɛ́ ì ń wɛ́ kɛ̃́.

Notes

*28:28 Soũ 111.10, Yaa 1.7, 9.10