Muⱪeddes Kalam (yǝngi yeziⱪ)

Kɵrüx sezimi bilǝn ǝmǝs, bǝlki iman-ixǝnq bilǝn yaxax
1Qünki bu zeminƣa tǝwǝ ɵyimiz, yǝni bu qedirimiz yoⱪitilsimu, Huda tǝripidin bolƣan, insan ⱪoli bilǝn yasalmiƣan bir ɵy, yǝni asmanlarda ǝbǝdiy bir makanimiz bardur dǝp bilimiz. 2Əmdi bu kona ɵyimizdǝ turƣinimizda asmandiki ɵyimizni kiyiwelixⱪa zor intizar bilǝn aⱨ urmaⱪtimiz 3(bǝrⱨǝⱪ, asmandiki ɵyimizni kiyiwalsaⱪ yalingaq ⱪalmaymiz). 4Qünki muxu qedirda turƣinimizda, eƣirqiliⱪta aⱨ urmaⱪtimiz; bu bizning yalingaqlinixni haliƣinimiz ǝmǝs, bǝlki kiyindürülüxni, yǝni bizdǝ ɵlidiƣan nemǝ bolsa, uning ⱨayat tǝripidin yutuluxini halaymiz. 5Əmdi bizni dǝl muxu ixⱪa tǝyyarliƣuqi bolsa Hudadur; U bizgǝ «kapalǝt» bolƣan Ɵz Roⱨinimu ata ⱪildi.   6Xuning bilǝn biz ⱨǝmixǝ yurǝklik bolimiz; ⱨǝmdǝ tenimizdǝ makan tutⱪinimizda Rǝbdin neri bolƣan musapir bolimiz dǝp bilimiz 7(qünki biz kɵrüx sezimi bilǝn ǝmǝs, etiⱪad bilǝn mangimiz); 8biz yurǝklik bolup, xuningdǝk tǝndin neri bolup Rǝb bilǝn billǝ bir makanda boluxⱪa tehimu hursǝnmiz. 9Xuning bilǝn, mǝyli tǝndǝ bolayli, tǝndin neri bolayli, uni hursǝn ⱪilixni istǝk-nixan ⱪilip intilimiz. 10Qünki tǝndǝ ⱪilƣan ǝmǝllirimizni, yahxiliⱪ bolsun, yamanliⱪ bolsun, ⱨǝrbirimizgǝ ⱪayturuluxi üqün Mǝsiⱨning soraⱪ tǝhti aldida ⱨazir boluximiz lazim bolidu. 11Xuning bilǝn Rǝbning dǝⱨxitini bilgǝnlikimiz üqün, insanlarni ixǝndürüxkǝ tiriximiz; lekin biz Hudaƣa oquⱪ-axkarimiz, xuningdǝk silǝrning wijdaninglardimu axkarǝ tonulsaⱪ dǝp ümid ⱪilimǝn.
Inaⱪliⱪⱪa kǝltürüx hizmiti
12Biz ⱨazir ɵzimizni ⱪaytidin silǝrgǝ tǝwsiyǝ ⱪilƣinimiz yoⱪ, bǝlki pǝⱪǝt silǝrdǝ ⱪǝlbdiki ixlardin ǝmǝs, taxⱪi ⱪiyapǝttin pǝhirlinidiƣanlarƣa bǝrgüdǝk jawab bolsun dǝp, silǝrgǝ bizlǝrdin pǝhirlinix imkaniyitini yaritip beriwatimiz.    13Qünki iq-iqimizgǝ siƣmay ⱪalƣan bolsaⱪmu Huda aldida xundaⱪ bolduⱪ, salmaⱪ bolsaⱪmu silǝr üqün xundaⱪ bolimiz. 14Qünki Mǝsiⱨning muⱨǝbbiti bizni xundaⱪ ⱪilixⱪa ündǝydu; qünki biz birsi ⱨǝmmǝylǝn üqün ɵldi, xunga ⱨǝmmǝylǝnnimu ɵldi, dǝp ⱨesablaymiz. 15Wǝ U ⱨǝmmǝylǝnni dǝp ɵldi, buningdin mǝⱪsǝt, ⱨayat bolƣanlar ɵzliri üqün ǝmǝs, bǝlki ularni dǝp ɵlüp tirilgüqi üqün yaxixi üqündur.
16Xuning bilǝn biz buningdin keyin ⱨeqkimni insanlarqǝ tonumaymiz; ⱨǝtta biz Mǝsiⱨni insanlarqǝ tonuƣan bolsaⱪ, buningdin keyin uni yǝnǝ xundaⱪ tonumaymiz.    17Xunga ǝmdi birsi Mǝsiⱨdǝ bolsa, u yengi bir yaritilƣuqidur! Kona ixlar ɵtüp, mana, ⱨǝmmǝ ix yengi boldi! 18Wǝ barliⱪ ixlar Hudadindur; U bizni Mǝsiⱨ arⱪiliⱪ Ɵzigǝ inaⱪlaxturdi, xundaⱪla bizgǝ inaⱪlaxturux hizmitini tapxurdi: —    19demǝk, Huda Mǝsiⱨdǝ adǝmlǝrning itaǝtsizliklirini ularning ǝyibi bilǝn ⱨesablaxmay, alǝmni Ɵzigǝ inaⱪlaxturdi; xuningdǝk bizgǝ inaⱪlaxturux hǝwirini amanǝt ⱪilip tapxurdi. 20Xunga huddi Huda biz arⱪiliⱪ adǝmlǝrdin inaⱪliⱪⱪa kelixni ɵtünginidǝk, biz Mǝsiⱨkǝ wakalitǝn ǝlqilǝrdurmiz; Mǝsiⱨning ornida «Hudaƣa inaⱪlaxturulƣaysilǝr!» dǝp ɵtünimiz. 21Gunaⱨⱪa ⱨeq tonux bolmiƣan kixini Huda bizni dǝp gunaⱨning ɵzi ⱪildi; mǝⱪsiti xuki, bizning Uningda Hudaning ⱨǝⱪⱪaniyliⱪi boluximiz üqündur.  

■5:1 2Kor. 4:7.

■5:2 Rim. 8:23.

■5:3 Wǝⱨ. 3:18; 16:15.

■5:4 Rim. 8:11; 1Kor. 15:53.

□5:5 «U bizgǝ «kapalǝt» bolƣan Ɵz Roⱨinimu ata ⱪildi» — «Ɵz Roⱨi» grek tilida pǝⱪǝt «Roⱨ» bilǝn ipadilinidu. «Kapalǝt» toƣruluⱪ 1:22diki izaⱨatni kɵrüng.

■5:5 Rim. 8:16; 2Kor. 1:22; Əf. 1:13; 4:30.

■5:7 1Kor. 13:12; 2Kor. 3:18.

■5:10 Zǝb. 62:12; Yǝr. 17:10; 32:19; Mat. 16:27; 25:32; Rim. 2:6; 14:10,12; 1Kor. 3:8; Gal. 6:5; Wǝⱨ. 2:23; 22:12.

□5:11 «biz Hudaƣa oquⱪ-axkarimiz, xuningdǝk silǝrning wijdaninglardimu axkarǝ tonulsaⱪ dǝp ümid ⱪilimǝn» — «Hudaƣa oquⱪ-axkarimiz, xuningdǝk silǝrning wijdaninglardimu axkarǝ tonulsaⱪ». Demǝk, Pawlus wǝ baxⱪa rosullar dunyadikikilǝrgǝ anqǝ tonux ǝmǝs, ularning ⱨǝⱪiⱪiy salaⱨiyiti, ularda bolƣan Mǝsiⱨning Muⱪǝddǝs Roⱨimu dunyadikikilǝrgǝ anqǝ tonux ǝmǝs, xunga ularƣa Mǝsiⱨning ⱨǝr adǝmni soraⱪⱪa tartidiƣanliⱪi toƣruluⱪ ixǝndürüxning zɵrüriyiti bar. Lekin Huda bizni obdan bilidu wǝ (silǝr Hudaning adǝmliri bolƣandin keyin) silǝrmu bizni obdan qüxǝnsǝnglar kerǝk, dǝydu.

□5:12 «...taxⱪi ⱪiyapǝttin pǝhirlinidiƣanlarƣa bǝrgüdǝk jawab bolsun dǝp, silǝrgǝ bizlǝrdin pǝhirlinix imkaniyitini yaritip beriwatimiz» — «taxⱪi ⱪiyapitidin pǝhirlinidiƣanlar bǝrgüdǝk jawab bolsun dǝp...» — Pawlus ⱨazir Korinttiki jamaǝttǝ kɵrüngǝn «sahta rosullar»ni tilƣa elip, ɵzi üstidin ǝrz ⱪilƣan bu kixilǝrgǝ jawab berix üqün Korinttiki ⱪerindaxlarƣa ɵzining wǝ ⱨǝmkarlirining hizmǝtlirining roⱨiy maⱨiyitini azraⱪ axkarilap kɵrsǝtmǝkqi.

■5:12 2Kor. 3:1; 10:8.

□5:13 «Qünki iq-iqimizgǝ siƣmay ⱪalƣan bolsaⱪmu Huda aldida xundaⱪ bolduⱪ, salmaⱪ bolsaⱪmu silǝr üqün xundaⱪ bolimiz» — munu ayǝttǝ Pawlus, xübⱨisizki, (yuⱪirida eytilƣandǝk) awwal ɵzining wǝ ⱪerindaxlarning «ⱪǝlbdiki ixlar», yǝni ǝng ǝⱨmiyǝtlik ixlar toƣruluⱪ sɵzlǝydu. U keyinrǝk «kɵrünüx»tiki ixlarning, yǝni «taxⱪi ⱪiyapǝt»ning ixliriƣa ɵtidu. Əmǝliyǝttǝ «iq-iqimizgǝ siƣmay ⱪalƣan bolux» Hudaning zor uluƣluⱪi, exip taxⱪan xapaitigǝ ⱪarap insanning huxalliⱪtin bolƣan normal inkasi bolux kerǝkƣu, dǝymiz. Əmma baxⱪa kixilǝr bǝribir hux hǝwǝrni anglixi kerǝk, xuningdǝk ɵz huxalliⱪimizƣa ⱨay berip, ular üqün «salmaⱪ» boluximizmu kerǝk.

□5:14 «birsi ⱨǝmmǝylǝn üqün ɵldi» — Mǝsiⱨni kɵrsitidu. «qünki biz birsi ⱨǝmmǝylǝn üqün ɵldi, xunga ⱨǝmmǝylǝnnimu ɵldi, dǝp ⱨesablaymiz» — bu ajayib ayǝt toƣruluⱪ «ⱪoxumqǝ sɵz»imizni kɵrüng.

■5:15 Rim. 14:7; Gal. 2:20; 1Tes. 5:10; 1Pet. 4:2.

□5:16 «ⱨǝtta biz Mǝsiⱨni insanlarqǝ tonuƣan bolsaⱪ...» — «insanlarqǝ» grek tilida «ǝtlǝr boyiqǝ». «xuning bilǝn biz buningdin keyin ⱨeqkimni insanlarqǝ tonumaymiz; ⱨǝtta biz Mǝsiⱨni insanlarqǝ tonuƣan bolsaⱪ, buningdin keyin uni yǝnǝ xundaⱪ tonumaymiz» — bu ajayib ayǝt toƣruluⱪmu «ⱪoxumqǝ sɵz»imizni kɵrüng.

■5:16 Mat. 12:50; Yⱨ. 15:14; Gal. 5:6; 6:15; Kol. 3:11.

■5:17 Yǝx. 43:18; Wǝⱨ. 21:5.

□5:18 «wǝ barliⱪ ixlar Hudadindur» — yaki «wǝ bu barliⱪ ixlar Hudadindur».

■5:18 Kol. 1:20; 1Yuⱨa. 2:2; 4:10.

■5:19 Rim. 3:24,25; Kol. 1:20.

■5:20 2Kor. 3:6.

□5:21 «gunaⱨⱪa ⱨeq tonux bolmiƣan kixi» — Mǝsiⱨ. «mǝⱪsiti xuki, bizning Uningda Hudaning ⱨǝⱪⱪaniyliⱪi boluximiz üqündur» — «Uningda» — Mǝsiⱨdǝ, ǝlwǝttǝ.

■5:21 Yǝx. 53:9,12; Rim. 8:3; Gal. 3:13; 1Pet. 2:22; 1Yuⱨa. 3:5.