Bibeli Luayãtaalá Yobu 21

Vãikɛna ì namable

1Ɔ̃ Yobu mɛ̀:

2À swã́kpa à ma yãma,

ↄ̃mɛ a ma nↄ̀sɛ nínimɛɛ.

3À mɛnakɛmɛɛ mà yã'o,

ma yã'oa gbɛa í ma àlafiikɛ.

4I kɛ gbɛ̃nazĩna málɛ zↄakaio.

Ma pↄyaa zɛvĩo lé?

5À ma gwa, yã́pi i diwá,

í ↄku á lɛ́wa.

6Tó ma làasookɛ̀ ma yã́wa,

gili ì gɛ̃magu, mi lualua.

7Àkɛa vãikɛnaↄ ìↄ ku,

aaì zi kṹ, an gbãa ìↄ kã́fĩi?

8An nɛ́ↄ ì zĩ́napɛlɛ ń wáa,

aaì wɛsi ń buiↄ gbãakũalɛ.

9An bɛdeↄ ìↄ ku aafia,

vĩa lí ń kũo, Lua lí gotↄ̃máo.

10An gáaeↄ ì ku zudaↄwa, aali fuao,

an zudapiↄ lí nↄbↄlɛo, aaì nɛ'i.

11Aaì ń nɛ́ↄ gbaɛ kↄ̃̀ↄ'oi lán sã kpàsawa,

an nɛ́fɛ̃nɛnaↄ ì vĩvĩ lán blenɛↄwa.

12Aaì lɛsi ń gã̀ao ń mↄↄnao,

aaì kↄ̃̀ↄ'o ń kulɛpɛao.

13Aaì zikũ ń namao,

aaì ta bɛdau niɛniɛ.

14Kási aaì o Luaɛ: Gowála,

wá ye wàↄ bɛ n zɛ́uo.

15Démɛ Gbãapiide ũ wà zↄbleɛ̀i?

Tó wa kulɛkɛ̀ɛ̀, bↄ́ ài wá ei?

16Kási an nama lɛ́ bↄ ń kĩ́io.

A yã́i mi gbɛ̃vãiↄ lɛdama bee sio.

17Vãikɛnaↄ filia ì gamá mↄ̀ↄmↄↄe?

Lua pↄkũma lí tó músi ń lé dasio.

18Ĩana ì ń sɛ́lɛ lán ése ṹawae?

Zàa'ĩana ì ń waa lán sɛ̃wae?

19Lua ì vãi pↄ́ gbɛ̃́ kɛ̀ wi aà nɛ́ↄ musuɛ.

Lua fĩabo adeɛ gↄ̃̀ↄ, aà dↄ̃!

20Aà wɛsi azĩa ↄ̃̀ↄkpaalɛ!

Gbãapiide pↄkũma imibↄ dↄɛ̀ aà mi!

21Yã́ pↄ́ a aà bɛdeↄ le aà gaa gbɛa,

ìli a kã̀akɛo.

22Lá Lua ì yã́gↄ̃gↄ̃ musudeↄnɛ,

wa fↄ̃ yãdaɛ̀e?

23Gbɛ̃eↄ ì ga ń àizɛɛ zↄ̃ↄo,

aa namablè bɛ́lɛbɛlɛ.

24Vĩ ìↄ di, an taↄ pai yɛlɛlɛ,

an wá ìↄ gbãa, aaìↄ mɛkpaa maamaa.

25Gbɛ̃eↄ ì ga ń nↄ̀sɛyaao,

zaa aa ku, aai pↄmaa e wa blèo.

26Aaì wúlɛ gudoũ tɛ̃́ɛnauɛ,

aaì kↄ̀ↄka ḿpla ḿpii.

27Á èa? Má á làasooↄ dↄ̃

ń kↄ̃ni pↄ́ álɛ kɛmɛɛo.

28Asa i mɛ: Gbɛ̃zↄ̃ↄ bɛ kú má saɛ?

Vãikɛnaↄ ua gↄ̃̀ bɛzia ũ.

29Ili yãlala wɛ̃́lɛgɛnaↄwao lé?

Á yã́ pↄ́ aaì o fãn vĩo lé?

30Gbɛ̃vãi ì bↄ músikɛgↄↄ,

pↄe lí aà le taasikɛgↄↄo.

31Démɛ ì zↄadↄwài?

Démɛ ì fĩaboɛ̀ aà yãkɛawai?

32Wì aà sɛ wà gɛò gɛvĩkĩi,

wì itɛ̃kɛ aà mia dↄngubↄwa.

33Swa saɛ bùsukↄ̃ↄtɛ̃ↄ ì kɛɛ̀ na,

gbɛ̃́pii tɛaàzi we, mɛ́ wì dↄaaɛ̀ dasi.

34Á fↄ̃ ma nↄ̀sɛ níni ń á yãpãoe?

Yã́ pↄ́ álɛ weaá zĩbↄnkpɛ yã́ɛ.